Хезмәт

Тырмымтэос вань на...

Нуринер но Чутай гуртъёс огазеяськыса, одӥг хозяйство луыса ужаны кутскемзы дырысен ини кык пол отчёт собранизы ортчиз.

Обществолэн центрез Чутайын луэм бере, отчёт собранизы но отысь культура юртын ортчиз. Талэсь азьло люкаськонын Нуринерысь калык ӧжыт вал ке, таяз ини шӧдскымон трос адямиос лыктӥллям. Экономикая секыт югдуре шедьыса, дыраз пунэмъёссэс но тырыны кужымзы тырмымтэ обществоез, Чутаен огазеяса «Кызыл юл» шуыса нимаськем одӥг хозяйствое пыртэмзы бере, адямиос азинсконэз шӧдыны кутскиллям. Тодмо ини, калык сое нырысь ик уждун вылын адӟе. Обществоын ужасьёслы кылем ар понна уждун тырыса быдтэмын. Классность понна но, стаж понна но, шыръяса но ӟечлыко ужамзы понна но ватсаса коньдон тыриллям. Пудо сюдӥсьёслы, механизаторъёслы отчёт собраниын, кузьым карыса, премия висъямын вал. Арез туж умой показательёсын йылпумъясьёсты обществолэн кивалтӥсез Фердинанд Хайруллин, сцена вылэ ӧтьыса, кузьымен пусйиз. Скал кыскись Масхуда Закировалы Татарстанысь гурт хозяйствоя но сиён-юонъя министрлэсь Марат Ахметовлэсь Ушъян грамотазэ сётыкуз, залын кичабонъёс нимаз ик кужмо луизы.
Валтӥсь агроном, инженер, зоотехник но экономист дасям отчётазы, обществолэн ар куспын быдэстэм ужъёссылы мур анализ лэсьтэм сяна, куд-ог удысъёсысь тырмымтэосты тупатон амалъёсты, азьланезлы планъёсты но шара возьматӥзы. Кылсярысь, хозяйстволэн кассаяз коньдон пыртонлэн валтӥсь источникеныз лыдъяськем йӧл поттон удысын азинскон вань, но, куд-ог удысъёсын тырмымтэосты быдтон понна, трос ужано на. Кунянъёссы кулэмен трос коньдон пырытэк кылем. Пудо сиёнлы кошкем расходъёс бадӟымесь. Фуражлы тысё юосты кутон дуно усе. Хозяйстволэн кивалтӥсез Фердинанд Хайруллин: «Америкаысь фермеръёс кукурузалы, соялы бадӟым саклык висъяло», шуыса вераз аслаз выступленияз. Туэ кукурузаез тросгес кизьыны чаклало. Пудо сиён дасян понна кошкем расходъёсты кулэстон но йӧллэн рентабельностяз умоен шӧдӥськоз. Пайдаё но дунтэм пудо сиён поттонэз ужпум карыса пуктӥллям. Шыръян котькуд удысын луыны кулэ шуыса веразы собраниын. Кылсярысь, азьлогес толалтэ гурт урамъёсты, сюресъёсты лымылэсь 18 тоннаё К-700 тракторъёс чылкытато ке вал, табере та ужез быдэсъян понна грейдер басьтӥзы. Обществолэн территориысьтыз вань сюресъёсты огназ сузяны вутске. Нуналлы 30 литр мында (азьлоезлэсь кык поллы ӧжытгес) эстӥськон быдтэ. Собраниын, луонлыкъёссы вал ке но, поттытэк кылем йӧллэсь, сӥль вузанлэсь пыроно коньдон но лыдъямын вал. Хозяйстволэн кивалтӥсез Кукмор районысь нунал потэм ог 25-30 тонна йӧл поттыса вузась хозяйствоосты примере пуктӥз. Тӥни озьы луиз ке, уждунъёсты но будэтыны луэ, лэсьтӥськыны, выль техника басьтыны но коньдон кыле. «Али асьмелэн ужаса поттэм коньдонмылэн 40 процентэз уждун тырон понна кошке. Кылемез пӧртэм вытъёслы, электро, газ понна тыронъёслы кутӥське», - шуиз кивалтӥсь.
Собраниысь, производствоез будэтытэк умой уждун басьтыны уз быгатэ шуыса, туж ӟеч валаса кошкиз калык. Нош со понна котькинлы аслэсьтыз ужзэ лулысь-сюлмысь быдэсъяны кулэ.
Собрание районысь исполкомлэн кивалтӥсез Рамиль Шакиров пыриськиз но районъя кылем арын быдэстэм но туэ быдэстоно ужъёсын тодматӥз. Татарстанлэн Государственной Советысьтыз депутатлэсь Марат Зариповлэсь лыктэмзэ «кызыл юл»-ёс вылӥ дунъязы, выступленизэ кужмо кичабконъёсын пумитазы.
«Та дырозь но валче ужаса чебер азинсконъёс возьматэм дыръёс луизы, али но азинскон пала мынӥськоды. Туннэ обществоын ужасьёслэсь кык поллы тросгес луэм ветеранъёс ужын тӥледлы юрттӥсь но, кенеш сётӥсь но луозы», - шуиз аслаз выступленияз обществоысь ветеранъёслэн советсылэн председателез Наиль Салихов.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: