Валтӥсь ужпум — ӵошен луыса, ог-огмылы юрттыса, удмуртлык понна тыршон

Туэ куамын ар тырмиз асьме ёросысь удмуртъёслэн «Кенеш» (2000-тӥ арозь — Удмурт культурая общество) огазеяськонзылэн кылдэмезлы.  1992-тӥ арысен кутскыса та обществоен ёросысь одӥгез удмурт азьветлӥсь Александр Кунаев кивалтӥз, собере кема аръёс ӵоже та ужез нуиз Леонид Сапожников, берлогес — Владислав Никитин. Нош 2020-тӥ арысен та мерлыко ужез Ольга Пчельниковалы оскизы.

Ольга Мироновналы «Кенеш» огазеяськонлэн кылдэмез дырысен солэн ужез тодмо ини. Малы ке шуоно со 1992-тӥ арысен «Кенеш» огазеяськонлэн членэз луэ, нош 2020-тӥ арысен шуркынмон толэзьысен сое та огазеяськонлэн тӧроезлы тодмосто. «Кенешлэн» туннэ нуналэ ужамез сярысь, шуг-секытъёсыз но азинсконъёсыз сярысь, кылем арын ортчытэм ужрадъёссы сярысь — ваньмыз та Ольга Пчельниковаен сётэм интервьюын.

— Ольга Мироновна, «Кенеш» ини куамын ар ӵоже ужа, солэн ужамез син азьын. Тӥ асьтэос али кема уд ужаське ке но, ужаны кутскемды дырысен кыӵе ке но выльдӥськонъёс, воштӥськонъёс сярысь вераны быгатӥськоды-а? Секыт вал-а тӥледлы та ужлы дышыны?

— Зэмзэ верано ке, та ужлэн ӧраз пырыны гинэ дышисько али. Кема аръёс ӵоже огазеяськонлэн уженыз тодмо вал ке но, кивалтон — со мукет уж. Дышыны но капчи ӧй вал. Мынам малпамея, та тросгес культураен герӟаськем уж. Мукет ёросъёсысь удмурт огазеяськонъёссылэн тӧроосынызы пумиськыса, тае валаны луэ. Соос пӧлын тросгес завклубъёс, библиотекарьёс. Соослэн асьсэ коллективъёссы вань, соос со коллективен олокытчы но потыло, асьсэ ужзэс умой возьматыны быгато. Мон ачим тани Покчи Лӧзяысь «Вуюись» коллективе ветлӥсько. Быгатэммыя, пыриськиськомы ужрадъёсы. Гырон быдтонэ но ветлӥськомы, кылем арын Агрызэ но мынӥмы, солэсь азьло (мон соку кивалтӥсь ӧй вал али) Бавлые ветлӥмы, Мамадыше. Ми, валамон ини, Наталия Антоноваен (со мынам юрттӥсе) удмурт кылъя но литературая дышетӥсьёс бере, дырын-дырын ужрадъёсты ортчытъяськомы ке но, соослэн тросэз школаосын ортчо. Соин населениен, калыкен ужаны котьку дырмы уг луы. Со ласянь секыт шуысал. 

— Озьыен, ужады пӧртэм арлыдысь адямиосты кыскон понна, тӥляд специализациды сюбеггес?

— Озьы шуысал. Ми, дышетӥсьёс, тросгес нылпиосын ужаськомы, нош, кылсярысь, библиотекаын яке клубын ужасьёс — пӧртэм арлыдъем населениен, пичиеныз но, бадӟыменыз но ужало. Соослы капчигес шуыса малпасько. Нош тани милемлы адямиез кыӵе ке ужрадэ кыскыны туж секыт — кин ке ласянь ужано, ёросэз кысконо. Вылаз ик туала дыре адямиослэн нокытчы пыриськемзы уг поты. Ваньмыз ас семьяяз выемын.

— «Кенешлэн» тӧроез но тӧролэн юрттӥсез сяна, трос кузя членъёсыз но вань ук. Тодэмея, со пӧртэм поселениосысь представительёс. Соосын валче кенешыса, ог-огдылы юрттыса ужаськоды-а? Нялтас вераса, «Кенешлэн» членъёсыз сярысь кыл потэм бере, лыдӟисьёсты соосын но ӧжытак тодматомы.

— «Кенеш» огазеяськонлэн членъёсыз луо асьме ёросысь ик удмуртъёс. Со пӧртэм удысъёсысь адямиос — дышетонысь, лулчеберетысь, вань пенсионеръёс но. Тани соос, туннэ нуналэ «Кенеш» огазеяськонлэн членъёсыз: Андреева Ольга, Антонова Наталия, Григорьев Сергей, Грахов Константин, Евдокимова Галина, Камаев Виктор, Камаев Виталий, Колоколов Николай, Михайлова Лариса, Никитин Владислав, Никитин Василий, Николаева Ольга, Петров Николай, Плотникова Ольга, Плотников Николай, Сапожников Леонид, Трокова Ольга, Фомина Людмила, Чернова Ираида, Щербакова Светлана. Та ёросысьтымы пӧртэм поселениосысь адямиос. Озьы бере, котькуд удмурт гуртэн герӟетмы вань шуыны луэ. Котькуд гуртысь адями юанзэ вуттыны быгатэ. Нош тани вань-а сыӵе юан вуттӥсьёс — таиз ини мукет вераськон. Туж ик вуттэмзы уг поты. Зэмзэ верано ке, туж ик люкаськыны но уг луы. Мон кивалтыны кутскем дырысен куинь пол гинэ люкаськимы. Зэмзэ верано ке, люкаськонъёсамы но кӧня ке членъёс гинэ пырисько. Одӥг ветлӥсез ветлэ, мукетыз — уг. Та ведь общественной уж. Адямилэн аслаз кулэ каронэз, мылкыдыз ӧвӧл ке, сое нокызьы но кыскыны уг луы. Но тани туэ гужемозь люкаськыны планъёсмы вань. 

— Шонер валай ке, «Кенешлэн» членъёсыз пӧлын егитъёс воксё ӧвӧл… Тӥляд малпамдыя, та шонер-а?

— Зэмзэ но, пӧламы егитъёс ӧвӧл. Малпасько, ужмы борды тросгес егитъёсты кыскыны кулэ шуыса. Соослэн малпанъёссы но ведь мукет, туала. Люкаськонамы та юанэз ӝутыны малпаськомы. Оло, «Кенешамы» выль членъёс но луозы. Сыӵе юанъёсты ми, НКА-лэн членъёсыз, асьмеос люкаськыса эскериськомы.

— Егитъёс ке луысалзы, оло, асьтэлы ужаны капчигес луысал — мар шуид ке но, пӧртэм социальной вотэсъёсын но ужамдэс возьматыны быгатысалды. Егитъёс та уж борды мыло-кыдо басьтӥськысалзы, дыр. Выль идеяос, малпанъёс ӵектысалзы.

— Милям Вконтакте социальной вотэсын «НКА удмуртов Балтасинского района» шуыса нимаськись огинмы вань. Со группа усьтэм, котькуд мылкыд карись адями отчы пыриськыса иворъёсын тодматскыны быгатэ. Но, жаляса вераны кулэ, туннэ нуналлы отын ваньзэ-ӧвӧлзэ куамын адями гинэ. Со группаез Наталия Антонова нуэ, мынам воштӥсе. Веранэз ӧвӧл, улон сьӧры вутсконо, Вконтакте вотэсын гинэ ӧвӧл, мукет вотэсъёсын но ужез возьматоно. Но адями мед валасал: та уж мынам но Наталия Львовналэн ужмы гинэ ӧвӧл. Со группаын клубын ужасьёс но, мукет школаосысь ужасьёс но асьсэ ужамзэс мед возьматысалзы. Сое радъяны секыт ӧвӧл ук. Кыӵе умой луысал, куке одӥг группаын ёросысьтымы пӧртэм гуртъёсысь иворъёсын, выльдӥськонъёсын тодматскыны луысал. Тани ми котькуд кварталлы быдэ Казане лэсьтэм ужъёсмы сярысь отчёт лэзиськомы. Со отчётамы тросаз учыре школаын ортчем ужрадъёс сярысь гожъямын луэ, малы ке шуоно ми ум тодӥське, мукет гуртъёсын кыӵе ужрадъёс ортчыло.  Совещание люкаськыку, та юан пумысен но вераськыны кулэ. 

