Удмурт калык но гурт понна тырше

Улосчимы Леонид Дмитриевич районысь удмуртъёс, Сырья гурт калык понна трос ӟеч ужъёс лэсьтыны вутскиз ини. Сырья гуртэ школа-нылпи сад лэсьтон вакытэ аслэсьтыз кенешъёссэ сётыса, школаез дыраз но чебер карыса лэсьтӥзы. Со понна гуртысь анай-атайёс Леонид Дмитриевичлы туннэ но тау каро. Сырья гуртэ Быдӟым ожын бырем гуртоослы синпелет (памятник) пуктонын но азьветлӥсь луиз. Туэ гуртысь клубез тодмантэм выльдӥзы. Та ужез быдэстонын но Леонид Дмитриевичлэн люкетэз бадӟым луиз. Трос кивалтӥсьёслэн ӧсъёсазы йыгаськыны тупаз солы та ужез пумозяз вуттон, ялан контроль улсын возён понна. Тыршемез, «бызьылэмез» юнме ӧз луы. Туннэ та ужез понна солы арлыдоос но, егитъёс но, пиналъёс но тау каро. Клубын пӧртэм ужрадъёс радъянэн но Леонид Дмитриевич ачиз кивалтэ, котькыӵе ужрадлэн шорсюлмаз луэ.

Ёросмес Удмуртиысь лыктэм тодосчиосын, артистъёсын, писательёсын тодматонын но люкетэз бадӟым солэн. Лыктэм куноос нырысь ик районэн кивалтӥсьёслы но Леонид Дмитриевичлы вазисько.

Районамы улӥсь удмуртъёслэсь вашкала сям-йылолъёссэс, кырӟан-веранъёссэс пыраклы историе кельтон вылысь нимысьтыз книга поттон сярысь малпан но солэн йыраз лыктӥз. Йыраз лыктэм гинэ ӧвӧл, та бадӟым но туж кулэ уж борды ачиз басьтӥськиз. Ёросысь, Пор шаерысь, Киров улосысь удмурт гуртъёсы, архивъёсы ветлыса, книга поттон понна материалъёс люказ. Та книга печатланы дась шуымон ини. Соиз жаль, книгаез печатлан понна трос коньдон кулэ. Эх, луысал ке та ужез пумозяз вуттон понна кытысь ке но коньдон шедьтыны. Леонид Дмитриевичен дасям та вераса быдтонтэм узырлыкез калыклы вуттыны луысал ке, кыӵе бадӟым кузьым луысал со районысь удмуртъёс понна.

17-тӥ декабре Леонид Дмитриевич Сапожниковлэн гумыр праздникез - 50 аресъем юбилеез. Сое ёросысь вань удмуртъёслэн нимынызы ӟечкыласьком бадӟым праздникеныз, сӥзиськом юн тазалык, кузь гумыр, шудбур, каньыл улон.