Тодэ ваёнъёс кылизы

Район Сабантуйлэн абсолютной батырез - нюръяськисьёслэн выжыысьтызы Арбор пи Ринат Хайретдинов луиз. Солы РФ-ысь Государственной Думаысь депутат Вагиз Мингазев машина усьтон но така кузьмаз. Мукет секталаосын но асьме районысь пиос батыр луизы. Пичи пиос пӧлын Рафиль Вафин (Нурмабаш), Фанис Кабиров (Арбор), Ильназ Миннемуллин (Ципья) вормизы. Быдэ вуымтэос пӧлын Рафиль Сабирзянов (Нурма), Айрат Хайруллин (Малмыж) вормисе потӥзы. Та пиос ваньзы но асьме дорын - Гарифуллин, Габдрахманов, Хайретдинов кадь тодмо нюръяськисьёс дорын заниматься каро. Воргоронъёс пӧлын но котькуд секталаын асьмелэнъёс - Рафаэль Вафин, Ильдар Зарипов (кыкназы но Нурмабашысь), Ринат Хайретдинов (Арбор), Руслан Рафиков (Янгул), Айдар Хайретдинов (Арбор) - батыр луизы. Мӧйыос но, егит дырзэс тодазы вайыса, нюръяськонэ пыриськизы. Тодмо нюръяськись Фарит Ахмадиевлэн али ке но нюръяськон мылкыдыз кысымтэ - батыр кылиз.

Сабантуйлэн нош одӥг чеберез - валэн ӵошатскон. Сое учкисьёс но трос луизы. Хозяйствоосысь но араб выжыысь валъёс 1800 метр кусыпын ӵошатскизы. Нырысетӥосыз пӧлын «Татарстан» обществоысь Рафис Самигуллинлэн Ласточкаез, кыкетӥ ӵошатсконын «Якты юл»-ысь Дмитрий Губановен валтэм Ватан нимо вал вормиз. Кыкетӥ, куинетӥ интыосын «Сурнай», «Труд», «Татарстан» обществоосысь Никита Агеевен, Эдуард Митрофановен, Сергей Изосимовен но Рушан Латыповен валтэм Малыш, Погода, Санадор, Парк кушемнимо валъёс.

3000 метрын ӵошатскем таза выжыысь валъёс пӧлын Тукай нимо обществоысь Владимир Семёнов Головорез валэныз - нырысетӥ, Ланселот (Арча) - кыкетӥ, «Татарстан» обществоысь Марсель Шафигуллин Кавалер кушемнимо валэныз куинетӥ лыктӥзы. Таза выжыысь ворттӥсь валъёс 1200 метрын ӵошатскизы. Нырысетӥ куинь призо интыосты Николай Коломицевен, Владимир Семёновен, Николай Ляминэн валтэм Мелт Сети («Татарстан»), Флешка («Маяк»), Лоу Глорий («Яна тормыш») кушемнимо валъёс басьтӥзы.

Сабантуйын чебер, шулдыр минутъёс трос луизы. Аланысь Рафиль Авхадиев нялмыт юбое тубонын нырысетӥ луиз. Рифат Самигуллин (Балтась) гозыен но бодыен кыстаськонын вормисе потӥз. Балтасьысь Алсу Нигматзянова, Казаньысь Адель Гарифуллин бызьылӥсьёс пӧлын нырысетӥ луизы. Гир ӝутыса майданэз котыртонын Шишинер гуртысь Нургаян Калимуллин, Ляйсан Гайфиева вормизы. Гир ӝутканын но Шишинерысь Рамиль Зариповез но Балтасьысь Ильшат Галимуллинэз вормисьёс ӧз шеде. Бадминтонъя Субашысь Диляра Габделхакова но Балтасьысь Расиль Мухамметгалиев адӟем карымон луизы. Волейболъя нырысетӥ интылэн кузьымез Малмыже кошкиз. Кугунур команда - кыкетӥ, нош «Агрохимсервис» куинетӥ луизы. Ньыль пӧртэм секталаын суй кужымзэс эскерыса, Рифат Рахимов (Балтась), Ильнар Габидуллин (Сосна), Азат Заляев (Атня), Ильнур Авхадиев (Смаиль) чемпион луизы. Нош нылкышноос пӧлын вормисьёс кык - Балтасьысь Гульзия Гарифуллина но Салаусьысь Земфира Апанова.

Огъя вераса, Сабантуй котьку сямен трос пӧртэм ӵошатсконъёсын, шудонъёсын, кузьымъёсын но капчи мылкыдэн тодэ кылиз. Вуоно аре нош ик та майданын пумиськыны мед кылдоз.