Тунсыко но пайдаё ужрад (+фоторепортаж)

Азинлыко ужа шуыны кулэ. Отчы ветло 4-5 классъёсын дышетскись пиналъёс. Со одно ветлоно лагерь. Нылпиос отчы ветлыса ужало но, шутэтско но, пӧртэм тунсыко ужрадъёсы но пырисько, экскурсие но мыно…

23 инвожое Покчи Лӧзя шоръёзо школаысь 5-тӥ классын дышетскись пиналъёс ӵапак сыӵе экскурсие Казане ветлӥзы. Туж бадӟым тау вераме потэ нырысь ик школалэн директорезлы Марат Фаритович Исмагиловлы: со автобусэн югдурез сэрттӥз-пертчиз. Нимысьтыз бадӟым таукаронмы классэн кивалтӥсьмылы Наталия Львовна Антоновалы, лагерьёслэн начальниксылы Наталья Михайловна Артемьевалы но келяса мынэм анайёслы, нылпиосмылы тунсыко шутэтскон радъямзы понна.

Пиналъёслы ваньмыз туж кельшиз. Мылкыдъёссы пачыл потыса, кема дыр ӵоже вунонтэм тодэ ваёнъёс люкаса бертӥзы. Кинлы ке та экскурсия «Макдональдсэ» пыраменыз тодаз кылёз, мукетъёсызлы Горький нимо паркын шаянъяськеменызы вунонтэм луоз, нош куинетӥосызлы Татарстанлэн естественной историяя музеяз адӟемъёсынызы-кылэмъёсынызы.

Малпасько, музейын экскурсия тросэзлы кельшиз шуыса (экспонатъёсты кӧня ке пол берытскыса учкисьёс но вал пӧлазы). Пиналъёс татын минералъёслэн бадӟым коллекциенызы тодматскизы, Музъем шармылэн пӧртэм сэрегъёсаз усем метеорит люкетъёсты асьсэ синмынызы адӟизы. Вашкала зарезьёсын улэм трос пӧртэм сюрлытэм лулосъёслэсь, динозавръёслэсь, мамонтъёслэсь но гурезьгыркын (пещера) улэм гондырлэсь лысьӧмъёссэ адӟон но вунонтэм мылкыдъёс кельтӥз, дыр. Пиналъёс гинэ ӧвӧл, бадӟымъёс но трос тунсыко но пайдаё информация басьтӥзы татын. Экскурсовод, экспонатъёсын тодматыса, тунсыко фактъёс сярысь вераз. Утёд ке, туала Казань интыын вашкала дыръёсы бадӟым зарезь луэм. Со Казань зарезь дурын экскурсие пыриськемъёс «пуксьыса пукыны» но быгатӥзы, эсьма. Со сяна, музейын пиналъёс инсьӧр безменен мертаськыса, пӧртэм планетаосын асьсэлэсь секталазэс тодыны, интерактивной телескоп пыр планетаосты, созвездиосты учкыны, динозавръёсын пазлъёсты люканы, аспӧртэмлыко армрестлинген ки кужымзэс мертаны быгатӥзы. Ку эшшо кылдысал учыр палеонтологической раскопкаосы пыриськыны, вашкала чорыгъёсты «сюдыны» но Ледниковой вакытысь лулосъёсын пумиськыны!

Огъя вераса, котькудӥз - пиналэз но, бадӟымез но - мылысь-кыдысь шутэтскиз , тодон-валанзэ муромытӥз, йӧспӧртэм город сиёнъёсты но веръяз.

Анай-атайёслэн нимынызы Ольга Плотникова