— Вятской Полянаын арлы быдэ ортчыто «Бускельёсын пумиськон» удмурт фестиваль, Кукмор ёросын сяме пыриз «Эктон дыр» удмурт эктонъёслы сӥзем фестиваль-конкурсэз радъян. Асьме ёросмы та юан ласянь бускельёсмылэсь берегес уг кыльы-а?

—  Тани кылем арын ми, ёросысь удмуртъёслэн но ӟучъёслэн НКА-оссы, «Эшъяськонлэн ошмесэз» конкурсэз ортчытӥмы. Отчы нылпи садэ ветлӥсь нылпиос но, школьникъёс, бадӟымъёс но пыриськизы. Та конкурсэз туэ ноябрь-декабрь толэзьёсын ортчытыны малпаськомы, кылем арын апрель толэзьын вал.  Кылем арын та конкурс ёрос масштабен гинэ ортчиз, но сое мукет ёросъёсты ӧтьыса бадӟымгес уровенен но ортчытыны луысал. Вылаз ик район пумит уг луы сыӵе ужрадъёсты ортчытыны, соос юрттыны дась. Но адямиез кыскыны секыт.

— Асьме удмуртъёс пассивноесь соку?

— Пассивной. Малы ке но асьсэ мылпотэменызы «сое каромы, тае радъяломы» шуыса мылкыдзэс уг вутто. Верасько ук, Вконтакте группаямы но пыриськемзы уг поты. Уг тодӥськы, маин со герӟаськемын. Со ик Вятской Полянаысь удмуртъёсын ӵошатыса, асьмеос лыдъя тросгес, нош соос ӧжыт. Соин соослэн йӧскалык асваланзы тросгес-а мар-а.

— Ольга Мироновна, кыӵе удмурт лулчеберетэн/кылэн герӟаськем шӧдскымон бадӟым ужрадъёс ортчизы кылем арын ёросамы?

— «Эшъяськонлэн ошмесэз» конкурс сярысь верай ини. Кылем арын тани «Мудорвай» куинь зонаын но — Ципьяын, Ӟаныын, Покчи Лӧзяын — ортчиз. Вормисьёс Казане но мынӥзы, туж умой кузьымъёс басьтӥзы. Удмуртъёс гинэ ӧвӧл, мукет калыкысь нылпиос но мыло-кыдо пырисько. Собере озьы ик удмурт кылъя но литературая олимпиадаос ортчо, тросгес со Покчи Лӧзя школаын радъяське. Республикаямы вормисьёсмы но вань. Таяз дышетскон арын Артемьева Дарья призёр луиз, Ижевскысь но призёр луыса бертӥз. Плотникова Полина республикаын вормись луиз, Ципьяысь Антонова Анна но республикаын вормись, нош Елена Александрова — призёр. Ёрос олимпиада ортчон нуналэ ик «Кылысь — буёлэ» суредаськонъя конкурс ортчытӥськомы. Нылпиослы та конкурс туж кельше. Со  очной форматэн радъяськись районной конкурс, ортчытӥське удмурт кылын. Покчи, шор но бадӟым классъёсын дышетскисьёс пӧлын вормисьёс но призёръёс нимаз шараясько. Нылпиослы удмурт произведениысь одӥг люкет сётӥське, со люкетэз лыдӟыса, соос мае син азязы пукто-адӟо, отын ик суредало. Соослы анай-атай но, дышетӥсь но юрттыны уг быгаты. Та конкурсэз ог вить ар ортчытӥськомы ини. Берло дыре пыриськиськом БУД (Бадӟым удмурт диктант) дышетонъя акцие. Та ужрад но нылпиосынгес ортче. Коньывуон толэзе дышетскись пиналъёсын ик элькун масштабен «Диктант на родных языках» гожтӥм. Шумпотымон соиз: нылпиосмы грамотноесь. Арлы быдэ пыриськиськом «Коррупцилы ӧвӧл» вожвылъяськонэ. Республикаын призо интыосты басьто пиналъёсмы, дуно кузьымъёсын пусйисько.

— Нылпиослы сыӵе ужрадъёс ортчытъямды туж умой. Но тани кыӵе юан кылдэ: школае дышетскыны лыктэм нылпиослэн садикын удмурт кылэз дышетскымтэзы шӧдӥське-а? Та ласянь шуг-секытъёс кылдо-а? Нылпиос садикысен ик удмурт кылэз мед дышетскозы шуыса тӥледлы, ёросысь удмуртъёслэн «Кенеш» огазеяськонзылэн тӧроезлы кадь, вазиськисьёс ӧз луэ-а?

— Нокин ӧз вазиськы. Та ласянь анай-атайёсын валэктон ужъёс ортчытоно. Дышетӥсьёс, кин басьтэ нырысетӥ классэз, сыӵе вераськонъёс нуыны кулэ анай-атайёсын. Вордскем кыл — со ведь анай-атайлэн кылэз. Ми Наталия Львовнаен анай-атайёслы тае валэктыны тыршиськомы. Одӥг гинэ пример верало. Туэ нырысетӥ классэз дышетӥсько мон. «Заяц» удмурт сямен кызьы луэ шуыса юасько нылпиослэсь. Соос мыным «куян» шуо. Коть даслы пилиськы вал отын, йырам вир ик тубиз. Удмурт нылпиос озьы верало ведь сое. Татын кин янгыш? Садикын удмурт кылэз дышетскымтэзы шӧдӥське. Вылаз ик анай-атайёслэн нылпиоссэс удмурт кылэз дышетымтэзы но ас «емышъёссэ» сётэ. Малы ке но асьме калыкмы уг кыстӥськы вордскем кылзэ дышетон борды. Ваньзы сярысь тазьы вераны шонер ӧвӧл, вань пӧртэм адямиос. Кылем арын сӥзьыл Покчи Лӧзя гуртэ удмурт спектакль лыктӥз. Бушын вал со. Котькуд гуртэ спектакль вуоз шуыса азьвыл ик информация лэзимы, афишаосыз но котькытын вал, но озьы ке но спектакле кӧня ке адями гинэ люкаськиз. Мынам йыры кур вал. Озьы ке но, оскеме потэ, адямилэн йырвизяз мар ке но пушъёз, мар ке но воштӥськоз шуыса. Анай-атайёс, песяй-бабайёс асьсэлэсь нылпиоссэс, нунокъёссэс удмурт кылын дышетыны кутскозы шуыса оскеме потэ. Татын нокыӵе кенеш но юрттыны уз быгаты, адямилэн удмурт кылэз дышетскыны кулэ шуыса йырвизяз пыӵамын луыны кулэ. Ми но, «Кенеш» огазеяськон, пӧртэм ужрадъёсты радъяса, ёросысь удмуртъёсынымы юн кусып возьыса улыны но ужаны тыршомы.

— Кенешлэсь 30 аръем юбилейзэ ортчытыны планъёсты вань-а?

— Та сярысь «Кенеш» огазеяськонлэн членъёсыныз люкаськыкумы вераськыны малпаськомы. Туж умой луысал, огъя кужыммес поныса, ми — «Кенеш» огазеяськон, лулчеберет удыс — та ужрадэз радъясалмы ке. Та юан сярысь вераськон луоз али.

— Тау, Ольга Мироновна, вераськемды понна. Азинсконъёс тӥледлы та секыт но кылкутоно ужады, нош 30 аръем юбилярлы — удмурт лулчеберетъя «Кенеш» йӧскалык огазеяськонмылы — сяськаясь кузь гумыр!