Ӟугез кысконо луоз ваньмылы ӵош

Улмопу ас вайёсаз

Улмозэ кельтэ,

Эмезь ас выжыяз

Эмезьпу ик будэтэ.

Нош малы-о асьмеос,

Востэм, ужась удмуртъёс,

Кельтӥськом палэс муртмес

Ӟучо-удмурт нылпимес?

Ю.Байсарова

«Ноябрьлэн кӧня ке нуналаз но декабре гинэ ужаса вуттӥмы, — шуиз Ольга Пчельникова, «Кенешлэн» тӧроез луыса ужаны кутскемез сярысь веракуз. — Ми понна со ваньмыз выль маке вал, но озьы ке но со уж нуиське вылэм ни».

2020 арын элькунысь удмурт НКА-ос ньыль ӧръя ужаллям. Нырысетӥ но кыкетӥ ӧръёс чакламын нылпи садэ ветлӥсь но школаын дышетскись нылпиосын но соослэн анай-атайёсынызы ужанлы, соослы удмурт лулчеберетэн, кылэн тунсыкъяськон мылкыд пыӵатонлы но анай-атайёслэсь тунсыкъяськонзэс будэтонлы. Куинетӥез ӧр — со егитъёсын ужан, шонергес вераса, дышетскись студентъёслэсь но ужась егитъёслэсь удмурт лулчеберетэн но сям-йылолъёсын тунсыкъяськон мылкыдзэс азинтон. Нош ньылетӥез ужан ӧр огъя луэ — удмурт лулчеберетэз азинтон но калык пӧлы паськыт вӧлмытон. Студентъёс но ужась егитъёс пӧлын удмуртлыкез утёнъя ужрадъёс трос ӧвӧл ке но (азьпалан соослы саклык тросгес висъяськоз шуыса оскомы), огъя басьтоно ке, ваньмызъя та ӧръёсъя асьме дорын но уж нуиське. Пандемиен сэрен кылдэм секыт югдуре но удмурт ужрадъёсты онлайн амалэн ке но ортчытыны, сыӵе ужрадъёсы пыриськыны тыршимы. Удмуртлыкез, удмурт кылэз но лулчеберетэз утьыны, азинтыны тыршиськомы кадь, но…

«Ваньмыз умой кадь. Ужрадъёс но ортчытӥсько, вань вормонъёсмы но. Но кӧня ке дыр ортчыса, со вормонъёс ышозы шуыса кышкытлык кылдэ. Малы ке шуоно асьме нылпиос тросэз уг ни верасько удмурт сямен. Нош нылпиос удмурт сямен уг верасько бере, кыӵе соослы, кылсярысь, удмурт кылъя но литературая олимпиадае, пӧртэм конкурсъёсы пыриськон?», — сюлэмшугъяськонзэ вуттӥз Ольга Пчельникова.

Та ласянь нылпи садъёсын кылдэм югдур эшшо но сюлмаськытэ. Нылпи садъёсын, кытын ог дас ар талэсь азьло пиналъёслэсь удмурт кылын вераськемзэс кылыны луэ вал али, туннэ нуналэ чылкак мукет суредэн пумиськиськод: удмурт гуртъёсысь нылпиос ваньзы сямен ӟучен гинэ верасько. Удмурт компонентэн Сырья, Ӟаны, Ярак-Чурма, Вылын Ушма нылпи садъёсын гинэ но, кудаз уногес, нош кудаз ӧжытгес, сыӵе югдур адӟиське. «Азьло ӟуч кылысь удмуртэ берыктыса дышетӥськом вал, нош табере удмуртысен ӟуче берыктыса валэктыны тупа», — шуэ, тае юнматыса, одӥг тодмо визьнодасе. Чылкак удмурт луэм гуртын но пиналъёс ӟучен верасько бере, мазэ витёно суро гуртъёсын улӥсь нылпиослэсь. Тани, кылсярысь, Покчи Лӧзя но Ципья нылпи садъёсты верано ке, кыкез но соос ӟуч визьноданэн садикъёс шуыса лыдъясько, Покчи Лӧзя поселение но, Ципьяе но тросэз удмурт гуртъёс пыро ке но. Малпано ке, таосты но этнокультурной компонентэн нылпи садъёс пӧлы пыртыны луэ кадь…

