Ужам понна уждун басьтоно

Районлэн территорияз интыяськем предприятиосын ужъя законъёслэсь, кылсярысь, уждун тыронэз, озьы ик пенсиосъя законъёслэсь, тазалыкез утёнъя, дышетонъя но гурт хозяйствоя тужгес ик национальной проектъёсты улонэ пыӵатонъя куронъёслэсь быдэсъяськемзэс эскерон выллем важной ужпумъёс пуктэмын вал прокуратураын ужасьёс азе. Террористической но экстремистской ужрадъёслы пумит чаклам, интыысь бюджетъёсты кылдытыку законъёсты быдэстонэн герӟаськем ужпумъёс но саклык висъян улсын луизы. Ортчем 2013-тӥ арын прокуратуралэн эскеронъёсызъя 1624 закон тӥян учыр шараямын вал, соин сэрен янгыш луэмъёслы законэн чаклам ужрадъёс кутэмын.

Самой уноез закон тӥян учыръёс социальной удысын пусъемын, шонергес вераса, ужъя законъёсты тӥянэн герӟаськемын. 2013-тӥ арын 574 таӵе учыр шараямын. Соос пӧлысь нимаз ик ӵем пумиськисез уждун тырон порядокез тӥян луэ, мукет сямен вераса, уждун тыронэз ӝегатон, яке дыраз тырымтэ, уждунлэн быдӟалаез минимальнойлэсь но ӧжыт луэм, аванс тырымтэ, ужысь мозмытӥськыкуз ужасьлы дыраз расчёт лэсьтымтэ но мукет сыӵе учыръёс. Кылем арын Тукай нимо, «Якты юл», «Тепло» обществоосын, куд-ог бюджетной организациосын уждун ӝегатон учыръёс луизы. Уж сётӥсьёс, ужам ужлы тырон дыр сярысь законэз гинэ ӧвӧл, правительствоенымы юнматэм «Ужам ужлы тыронэз утён сярысь» 95-тӥ номеро конвенциез но тӥяло. Кылем арын судэ 866 сюрс манетлы суд приказ сётон сярысь 249 заявление лэземын. Туннэ нуналэ соос ваньмыз но эскеремын но кулэезъя быдэстэмын. Шараяськем фактъёсъя кивалтӥсьёслы ужрадъёс кутэмын, ужасьёслы уждун тыремын.

Прокуратуралэн эскеронъёсызъя куд-ог хозяйствоосын ужам уж понна минимальнойлэсь но ӧжыт уждун тырем учыръёс шараяськизы. Таӵе учыръёсы но ужасьёслэн правооссы утиськизы, янгыш луэм кивалтӥсьёс административной кылкутытонэ кыскемын.

Уж сётӥсез уж понна тырон законъёсты тӥянэ вуттӥсь валтӥсь муг - со предприятилэн секыт финансовой югдурез. Но та кивалтӥсьёс законлэн куронъёсызлэсь палэнскыны быгато шуэм кыл ӧвӧл. Ужам понна кулэезъя но дыраз тыроно. Нош со кивалтӥсьлэн инициативной, ужез умой валась луэменыз но герӟаське.

Озьы ик гражданъёслэсь вуэм заявлениосъя но уж сётӥсьёслэн ужъя законъёсты тӥямзы шараяське но соослы ужрадъёс кутӥсько. Кылсярысь, кылем арын потребительёслэн «Хлеб» обществоысьтызы ужысь кошкыку дыраз расчёт лэсьтымтэен герӟаськем кӧня ке вазиськон луыса, прокуратура кулэ ужрадъёсты кутӥз.

Газет лыдӟисьёслы тодазы вайытон вылысь вераме потэ: ужам уждылы тыронъя правоосты тӥямын вылэм, тӥ асьтэос но, судэ вазиськыса, правоостэс утьыны быгатӥськоды. Нош судэ вазиськымон юридической тодон-валанды но дырды ӧвӧл вылэм, прокуратура органъёсы заявлениен вазиськыны эн кышкалэ. Ми котьку но тӥлесьтыд праводэс утиськом.

Фото: http://old.prokrt.ru/plan/2011godsvplan