Хезмәт

Толлы вож сугон

Арборысь фермер Руслан Назипов (паллянын) Вукогуртын вож сугон будэтэ

Раис атаеныз ӵош кутскем ужзылэн бервылэзъя соос Грант утӥллям но со уксё малпанзэс улонэ пыӵатыны оскон сётэм. Вукогуртысь буш сылӥсь зданиез басьтыса, сентябрь толэзе ремонт ужъёсты йылпумъяса, валтӥсь ужзы борды басьтӥсько. 5-тӥ декабре нырысетӥ урожай басьтӥллям но сое, «Нур» супермаркетлэн кузёеныз вераськыса, магазинэ вузаны понӥллям. Азьпалан сугонэз «Казань» агропромышленной паркын но вузаны кутскозы.

Руслан гидропоника системалэн юрттэменыз сугонъёсты будэтон уж борды ньыль ар талэсь азьло басьтӥське, та ужезлэн кутсконэз сярысь со туж мылкыд карыса вераз:

- Тодон-валанэя мон инженер. Вож будосъёсты будэтон ужез школаын дышетскыкум ик тунсыкъяськыса быдэсъясько вал. Бакчаысь теплицаямы но кык кузё луэ вал: одӥгез - анае, мукетыз - мон. Со одӥг сэрегаз, мон мукет сэрегаз мерттӥськомы вал будосъёсты. Таӵе ужен тунсыкъяськонлэн бервылэзъя мон фермер луи, дыр, ини. Асьме палъёсын гидропоника системаен мар ке но будэтыны луэ меда шуыса, туж тунсыкъяськыса, юалляськыса, дышетскыса ачим но будэтыса ути но юанэлы валэктон шедьтӥ. Музъемын сугон будэтонлэн ар ӵоже пайдаез луытэк но кыльыны быгатэ, малы ке шуоно арлы быдэ одӥг интыын будэтыны уг луы, собере, ар шоры но учке. Сугон кальчаез будэтон понна гинэ но сугон музъемын 1 толэзь будэ, нош татын, оптимальной одӥг температураез возьыны быгатӥд ке, 15 нуналскын урожайзэ басьтыны луэ. Татын но ужлэсь аспӧртэмлыксэ вунэтоно ӧвӧл, ужез пумозяз вуттыса быдэстыны кулэ. Здание пушкысь температура 18 градуслэсь улӥ луиз ке, сугон будэмысь дугдэ, соин но милям гурмы 21-25 градуслы тупатыса понэмын. Кальча кузьгес мед будоз шуыса, нуналлы одӥг пол компрессорлэн юрттэменыз углекислой газ лэзиськомы, соин фотосинтезлэн процессэз кужмоя. Уйинлы 21 градус кельтӥськомы. Урожай басьтон азьын югдытонлэсь спектрзэ воштӥськомы, кальча пеймыт вож тусо луэ.

Пенза, Липецк городъёсын луыса, нырысь со таӵе оборудованиен тодматске, озьы гинэ но ӧвӧл, 1 толэзь практика ортче, малы ке шуоно Татарстанын «Майский» эштосын сяна мукет интыосын гидропоникаен будосъёс уг будэтӥсько, та эштосын но солэн одӥг ярусъемез гинэ кутӥське вылэм. Нош Руслан кӧня ке ярусъем оборудованиен ужан секретъёслы дышетскыны мылкыд каре. Тунсыкъяськыса, юалляськыса ветлыса, оборудованиез лэсьтыса сётӥсьёсты но шедьтэ, соос Воронеж городысь луо. Нош сугонъёсты нимысьтыз химикатъёстэк будэтон понна В.И. Апаковлэн крестьян-фермер хозяйствоысьтыз ваё. Руслан кальча понна «Выборка» сортсэ басьтэ. Та ужаз солэн юрттӥсез но вань, со солэн ӵош дышетскем эшез Айдар Аскаров. Соос ӵошен нырысь сугонлэсь сортсэ быръё, собере 35 градусозь шунтэм вуын «сайкато», модуль шуыса нимаськись пеймыт сэрегын 2-3 нунал возё но, стеллажъёсы быртыкен-быртыкен мертто.

Азьпалан Руслан укроп, петрушка, базилик будэтыны кутсконэз ужпум карыса пуктэ.
Гидропоника - вулэн юрттэменыз ужа шуэмез валэктэ яке будосъёслэн выжыоссы ву пушкын пуко, отчы нокыӵе но ватсэтъёс уг понӥсько, солэн юрттэменыз экология ласянь чылкыт продукция будэтӥське.

Остальные фотографии смотрите в фотогалерее

Теги: 250
Нравится
Поделиться:
Реклама
Комментарии (0)
Осталось символов: