Хезмәт

Балтач районы

18+
2024 - Гаилә елы
Азьлане

«Улонам самой валтӥсез — семья. Соос понна ик тыршиськод, улӥськод ук»

Гуртын улӥсьёслэн лыдзы арысь аре ӧжытгес но ӧжытгес луэ шуо. Зэм ик озьы меда со? Та сярысь юн оскыса вераны но уг луы, дыр, малы ке шуоно котькуд улосын, котькуд городын но котькуд гуртын вань аслаз луонлыкъёсыз но тырмымтэосыз, огъя вераса — «плюсъёсыз» но «минусъёсыз».

Но вань сыӵе егитъёс, кудъёсыз улонлэсь шӧмзэ, улонлэсь пуштроссэ уксё но каньыллыкъёс бордысь гинэ уг адӟо. Соос понна гуртлэн чеберлыкез, анай-атайлэн но ас вордскем но будэм интызы тужгес но матын луо. Сыӵе адямиос городысь каньыл улонлэсь куштӥськыса, гуртэ улыны берто. Асьме районамы одӥгез сыӵе адями — Карек-Сермаысь Игорь Игнатьев.

Игорь Игнатьев — «Бурнак» обществоын механизатор луыса ужась егит воргорон. Балтась районамы вордскыса, татын аслэсьтыз пинал дырзэ ортчытыса, яратонзэ пумитаса, Игорь Ижевске выже. Но отчы кемалы уг кыльы со — выльысь аслаз вордскем гуртаз бертэ. Гуртын, колхозын, ужез капчи ӧвӧл ке но, куддыръя (тужгес но гужем бусы ужъёс дыръя) вазь ӵукнаысен уйинозь ужаны тупа ке но, аслэсьтыз ужзэ мылысь-кыдысь, яратыса быдэсъя со. «Ма, времаяз уксёзэ сётӥзы ке, малы уд быдэсты», — серекъя та сярысь ачиз Игорь. Егит воргорон понна тужгес но валтӥсез луэ ук со — дыраз уксё басьтон но семьядэ утён. Соин но ужзэ курласа одӥг но уг вера Игорь. Азьло, Ижевскын улыкуз, со мебельной производствоын но ужам вылэм ни. Али нош тани — механизатор. Паймоно кадь — городын воксё мукет удысын ассэ эскерем вылэм Игорь. Ма гуртысь пиос тросэз сыӵе ук — кыӵе гинэ уж борды уг басьтӥсько, ваньзэ быдэстыны быгато. Колхозысь ужано техниказы вуж ке но, егит воргорон соизлы но уг ӝожтӥськы — ужась мурт ужа, пе.

Туала дыре тросэз егитъёс гурт ужлэсь кышкало, городэ пегӟо. Нош Игорь гуртэ бертоно карем, малы ке шуоно солы аслаз вордскем палъёсыз туж мусо пото вылэм. Соин ик Карек-Сермае, аслаз вордскем гуртаз,  бертэм. Котьма ке но, гуртын трослы шулдыргес ук — татын тынад чылкыт омыред но, чебер инкуазед но «ныр улад»... Городын луонлыкъёс тросгес шуыса верасьёс вань. Бен, соиз озьы но, дыр. Нош адями кулэ кариз ке, гуртын но маин гинэ тунсыкъяськыны но вырыны уг быгаты!

— Соиз зэм, — соглаш луиз монэным Игорь. — Мон тани, кылсярысь, кылем арын «Кенеш» НКА-лэн 25 ар тырмемезлы сӥзем концертэз нуись луи... Нырысь зональной этапез гуртъёсын ортчиз, мон асьме гуртамы концертэз нуи, отысен ини монэ адӟыса, гала-концертэз нуыны ӵектӥзы. Озьы тӥни луыса потӥз со. Ми тани, гуртын егитъёсын туж шулдыр дырмес ортчытӥськомы, вань кадь праздникъёсы люкаськиськомы — 23-тӥ февраль, 1-тӥ май...

Тӥни сыӵе шулдыр, сюлмаськонэз, кайгуэз тодӥсьтэм но шудо луыны быгатэ гуртын улон! Со понна мылкыд карон гинэ кулэ — котьку юлтошъёсыныд, ӵыжы-выжосыныд люкаськыса шутэтскыны быгатӥськод, вань каньыллыкъёс бакча сьӧрын гинэ.

Котькуд пиосмуртлы писпу мерттыны, корка пуктыны но пи будэтыны кулэ шуо. Та малпанэн Игорь но соглаш луиз. «Писпу мерттӥ ни, нылпие будэ, кылдэм ке корка пуктӥ ке, сюлмам шуныт пыроз» — вакчияк ответ сётӥз со та юанлы. Ужамез сяна, Игорь кырӟаны но эктыны туж яратэ на. Мероприятиосэ мылысь-кыдысь пыриське. «Ма, ӧжытак юид ке, котькинлэн но озьы дыр ни со», — шуиз серекъяса воргорон. — Мызганэн но тани ачим шудыны дышетскисько али, гитараен но шудыны быгатӥсько (Игорь ачиз шудыны дышетскем, сое нокин но дышетымтэ — Н. Ж.). Кызьы ӟучъёс верало: «Век живи — век учись». Сыӵе девизэн улӥсько мон».

Ӵемысь сыӵе девизэн уло сыӵе адямиос, кудъёсыз улонлэсь шӧмзэ, пуштроссэ валаны кутско ини... Ачид сярысь озьы вераны быгатӥськод-а? Армие но мыныса бертӥд шуыса тодӥсько. Кыӵе войскоосын служить карид? — юасько.

— Срочкаез (срочная служба в армии — ред.) Дальний Востокын служить кари автобатын (автомобильные войска — ред.), 9 толэзь «камазэн» ветлӥ. Собере Ижевскын внутренней войскоосын арен ӝыны контрактэн служить кари. Собере ини мебельной производствое ужаны интыяськи. Ижевскын улыкум ик кышнояськи, нош берло гуртэ бертӥмы. Бен, ачим сярысь троссэ адӟи ни шуэме уг луы ке но, ӧжытак улонлэсь шӧмзэ озьы ке но валасько. Но котьма ке но, улонам самой валтӥсез — семья. Соос понна ик тыршиськод, улӥськод ук, — шуиз Игорь.

Зэмос воргоронлэн кылъёсыз та. Семьяез понна сюлмаськыса улӥсь пиосмурт котькин понна адӟем карымон, гажамон луэ. Игорь сярысь гуртоосыз но, эшъёсыз но озьы ик верало. Котьку юрттыны дась луись, аслэсьтыззэ но жалятэк сётӥсь егит воргоронэз зэмзэ но вань гуртэн гажало. Азьпалан но озьы ик мед луоз!

 

 

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: егитъёс