Толэз келямы — тулысэз пумитамы

2-тӥ мартэ Покчи Лӧзя гуртысь культура юрт дорын ӵукна ик кырӟан гур чузъяськиз. Озьы Вӧй праздник калыкез толэз келяны, шулдыръяськыны ӧтиз. Лымшор вадесэ - пересез-егитэз но, пичиос но - ваньзы дыртӥзы шулдыр ужрадэ. Котыр улосэ ческыт табань зын вӧлмиз. ӝӧк вылын самовар. Котькуд адями табанен самоварысь пӧсь чай лэзьыса юыны быгатӥз.

Тани кутскиз шулдыр праздник! Тунсыко шудонъёс, конкурсъёс, ӟырдыт ӵошатсконъёс калыклы трос шумпотон кузьмазы. Одӥг сэрегын канатэн кыстаськизы, мукетаз пичиос горшок пыргытылӥзы, кыдёкын ик ӧвӧл чорыгасьёс чорыг кутыны выризы, воргоронъёс нылкышноосты ледянкаосын нуллыса ӵошатскизы, чырткем луэмзэс эскеризы. Тужгес но кема возьмам конкурс луиз, дыр, гын сапег куян. Нылкышноос но воргоронъёс гын сапег куяса вожвылъяськизы - кинлэн кыдёкегес «лобӟоз». Вормисе потӥзы Нурсиль Загидуллин но Лариса Михайлова. Эшшо праздникмес шулдыртӥзы на граната куянъя ӵошатскон, армреслинг, концерт номеръёс. Тӥни озьы шудон-шулдыръяськон сямен куро сульдэрез ӝуатон дыр но вуиз. Вакчияк вераса, праздник ӟеч пӧрмиз, калык мылысь-кыдысь шулдыръяськиз но шутэтскиз.

Нош кыӵе праздник, пе, спонсоръёстэк! Калыкын юнме гинэ уг шуо, уга: «Дунне умой адямиостэк ӧвӧл». Сыӵе адямиос ми дорын но вань. Мылысь-кыдысь юрттыны соглаш луыса кизэс мычизы «Сурнай» хозяйство (Тауфик Газизович Гилязев), «Стройматериалы» магазин (Раис Ильдусович но Фанис Ильдусович Хусаиновъёс), «Ялтра» магазин (Гульсина Шарифзяновна Галимзянова), ООО «Элви+» (Сергей Геннадьевич Плотников), «Тургай» магазин (ИП Фидаиль Бильсурович Гумаров), Покчи Лӧзя гуртысь «Бэхет» магазин (Рафик Эдуардович Алексанян).