Хезмәт

Удмурт пиналъёслэн эшлыко пумиськонзы

Арлы быдэ февраль но март толэзьёс пӧртэм ужрадъёсын узыр луо. Атыкай музъеммес утисьёслэн но Нылкышноослэн калыккуспо праздниксылэсь азьло, 21 тулыспалэ, вань на туж чебер но дуно праздник — Анай кыллэсь нуналзэ пусъён.

Ӧжытак бергес ке но, ӵапак та нуналлы сӥземын вал бадӟым классъёсын дышетскись пиналъёслэн эшлыко пумиськонзы но, кудзэ пиналъёс дышетскон ар кутсконысен ик витьыны кутско ни. Туэ милемыз шуныт пумитаз Шор Кушкет шоръёзо школа. Ужрадлэн валтӥсь мугез вал: туала удмурт егитъёсты ог-огенызы матэгес тодматон, анай кылэз дышетыны мылкыдзэс ӝутон, йырвизьзэс сынан, удмуртлыкез утён но азинтон. Арысь аре сяме пыӵам йылолъя ужрад 3 люкетъёслэсь кылдэ: дорысь уж (удмурт сиён-юонлы презентация, крезьгуро номер), туркымъёслы люкиськыса шудон (интеллектуальной) но позыръяськон (дискотека). Таяз арын тужгес но шумпоттӥз пиналъёслэн командаоссылы тунсыкоесь удмурт ним быръемзы: «Шундыпиос», «Шудо удмуртъёс» но «Визьмо йыръёс». Нош кызьы бен соос йырвизьзэс сыназы?! Огзылэн но бере кылемзы ӧз поты. Ваньзылэн визьмо, тодӥсь но быгатӥсь луэмзы потӥз. Шудон зэмзэ но ӟырдыт вал, нош дискотека — эшшо но. Вань командаослы тау карон кылъёсме вераме потэ тыршемзылы, тужгес но ёросысьтымы удмурт кылъя но литературая дышетӥсьёслы — анай кылмес утисьёслы, озьы ик удмурт анай-атайёслы, малы ке шуоно вераськон кылмы соос вылын возиське. Кылмы быриз ке, калык но быроз. Оскисько, азьланяз таӵе шуныт эшлыко пумиськонъёс эшшо тросгес луозы на шуыса.

Наталия Антонова

Ёросысь удмурт кылъя но литературая дышетӥсьёслэн методической огазеяськонзылэн кивалтӥсез

Туспуктэмъёсыз авторлэн

Реклама
Нравится
Поделиться:
Реклама
Комментарии (0)
Осталось символов: