Техникатэк уг луы

«Сурнай», «Труд» хозяйствоосын, та ужлы сӥзьылысен нимысьтыз бригадаос радъяса, прицепен техниказэс выль арозь ик ремонт карыса быдтӥзы. Трос мукет хозяйствоосын но, кытын сеялкаосты, культиваторъёсты, усыосты, катокъёсты ремонт каронъя нимаз бригадаос ужало, тулыс бусы ужъёслы умой дасясько. Но Тукай нимо, «Уныш» обществоосын та ласянь уж умой ӧвӧл али, ремонт каллен мынэ. Нош районысь гурт хозяйствоя но сиён-юонъя управлениысь специалист-консультант Ришат Нуриев ивортӥз, котькуд хозяйстволы прицепен машинаосты 1-тӥ апрелёзь ремонт карыса быдтоно шуыса.

20-тӥ мартысен хозяйствоосын трактор-автомашинаослы техосмотр ортчытӥськыны кутске. «Труд», «Игенче», «Сурнай», Тимирязев нимо хозяйствоосын та кулэ ужрадлы умой дасясько, техобслуживаниея мастерскойёслэн ужзы кулэезъя радъямын. Трактор, тодмоям кыӵе ке уж быдэстэмезлы быдэ, графикъя техосмотре пыртӥське. Та ужрад котькуд хозяйствоын озьы радъямын луыны кулэ. Али дыре районын тракторной паркъёсысь техникалэн 80 процентэз бусые потыны дась. Кылемъёссэ но тупатъяса вуттон - туннэ нуналлэн валтӥсь ужпумез луэ.

Трос хозяйствоосын пудо сиён дасян техниказы сярысь кулэ луыкуз гинэ тодазы ваё. Бервылыз - пудо сиён дасян понна умой дырез ышто. Сыӵе югдуре шедёнтэм понна, та техникаез но тулыс бусы ужъёс кутскемлэсь азьло эскерыны, ремонт карыны кулэ. Сотэк пудоослы тырмыт ӟечлыко сиён дасяны уз луы. Музъем ужась механизаторъёсты дышетон шоры но ответственно учкыны кулэ. Тужгес но кышкытлыклэсь утиськонъя правилоосты, нырысетӥ юрттэт сётонъя куронъёсты дышетонлы бадӟым саклык мед висъяськоз. Кылем арын кадь медаз луы. Районын ортчем ар понна производствоын 8 мурт сӧсырмиз.