Кылсярысь, со ик Покчи Лӧзя нылпи садын бигер кылъя занятиос вань. Вераны кулэ, нылпиослы со занятиос туж кельшо. Малы? Валтӥсь мугез, мазэ веранэз,  визьнодасен герӟаське, дыр. Визьнодась нылпиосты тунсыкъяськытыны быгатэ, озьыен, со ас бордаз кыскыны быгатэ. Нош тунсыко но яркыт наглядной материалъёс солы пичиослэсь тунсыкъяськонзэс эшшо но пуромытыны юртто, капчи но валамон кылын, шудон амалъёсын нуиськись занятиос пиналъёслы мылкыдзыя луо. Сыӵе ик тунсыко занятиос удмурт кылын но луысалзы ке, асьме нылпиослы ӧй кельшысалзы шат? Вань ведь удмурт кылын но чебер наглядной материалъёс, книгаос, пӧртэм тунсыко ӝӧквыл шудонъёс вань…

— Садикын удмурт кылын занятиос луыны кулэ шуыса малпасько мон. Нылпи — со губка кадь ук, мынам валамен: тани со али удмуртэн вераськиз, нош соин удмуртэн одӥг-кык толэзь ӧд ке вераськы, со ӟуч сямен вераськоз ини, — азьланьтэ веранзэ Ольга Мироновна.

— Но котьма ке но, нылпиослэн удмурт кылын вераськымтэзылэн мугез садик бордын ӧвӧл, мугзэ семья бордысь утчано, — шуэ Ципья шоръёзо школаысь удмурт кылъя но литературая дышетӥсь Ираида Чернова. — Татын нырысь ик анай-атайёслэн примитивной малпанзы инты басьтэ. Садик пыр ми но потӥмы, но доре бертыса удмуртэн вераськимы. Анай-атайлэн, верано ке, али нылпиен выремез уг поты, нылпи анаен-атаен уг буды, будэ телевизорен но телефонэн. Нош пинал пичиысен ик удмурт кылын ӧз ке вераськы, берло со уз ни вераськы.

Зэм, та веранэн споръяськыны уг луы: котькызьы бергаты, но нылпиослэн анай кылынызы вераськымтэзылы, тодымтэзылы яке чылкак гажамтэзылы асьмеос ик, анай-атайёс, янгыш. Ӵемысь пӧламы сыӵе суред но пумиське: семьяын кык нылпи, одӥгез тодэ анай кылзэ, нош мукетыз — уг. Чылкак паймымон. Татын кыӵе муг?..

Эшшо пример: «Мынам нылпиосы быдэсаксы удмурт сямен верасько, Гондыргуртэ, Ярак-Чурмае мыно ке, ӟучен верасько», — шуэ паймемзэ ватытэк Балтасьын улӥсь Сергей Григорьев. Зэмзэ но, паймоно кадь: Балтасьын бигер калык пӧлын улыса нылпиос удмуртэн верасько (со дыре ик бигерзэ но, ӟучсэ но тодо), нош удмурт гуртын соосын удмуртэн вераськыны удмуртъёс уг шедё. Кызьы талы уд паймы. «Ӝоген удмурт гуртъёсмы историын гинэ кылёзы удмурт луыса, соос чылкак ӟучлы пӧрмозы ни», — шуэ Наталия Львовна. Бен, песянай-песятайёс кытчы учко?

 «Песяйёс асьсэос внукъёсынызы кылзэс тӥяса-тӥяса ӟучен верасько,» — шуэ Ольга Мироновна, та юанлы ответ сётэм выллем.

«Песяйёслэн кыӵе валанзы: ӟучен дышетскиз ке, пинал усто луэ», — ватса на Василий Никитин.

Зэм но, нылпиосты визьнодан ужын котьку но песяй-бабайёс бадӟым инты басьтӥзы. Ӵапак соос пиналэз калык сямъёсын но йылолъёсын, улонысьтызы пӧртэм тунсыко учыръёсын, выжыкылъёсын тодматыны, пичи дырысьтызы шудонъёссылы дышетыны, вордскем кыллы, вордскем музъемлы яратон пыӵатыны кулэ кадь. Соин но туж умой луысал песяй-бабайёс анай-атайёслы, пиналъёссылы шонер лулчеберет, визьнодан сётыны, удмурт кылмес гажаны, со кылын возьдаськытэк вераськыны юрттысалзы ке. Ведь котькудӥз кыл ас понназ чебер, котькудӥзлэн аслаз аспӧртэмлыкез. Кыл тодэм та дырозь нокинлы но люкетымтэ, юрттэм гинэ.

Гажано песяй-бабайёс, анай-атайёс, оло, тӥляд тыршемдылы луыса «малы кулэ со удмурт кыл?» шуисьёс пӧламы ӧжытгес кыльысалзы…

Пиналъёсмылы удмурт кылмес дышетонтэм трос муг шедьтыны луэ, дыр. Кинлэн уг поты, кин ке кулэ уг кары, мукетыз суро семьяын будэмзы вылэ чӧлске, кин ке туала компьютер технологиосты янгыше уськытэ но мукет. Бен, ваньмызлэн но влияниез вань, дыр. Та сярысь трос вераны луоз, но озьы ке но пумаз-йылаз ум потэ. Котьма ке но асьмелэн валтӥсь ужпуммы туннэ нуналлы — калыкмы чылкак медаз быры шуыса, анай кылмес, лулчеберетмес но сям-йылолъёсмес утён. «Кытын тӥ, удмуртъёс?» шуыса, удмуртъёсты сюсьтылэн утчаса ветлон югдуре медам кыле вал...

Тодмо тодосчи М.Атамановлэн таӵе кылъёсын вазиськонэз вань:

«Удмурт калык пӧлысь ас кылзэ кулэтэм карись одӥг анай-атай но медаз поты вал. Одӥг мурт но анай кылызлэсь кепыраса, возьдаськыса медаз улы, ас кылызлы яратон-гажан пыӵатыса, удмурт калык нылзэ-пизэ мед будэтысал. Удмурт калык пӧлысь манкуртъёс медаз потэ вал, пӧламы зомбиос медаз луэ вал. Асьсэды англо-саксон но медаз каре вал, ӵыжы-выжызэс кулэтэм карись иванъёс асьме пӧлысь медаз потэ вал.

Ас кылзэ кулэтэм карись мурт Инмарлы ярамон ӧвӧл, сыӵе адямиез Инмар но, одӥг калык но уг ярато. Удмурт калыкез та сьӧлыкъёсыз котырысьтымы калыкъёслэн син азязы чебер, йӧно уг каро… «Анай кылдэ тодон пуйы уг куры», — шуо калыкын. Тод ӟучсэ но, бигерзэ но, финзэ но. Али дыре одно ик тодыны кулэ англи кылэз. Улон отчы мынэ: быдэс дунне, уката ик туала улонэн кивалтыны кутскись компьютер, англи кылын верасько. Но кинлы, маин люкетэ вордэм удмурт анай кылмы?

Нокинлы но уг. Со ошмес ву кадь дун-чылкыт, быдӟым крезь сиос вылын кылдэм чур кадь небыт но жингрес, чечы кадь ческыт, Кам шур кадь паськыт но мур. Кулэ ке луиз, та кылын тушмонлы пезьдэт сётэмед луоз — со асьмелэн узыр. Мусо туганъёсыдлы ӟечсэ верамед потӥз ке, вера, кӧня верамед потэ — лякыт, чебер но тау карон кылъёсмы трос.

Мусо анай кылы! Та виын тон доры туж секытэсь адӟонъёс вуизы. Но тон чида. Нюръяськы. Эн сётӥськы сьӧд кужымъёслы, тонэ быдтыны, сылмытыны малпасьёслы. Мон тонэ туж яратӥсько, аныкай кылы…»

Ольга Плотникова

Ольга Пчельникова

Наталия Антонова