Хезмәт

Ципьяын но нылкышноослы сӥзем праздникез пусйизы

Православной календарьын нылкышноослэн калыккуспо нуналзы ӧвӧл. Но вань православной традициын аспӧртэмлыко нунал, кудаз осконэн улӥсь адямиос ӟечкылало асьсэлэсь песяйёссэс, анайёссэс, кышнооссэс, нылъёссэс но вань кадь матысь нылкышнооссэс.

Та праздник нимаське «День святых жён-мироносиц» шуыса. Мироносицаос шуыса нималлям Иисус Христослы самой матын луэм нылкышно дышетскисьёсты.

Праздник возьматэ, макем бадӟым духовной ужпум Инмар висъям но висъя нылкышноослы. Ведь улонын нылкышнолэн ужпумез котьку но бадӟым но дано луэм, азьло но, туала дыре но, — со юртлэсь шунытсэ утись, выжыез азьланьтӥсь адями.

Туэ та черк праздникез пусйизы 12 мае (Акашка бере куинетӥ ӟучарняяз пусйиське). Покчи Лӧзя черкын та праздникез куинетӥ арзэ пусйизы ке ини, Ципьяын — нырысетӥзэ гинэ. Черклэн настоятелез, отец Рафаил, праздник вӧсь дыръя вань люкаськем нылкышноосыз но нылъёсты праздникен ӟечкылаз но ваньзылы быдэн роза сяська кузьмаз. Собере луиз сӥё-дано люкетэз — черклэн коркаяз вань люкаськем нылкышноосты шулдыръяськон программа витиз. Воскресной школае ветлӥсь нылпиос концерт возьматӥзы — чузъяськизы кылбуръёс, кырӟанъёс, луизы эктонъёс но. Озьы ик нылкышноос прихожанъёслэн кужыменызы радъям узыр ӝӧк куспын вераськыса но пукизы.

— Туж умой ужрад пӧрмиз. Сяська но кузьмазы, концерт но возьматӥзы, ческыт сюдӥзы но. Та нунал зэмос праздниклы пӧрмиз, таӵе бадӟым карыса та праздникез та дырозь пусъеммы ӧй вал али, — шуиз ужрадэ пыриськем кышномурт Мария Гаврилова.

Реклама
Нравится
Поделиться:
Реклама
Комментарии (0)
Осталось символов: