Удмурт культурая обществолы 25 ар тырмон азьын

1958 арын декабре «Школалэсь но улонлэсь кусыпъёссэс юнматон но СССР-ын калыкез дышетонэз азинтон» Закон потэмен, анай-атайёслы пиналъёссэс школаын дышетон кылэз бырйыны луонлык кылдӥз. Ӟуч кыл улонэ паськыт сюрес усьтэ шуыса, тросэз ӟуч луымтэ калыкъёс, тужгес ик финн-угор калыкъёс, ас кылынызы дышетонлэсь палэнскизы. Татарстан, Башкортостан, Якутия но куд-ог мукет республикаосын гинэ вань предметъёсты дышетонэз вордскем кылынызы ик азьланьтӥзы. Озьы тросэз удмурт школаос анай кылэз дышетэмысь дугдӥзы яке дышетоноосаз но удмурт кылын часъёс кулэстӥськизы, «быдэс дуннее сюрес усьтӥсь» кунсьӧр кыллы сётӥськизы. Удмурт кылмес тодӥсьёслэн лыдзы но таин сэрен чутрак кулэсмиз: 1959 ар- 93,2%, 1970 ар - 87,7%, 1979ар- 82,3%, 1989 ар- 75,7%., 2002 ар - 70%. Вордскем кылмес куашкатӥсь таӵе тулкымъёс асьме пала но шуккиськытэк ӧз кыле. Озьы трос аръёс ӵоже Ципья шоръёзо но Лӧзя(тямыс но шоръёзо) школаосысь начальной классъёсын удмурт кылэз дышетон воксё ӧз нуиськы, дышетыны кутскылӥзы 5(4) классъёсысен гинэ. Ярам-ай, Ӟаны(тямыс но шоръёзо) школаын но районысь ваньмаз удмурт начальной школаосын вордскем кылэз дышетон ӧз дугдылы.

Странаямы 80-тӥ аръёслэн пумаз воштӥськонъёс ортчемен, кылъёс шоры учкон но мукетгес кариськиз. 1990-91 дышетскон арын Ципья, Лӧзя шоръёзо школаосын но нырысетӥ классысен ик анай кылэз дышетонэз выльысь пыртэм бере, Ципья школаысь одӥгез устоез дышетӥсь Елена Васильевна Чакмина, программаос ӧвӧлэн, учебникъёс тырмымтэен, мыным шугъяськонъёссэ вераса вазиськиз, огазе люкаськыса, кенешоно, пе, вал. Та пумысен Ӟаны шоръёзо школалэн директореныз И.В.Ермаковен вераськи, тае со умоен лыдъяз. Та ӵектонэз дурбасьтӥзы РОНО-ысен но. Собере районысьтымы вань удмурт начальной классъёсысь дышетӥсьёс Ӟаны культура юртлэн библиотека кабинетаз люкаськизы. Кенешон кема но пайдаё ортчиз. Татысен монэ районысь удмурт начальной классъёсын дышетӥсьёслэн методикая огазеяськонзылы кивалтӥсь бырйизы, 20 ар ӵоже быдэсъяй та ужме. Оскем уж борды , удмурт кылмес сюлмысен мур гажась мурт, мылысь-кыдысь кутски. Трос пӧртэм ужпумъёс вылэ пыкиськыса, быдэс дышетскон арлы план дасяй, келямы котькуд шоръёзо школае. Со зол герӟаськемын вал удмурт кылмес но культурамес ӝутонэн. Одӥгез бадӟымез ужрад - «Жингырты, удмурт кырӟан!» фестиваль. Ортчытыны чакламын вал кыкетӥ паларе. Программае пыртӥськизы трос куараен кырӟан, оген кырӟан, эктон, юмореска яке кылбур, фольклор, сценка. Школаосысь кивалтӥсьёс, пионервожатойёс, удмурт кылъя дышетӥсьёс вань тодонзэс поныса дасяськизы. Фестиваль 20 феврале 1991 арын пачыл калыкен тырмем Ципья культура юртын ортчытӥськиз. Ӵапак тупаны но кулэ, РОНО-ын ужасьёс сяна, фестивалез учкизы Казаньысь Дышетӥсьёслэсь тодон-валанзэс будэтонъя институтысь методистъёс но. Дышетскисьёслэн сыӵе усто ужрад ортчытэмзылы, куноос вылӥ дунъет сётӥзы. 21 феврале та ик номеръёсын концерт пуктӥзы Ӟаны культура юртын, 27 феврале - Ушма клубын. Лӧзя шоръёзо школаысен со нуналэ кузьмам блокнотсэс али но возисько на. «Азьлане» газетлэн 2 мартэ 1991 арын потэм номераз та праздниклэн мынэмез сярысь рос-прос гожтэ А.М.Кунаев.

Таӵе фестиваль вуоно араз но радъяськиз. Но мукет аръёсы «Жингырты, удмурт кырӟан!» фестивалез Удмурт культурая обществолэн планаз пыртоно карим. Нырысетӥез фестиваль ортчытӥськиз Ӟаны культура юртын 21 феврале 1993 арын. Оген кырӟасьёс пӧлын нырысетӥ инты басьтэм понна монэ дипломен пусйизы но ӝӧквыл час кузьмазы, кудӥз дугдылытэк тани 24 ар ӵоже ветлэ ни. Котькудаз фестивале пыриськыны тыршисько, ас вордскем гуртлэсь данзэ утисько, удмуртлыкез данъясько. Шумпотымон, куинь шоръёзо школаосысь дышетӥсьёсын но дышетскисьёсын мытэм ужмы, азьланьтӥськиз Удмурт культурая обществоен, табере - АНКО-ен.

Котьку мед луоз «Жингырты, удмурт кырӟан!» фестиваль!

В.П.Никитин,

Карек-Серма,

азьвыл Кенешлэн ёзчиез.