Удмуртсэ но, бигерзэ но газетъёсты огкадь быгатӥмы бичаны

Карлыган школаез йылпумъяме бере атай монэ ыстӥз Малмыже пчеловодлы дышетскыны. Отчы мынэме уг поты вал, бӧрдыса ке но, мынӥ. Атай туж юн сямо вал, солэсь кылзӥськытэк ӧйлась. Дышетсконме быдтыса бертэм бере мыным шуиз: «Кызьы тон, егит нылмурт, нюлэскын огнад пасекаын ужалод?» Пчеловод луыса ужаны ӧз лэзьы, школаын лаборант луыса ужаны интыяськи.

Вукогуртэ ӵужанай доры куное ӵем ветлӥсько вал. Отысен ик тодматски Кондратьев Николаен но 6 ар ӵоже кыстӥськиз эшъяськонмы, сое тросэз тодо Кани Коля шуыса. Со ик ӵектӥз: «Маша, типографие ужась кулэ, мынод-а?» Таяз учыре атайлы вератэк «Азьлане» газетлэн типографияз уже интыяськи. Ученик луыса кутски ужаны, ваньзы монэ дышетӥзы, котьку юрттӥзы. Нырысетӥ уждунлы бадӟым сумка тыр пӧртэм сиёнъёс басьтыса дорам бертӥ. Атайлы та кельшиз, ӧз ни тышкаськы. 1960-1962-тӥ аръёсы ужай Балтачын, 1962-1965-тӥ аръёсы Арскын, 1965-тӥысен нош ик Балтачын. «Азьлане» газетэз Арске выжтэмзы бере ӝыны ар гинэ ужаса вуи, ӵектӥзы Арскын ужаны — техник-пчеловод луыса, нош мон сопала-тапала ӧй шонаськы ни типографие ик кыли. Улӥмы Ципьяысь Барышникова Аляен одӥг песянай дорын. Дорам бертылӥ нялтас ветлӥсь бензовозэн. Арскын 4 кузя гинэ ужамы. Аля, мон, ӟуч ныл но бигер ныл, таосызлэсь нимзэс но вунэтӥ ини. Бигер газетэз но бичай, нош «Азьлане» газетэз, кулэ дыръяз, ӟуч но бигер нылъёс бичазы. Нырысь-валысь, ой, трос ошибкаос лэсьтылӥм! Берло ваньмы дышимы бигерзэ но, удмуртсэ но газетъёсты бичаны. Корректормы Зина Ильина Арске ик кылиз улыны.

Вить но ӝыны ар «Азьланеын» ужай. Собере Колялы бызи. Со йылпумъяз Ижевскысь Сельскохозяйственной институтэз. Пётр Николаевич Кубашев (Ципья школаын Коляез дышетэм) сое дэмлаз Алнаше «Алнаш колхозник» газетлэн редакцияз сельхозотделын ужаны. Мон но отын вить арлэсь трос наборщицаын ужай. Куддыр печатникъёс газет полосаосты юнматыны вунэтыса машиназэс лэзьыны шедьто вал. Шрифтъёсты быртыкен-быртыкен бичаса печатланы дасям полосаосмы выж вылэ кисьтӥськылӥзы. Таӵе учыр бӧрдымон шугадӟон луылэ вал ми понна. Газет поттон уж азьвыл капчи ӧй вал, ужан условиос уродэсь, вентиляциос гинэ но ӧй вал. Трос аръёс ӵоже свинец парен но тузон-пырыеныз шокаса чиньыосы висьыны кутскизы, ёзвиосыз но зӧкомизы.

Коля 60 аресэн инфаркт луыса кулӥз. Солэсь кылбуръёссэ, очерксэ но трос мукет гожъямъёссэ утьыса возисько. Печатласькизы солэн ужъёсыз «Советской Удмуртия» газетын но «Молот» журналын. Роман пие искусствоосъя школаын ужа, нылпиосты струнной инструментъёсын шудыны дышетэ. Витя пие но нылпиосын ужа, со судомоделированиез нуэ.

«Азьлане» газетын азьвыл ужамъёсты но али ужасьёсты сюлмысьтым ӟечкыласько газетлэн юбилееныз. Сӥзисько улонады яркыт нуналъёс но ваньзэ ӟечсэ гинэ. Газетэз лыдӟисьёс пумтэм трос мед луозы.

Мария Лобанова-Кондратьевалэсь верамзэ гожтӥз В. Пашкеева

Алнаш черкогурт