Тулыс сярысь туннэ сюлмаськы

Татын нимаз ик бадӟым саклык висъяло гурт хозяйствоысь машинаосты кезьытлэсь утёнлы. Малы ке шуид техникалэн толэз кызьы ортчытэмез тулыс кизён кампанилы нимысьтыз влиять каре. Бусы тузонлэсь утялтыса, кулэезъя вӧяса, питранъёссэс тӧдьмаса интыям техникалэн толэз умой потэмез котькинлы тодмо. Берлогес соосты мукет интыын ремонт карыны но капчи. Та ласянь «Сурнай», «Татарстан», «Якты юл», «Труд», «Сосна» хозяйствоосын уж адӟем карымон радъямын. Татын ини техникаез толлы возьманы интыяса, нимысьтыз бригадаос радъяса черодэн ремонт карыны кутскиллям. Нырысь ик усыосты, культиваторъёсты, БДТ-осты, кизён машинаосты ремонт каро, мастерскойёсын тупатъяно тракторъёслэн быдмемзы ӧвӧл. Тулыс-сӥзьыл ужъёс бере соослы пыр-поч технической эскерон ортчытӥське, пӧсьтэм ёзъёссэс, узелъёссэс вошъяло. Тулыс бусыын ужано техника бере, пудо сиён дасян, октон-калтон понна кулэ агрегатъёсты, комбайнъёсты тупатъяны кутско. Трос хозяйствоосын соосты толалтэлы кулэ куронъёсъя возьманы пуктӥзы.

Куазь шуныт дыръя техникаез ремонт карон трослы капчигес но луэ, ултӥгес но усе. 25-30 градус кезьытэн кортэз кутыса утьы тон. Ужано зданиез шунтыны кӧня эстӥськон кулэ. Собере ку сельхозмашинаослы воштос ёзъёслэн дунъёссылэн будытэк кылемзы вань. Туэ но 20 процентозь будоз шуыса верало. Озьыен, техникаез алиысен тупатъяса интыяд ке, кӧня уксё шыръяське шуэм кыл. «Сурнай» выллем техникаез туннэысен ремонт карыны кутскем хозяйствоослэн кивалтӥсьёссы тае но лыдэ басьтӥллям.

Татарстанысь Гурт хозяйствоя но сиён-юонъя министерстволэн приказэзъя машинно-тракторной паркъёсты толлы дасянъя но сельхозмашинаосты ремонт каронъя конкурс ортчытӥськиз. Уно гинэ хозяйствоослэн кивалтӥсьёссылэн но отысь специалистъёслэн та ужпум шоры ответственно учкеменызы конкурсын асьме район вылӥ дунъет басьтӥз. Татын азьпалан верам хозяйствоослэн сяна «Кама», «Дуслык» обществоослэн но люкетсы вань. Конкурслы дунъет техникаез возьманлэн но ремонт каронлэн югдурезлы гинэ ӧвӧл, машинно-тракторной парклэн умой луэмезлы, отын ужан понна кылдытэм каньыллыкъёслы, ремонт карисьёслы уждун тыронлы, кышкытлыклэсь утиськонъя правилоослэн быдэсъяськемзылы учкыса но тодмояськиз. Ремонт карисьёсты кулэ ужан дӥсьёсын но утиськон средствоосын обеспечить каронэз, уждун тырыку пӧртэм тунсыкъяськытон амалъёсты кутонэз но вунэтыны уг яра.

Берло аръёсы районысь хозяйствоосы выль техника ӧжыт ӧз берты. 1-тӥ сентябрьлы басьтэм даннойёсъя, туэ гинэ но 30 трактор, 5 ю тысь октон, 4 пудо сиён дасян комбайн, 59 прицепной техника (ваньмыз 100 миллион манет тыр мында) ваемын. Татын правительстволэн 50х50 программаезлэн юрттэтэз бадӟым луиз. Озьы ке но, паркысь техникаез выльдонъя трос ужаны кулэ на. Куд-ог хозяйствоосын тракторъёслэн, комбайнъёслэн ӝыныезлэсь уноез вужмемын. Соосты тупатъян понна но, ужаку но бадӟым суммаен воштос ёзъёс кутӥсько. Озьыен, паркъёсысь техникаез выльдонъя вис карытэк ужан куриське.