Тунаськонъёс, тунаськонъёс…

Но соиз но, таиз но амал шонерзэ вералоз тӥледлы соку гинэ: зундэсъёсты, чыртывесьёсты, киросэз тунаськыку одно ик куштоно. Тӥлесьтыд мугордэс нокыӵе арбери но дӥськут медаз эгеса. Со сяна, та ужен выроно уйшор бере.

Макем юн тӥ оскоды тунаськонъёслы, сокем ӝог соос улонады пыӵалозы. Озьы бере, умоезлы оском, уродзэ вунэтом. Азьланьын улонзэс тодон понна нылъёс кыӵе ке корка доры дугдо, укно дурын кылзӥсько: отын улӥсьёс даллашо ке, тӥледыз но керетон вите. Гань-гань верасько? Озьыен, тӥляд но ваньмыз ӟеч луоз.

Сюрес воже нылъёс люкасько но котыразы эгес суредало. Отын ик, шыпыт кариськыса, музъемез кылзӥсько. Кудпалась вал дыбыртэм куара шуккиськоз, сопалась ик картэд луоз.

Ошмесысь ваем вуэз бадӟым пуньыен ормыртоно. Сое уйшор бере кыре поттоно. Ӵукна чаклано: пуньыысь ву вогыриё кынмемын ке, улонэд но нюко-гопо луоз. Питыр-питыр ӝутӥськемын — туэ пинал ваёд. Ву шонер, вольыт кынме гань-гань но шудо-буро улонлы.

Нылъёс коркан котырак султо. Пӧлысьтызы одӥгезлэсь синъёссэ кышетэн кертто но куинь пол сое бергато. Собере ини чаклало: нылаш укно пала вамыштэ ке, вуоно кузпалзэ туэ пумиталоз, ӧс пала — ӝоген бызёз, борддор шоры — улоназ номыр уз воштӥськы.

Сюсьтылэз пуньыен тыл вылын шунто. Пӧзьыны ӧдъямез бере сое кезьыт вуэн тэркые кисьто. Кыӵе суред пӧрмоз, соя ик адӟоды, ма вите тӥледыз азьпалан.

Басьтоно выль ӵушкон. Отчы ымнырез йӧттылоно ӧвӧл. Куинь пол куасалтыса шуоно: «Лык дорам, гажанэ, ӵушиськы ӵушконам». Ӵушконэз миндэр улэ поныса изьыны выдоно. Уйвӧтады адӟоды вуоно кузпалдылэсь туссэ. Нокин син азяды ӧз пуксьы ке, туэ уд кузпалъяське. Куд-огез ӵушкон интые йырси сынэн тунаське.

Кузпалъяськоды-а, уд-а — тае тодыны луоз мукет амалъя но. Уйшор бере пенез сюрес вылэ пызьнано. Ӵукна учконо: отын адями пытьы вань ке, бызёды.

(«Азьлане», 2008 ар, № 2)

Фото: https://pixabay.com/ru/photos/