Тихоокеанской флотлэн морякез

Нуналъёс бӧрсьы толэзьёс, аръёс шӧдытэк ик ортчо. Таза но чырткем, востэм но визьмо будэ Гриша. Котьмаин тунсыкъяськыса, улонэз яратыса быдэ но вуэ. Дышетсконзэ гинэ, коньдонэз луымтэен но атаез вазь кулэмысь, азинтэмез уг луы.

1940 арын Горд Армилэн радъёсаз басьто. Служить каре Тихоокеанской флотын, морской пехотаын. Тихий океанлэн тулкымъёсыз умой кыдато ик удмурт гуртын будэм пиез. Тани кутске Быдӟым тылож. Таӵе шимес ивор флотэ но вуэ. Командование одӥг нуналэ морякъёсты люкаса вазиське: — Кин Родинаез утьыны, немецкой фашистъёслэсь мозмытыны мыноз?

— Мон! — шуыса кык гинэ морякъёс строй азе султо. Одӥгез луэ кыдёкысь Татарстан музъемысь Балтаси ёросысь Вылын Ушма гуртын будэм пи Иванов Григорий Фёдорович. Соос озьы кыкез ас мылкыд каремзыя нырысетӥен оже кошко.

Тушмон жалятэк сутэ асьме гуртъёсты, городъёсты. Сыӵе секыт ож, макем чидантэм, вормонтэм кадь вал ке но, но ас вордскем музъемзэ мур яратэм солдатъёс кышкатэк вамышто со тылӝуэ. Иванов Григорийлы Сталинград городэз мозмытонын ожмаськыны тупа. Тушмон туж кужмо сылэ городэз басьтон понна. Со котырысь музъем котькуд солдатлэн мугорыныз шобыртыса кадь мозмытэмын. Чидантэм кышкыт ожмаськон. Тӥни соку Григорий туж секыт сӧсырме. Тушмонлэн пуляез чиньыоссэ ярантэм пазя, осколокез йыраз пыре. Озьы йылпумъяське Иванов Григорийлэн ожмаськонэз. Кема госпитальын эмъяськемез бере, сое комиссовать каро но 1944 арын со вордскем гуртаз бертэ.

Кытчы мыноз ужаны луымтэ киосын? Мар кароз? Но со уг сётскы. Кожалод, Тихий океанлэн тулкымез умой сое дышетэм, кыдатэм улон понна нюръяськыны. Сюлэм висе, мылкыд секыт, немец но странаысь уллямын, нош улон капчи луымтэ, со гур поттыны дыше. Озьы сое улон тулкым Марийской пала вуттэ. Отын, Киселево гуртын, одӥг нылэн кылем палкышноен (картэз войнае кулэм) улыны кутске. Колхозын ужа, кузпалэныз нош куинь нылпи вордо на. Кышноезлэн нырысетӥ картэзлэсь кылем Валентина нылыз но соосын ӟеч гинэ будэ. Туж яратэ Григорий Фёдорович инкуазез, улонэз. Берло мушъёс но вордыны кутске. Йырвекчияз кылем осколокез, быдэс улонэз ӵоже ассэ шӧдытыса улӥз ке но, Григорий Фёдорович та улонын шудо но адӟем карымон улыны быгатӥз. 79 аресэн та улонысь кошкиз.

Оло соку, кышкатэк, ас мылкыдызъя, оже кошкеменыз, Инмар сое жаляса утем? Шуг-секытъёслы сётскытэк улыны тыршыса будэтэм нылпиосыз но внукъёсыз табере солэсь нимзэ данъяса уло. Соос пӧлын врачез но дышетӥсез, музъем ужасез но вань.

Куректон-кайгу вайись ож асьме калык понна ноку но медаз луы ни. 75 ар талэсь азьло возьматэм миллион солдатлэн батырлыкез одӥг бадӟым, вормонтэм, синмаськымон тугоко карыса бинемын. Со бинетын — туннэ асьмелэн каньыл улонмы. Сое вунэтыны нокудмылэн но правомы ӧвӧл!

P.S. Иванов Григорий Фёдорович пусъемын юбилейной медальёсын.

Кумаева Нина

Ципья черкогурт