Тужгес устоосыз гинэ

Самой устоосыз шуыса верамме валэкто. Ӵошатсконъёсы матысь бускель луэм Саба, Арча, Кукмор, Мамадыш районъёсысь нюръяськисьёс но ӧтемын вал. Соин ик тренеръёсмы та турнире опыт люкам нюръяськисьёсты гинэ ваёнэз умоен лыдъяллям. Бускель районэ мыныку, асьмеос но кужмо пиналъёсты гинэ люканы тыршиськомы ук. Ӵошатсконъёс кутскон азьын районысь спортъя отделлэн кивалтӥсез, Татарстанысь спортъя дано мастер Р.Загидуллин, районысь нюръяськонъя федерацилэн председателез, РСФСР-ысь спортъя мастер Ф.Ахмадиев пиналъёсын пумиськыса вераськизы. Тӥни озьы, «Балтач» спорткомплексын кык ковёр вылын ӵошатсконъёс кутскизы. Тросэз командаос быдэс луымтэ составен лыктӥзы ке, Янгулысь Раниль Габдрахманов ӵошатсконэ 15 пиосты ваем вал. «Арлы быдэ Янгулын луэм Кубок туэ но отчы кыле вылэм», - шуизы тренеръёс. Зэмзэ ик озьы луиз, янгулъёс нырысетӥ интыез басьтӥзы. Нош тани Кугунур командалэн кыкетӥ интые потэмез тросэз понна витьымтэ маке вал. Азьло дыръя ачиз призо интыосты басьтэм Ленар Саттаровлэн тыршыса ужамезлэн нырысетӥ емышез луиз та. Ципьяысь Ринат Хайретдинов удмурт пиослэсь туж усто нюръяськисьёсты дасям бере (та ӵошатсконын соос куинетӥ призо инты басьтӥзы. Н.С.), Ӟаны школаысь Руслан Михайлов но тани кӧня ӵошатсконэ ини, удмурт пиосты бигер сямен нюръяськонлэн аспӧртэмлыкъёсызлы дышетон вылысь, ӵошатсконъёсы вае. Нюръяськыны вылӥ дышетскон юртын тодон-валан басьтӥсь пиосмы но бертӥллям вал.

Таяз учыре ӵошатскон сӧсырмонъёстэк ӧз ортчы. 65 килограмм секталаын нюръяськем Балтасьысь Салават Муллагалиев, ньылетӥ кругын кизэ вӧсь карыса, ӵошатсконъёсысь усьыса кылёно луиз. Нош со призо интые потысал. Соин меда, районысь нюръяськонъя федерацилэн председателез Фарит Ахмадиев аслэсьтыз коньдонкузьымзэ Салаватлы сётоно кариз. Ӵошатсконъёсы ялан ветлӥсь куномылэсь, спонсор Фагиль Шафигуллинлэсь коньдонкузьымзэ Смаильысь нюръяськисьлы Аяз Зиннатуллинлы сётӥзы. Тау соослы. Валамон ини,та учыре тужгес бадӟым тау карон кылъёс Алмаз Нутфуллинлы вераны кулэ, дыр. Карадуван мебель фабрикалэн призэзлы ортчем ӵошатсконъёслэн азинтӥсез луыса тани кӧня аръёс ӵоже ини со пиналъёслэсь мылкыдзэс ӝутэ. Призо интыосты басьтӥсьёс, вормись командаослэн тренеръёссы коньдонкузьымъёсын, чемпионъёс медальёсын пусйисько.

Тани соос, «Юлдаш» обществолэн призэзлы ортчытӥськем ӵошатсконъёслэн чемпионъёссы: РУФИЛЬ ХАБИБУЛЛИН (Янгул, 40 кг), ФАНИС КАБИРОВ (Арбор, 45 кг), АЛЬФИР ХАБИБУЛЛИН (Янгул, 50 кг), ИЛЬНАР САТТАРОВ (Кугунур, 55 кг), ИЛЬДАН АХМЕТХАНОВ (Янгул, 60 кг), ДИЛЮС РАМАЗАНОВ (Тюнтер, 65 кг), РАЛИФ ГАЛИЕВ (Шишинер, 70 кг), АЙРАТ ХАЙРУЛЛИН (Янгул, 80 кг), РУСТАМ РАМАЗАНОВ (Янгул, вылӥ сектала).