Тон кошкид пыраклы…

Шедьтыны уз луы, дыр, кылъёс, кудъёсыз быгатозы кӧнялы ке буйгатыны сӧсырмем сюлэмъёсты. Котькуд адямилэн югыт дуннеен люкиськонэз секытэн сётӥське, нош со матысь адямиед ке, кык поллы секытгес йӧтэ. 

— Ӧм вуттэ ук 90 аресъем юбилейдэ пумитаны. Ой, ӧм вуттэ берпуметӥзэ вераськыны но пумиськыны. Кылдоз ай, малпасько вал. Кин тодӥз вал, таӵе луоз шуыса, ӵукна гинэ куараед умой вал, вераськимы на, — тазьы шуыса тросэз лыктӥзы сое берпуметӥзэ адӟыны.

«Песяй» — тазьы вазиським ми солы. Асьмелэн песяймы улонысь вазь кошкиз бере, со интые кылиз Нина Васильевна — анай, песянай, ӵужанай, тросэз понна дано кышномурт, кудӥз Удмурт Элькун понна вордӥз фольклор кырӟанъя но эктонъя «Айкай» кун театрлэсь директорзэ — Пётр Даниловез. Со котьку возьдаське вал бадӟым каремзылэсь, уг яраты вал солы трос саклык висъякузы, но шумпотэ вал нылпиосызлэн азинсконъёсызлы. Бен, трос-а кулэ на аресаз вуэм кышномуртлы? Ӧвӧл, семьяяз гинэ ваньмыз лад-лад мед луоз, ӵемгес мед лыктозы нунокъёсыз но берталозы пиналъёсыз. Трос аръёс ӵоже бакча сиёнъёсты но утялтӥз, сиён но пӧраз, семьязэ ческыт пӧраськемъёсын но шумпоттӥз. 

Ӵемысь ӵыжы-выжыосты буре ваён дыръя яке кыӵе ке праздникъёс луыку, котьку дорамы ӧтьылӥмы. «Яра али, тӥ доры ке но ветлыны луэ, ато мынон инты но ӧвӧл ини», — шуэ вал песяй. Ноку лек учкемзэ ӧм адӟе, чурыт кылзэ ӧм кылэ. Со котьку серекъясь ымнырын, пальпотӥсь синъёсыныз гинэ тодэ кылёз. Ноку вунонтэм луыса кылёзы солэн серекъятӥсь верамъёсыз. Со матысь эш кадь вал, соин серекъяны но, шугъяськытӥсь юанъёсты но эскерыны луэ вал. 

Песяймылэн сюлмыз шӧдтэк шорысь йыгаськемысь дугдӥз 18 южтолэзе... Ӵукнаяз гинэ лад-лад вераськыса, нышыр береяз ӝог сямен больницае вуыса, отын ик лулыз потӥз. Сопал дуннее кошкыкуз, Людмила нылыз дораз луиз, нош Пётр пиез сюрес вылэ ик кылиз. «Кӧня ке час гинэ ӧз возьма, ӧй вутты ук берпуметӥзэ адӟыны, ӵукна гинэ умой телефон пыр вераськимы вал», — ӝож мылкыдын вераз Пётр Павлович. 

Сайкыт инбамын кужмо чилектэм кадь ивор луиз со ваньмылы. Берло дыре со шергес ветлыны кутскиз куное, троссэ дораз улӥз, тазалыкез лябӟиз. Ужъёссэ юалляськыса, котьку возьмаськом вал лыктэмзэ, но ӧз кылды ни... Берпуметӥ пумиськонъёс сыӵе яркыт адӟисько ни, шунытэн тодэ вайисько верам кылъёссэ... 

Нина Васильевнаез берпуметӥ сюресаз келяны трос гинэ адями люкаськиз. Арня шорез учкытэк, ужзэс палэнтыса, адямиос олокытысь но вуизы. Та возьматэ, кыӵе вал дуно Нина Васильевна. 

Ӟеч мед улод сопал дуннеяд, песяй! Улондэ ачид гинэ тодӥськод, дыр, вань ӟечез гинэ сьӧрад мед кошкоз. Секыт сюед капчи медло, тон котьку сюлэмамы улод. 

Нина Васильевналэн нылпиосызлы, вань ӵыжы-выжыосызлы, матысьёсызлы мур куректэммес вераськом но чидан сӥзиськом!