Вань-а асьмелэн вуономы?

Та нуналэн валче асьме Балтась ёросамы но ужрадъёс ортчытӥськизы куд-ог школаосын, нылпи садъёсын, лыдӟонниосын. Шор Кушкет шоръёзо школаын нош нимысьтыз бадӟым ужрад — Удмурт кыллэн нуналэзлы но Николай Никифоровлы сӥзем улосвылкуспо конференция — ортчытыны дасясько 6-тӥ толсуре (декабре). Та сярысь газетмылэн одӥгаз вуоно номераз лыдӟоды. Удмурт кыллэн нуналэныз герӟаса интернет вотэсъёсын но тунсыко ужрадъёс, акциос радъясьёс луизы. Нош та статьяын удмурт кыллэн туннэ нуналэ асьме улонамы интыез, анай кылэз дышетонын шуг-секытъёс сярысь вераськомы.

Туэ 10-тӥ куарусёнэ (сентябре) Удмуртиысь Кун Кенеш азьын шимес учыр луиз — тодмо удмурт тодосчи но азьветлӥсь Альберт Разин ассэ ачиз ӝуатӥз.

Врезка:

Альберт Алексеевич Разин — философия наукаосъя кандидат, Удмурт Элькунысь наукаосъя дано ужась, Трокай Борисов нимо премилэн лауреатэз, Алнаш ёрослэн дано муртэз. Вордске Алнаш ёросысь Кузьымгуртын 1940-тӥ арын 12-тӥ инвожое.

1962-тӥ арын йылпумъя Удмурт пединститутэз. Быдэс улонзэ сӥзе адямилыкез эскеронлы — 1992-тӥ арын УдГУ-ысь Адямилыкез эскеронъя институтэз кылдытонэ пыриське, солэн кивалтӥсез луэ. 1990-тӥ аръёсы удмурт движениез улӟытӥсьёс пӧлын вал. «Дэмен» огазеяськонэн кивалтэ. Трос кужымзэ понэ. Гербер удмурт праздникез быдэс элькунэн пусъён понна.

Кулэ 2019-тӥ арын 10 куарусёнэ.

Та ивор соку интернет вотэсэз зуркатӥз, нош печатной изданиосын со учыр сярысь туж ӧз гожъялэ. Соин интернетэз луымтэ адямиос, оло, тодытэк но кылизы, дыр. Тани кызьы гожтэ та учыр сярысь «Удмурт дунне» газет: «Та нуналэ 10 часын ӵукна Кун Кенешлэн сессиез кутскыны кулэ вал. Со азьын тодосчи кияз плакатъёсын пумитъяськон ужрадэ потӥз — огаз ӟуч кылын гожтэмын вал «Вань-а мынам Атыкай музъеме?», нош мукетаз — тодмо дагестан (авар) кылбурчилэн Расул Гамзатовлэн чуръёсыз: «Ӵуказе анай кылы быриз ке, мон туннэ ик дась ни бырыны...» Сессие вуись депутатъёслы солэн юрттӥсьёсыз люкылӥзы азьветлӥсьлэсь вазиськонзэ — тросэз соос герӟаськемын удмурт кылэз школаосын одно дышетонэн но кун учреждениослэн ужазы кутонэн...» Нош интернет ивортодэтъёсын зэмзэ но мар но ӧз гожъялэ соку та учыр сярысь: тодосчиез жалясез но, дурбасьтӥсез но, курласез но тырмыт вал. Но мынам таин валче удмурт блогерлэн Лукерья Шиховалэн малпанэныз соглаш кариськеме потэ. Тани кызьы со гожтэ: «Эн малпалэ, кызьы быриз, малпалэ, мар со лэсьтӥз». Та тужгес шонер веран, дыр.   

Зэм, удмурт кылэз дышетон но кун статусэн сое уже кутон ужпум Альберт Алексеевичез котьку но сюлэмшугъяськытэм, со сярысь тодосчи котькытын но шара вераллям (кӧня ке пол аслам но та пумысен выступленизэ кылзэме вань — О.П.). Кызьы тодӥськом, 2018 арын анай кылъя законэ воштонъёс пыртӥзы — вордскем кылэз анай-атайлэн вазиськонэзъя, мукет сямен вераса, анай-атай кулэ каремъя дышетыны кутскизы. Та удмурт кылэз дышетон понна нюръяськись адямиослы, озьы ик Альберт Алексеевич понна но, туж секыт шуккет луиз. «Анай кылэз ас мылкыд каремъя дышетон солэн чылкак быроназ вуттоз», — шуэ со Удмурт Элькунысь Кун Кенешысь депутатъёслы ыстэм «Удмурт калык быре. Тӥляд кужымады сое утьыны» шуыса нимам вазиськоназ. Удмурт шаерысь вань нылпи садъёсын но школаосын удмурт кылэз дышетон, удмурт гуртъёсысь нылпи садъёсын удмурт кылын вераськон, школаосты удмурт кадръёсын тырмытон, удмурт кылъя учебникъёсты лицензировать карон понна ужрадъёсты кутон, урам нимъёсты, вывескаосты, лозунгъёсты кык кылын гожтон, архитектуралы йӧслыко тус но шӧм пыртон, Ижкарын этнопарк кылдытон — таӵе но трос мукет куронъёс пуктэм вал удмурт тодосчи депутатъёслы. Но, жаляса верано, соос улонэ ӧз пыӵалэ. Но котьма ке но, оскем потэ, Альберт Алексеевичлэн удмурт кылмы понна аслэсьтыз улонзэ сётэмез юнме ӧз луы шуыса. Бадӟым сьӧлык лэсьтӥз ке но, со аслаз та вамышеныз троссэ малпаськонэ уськытӥз: зэмзэ но, вань-а удмурт кылмылэн вуоноез? Ӵапак та юанэз валтӥсь карыса, ми удмуртъёс пӧлын юалляськон ортчытыны малпамы. Ӵектӥськом лыдӟисъёсмылы та ласянь малпанъёсын тодматскыны (та сярысь «Вань-а удмурт кыллэн вуоноез? Кыӵеен тӥ сое адӟиськоды?» ним улсын потэм статьяысь лыдӟыны быгатоды).

Асьме Балтась ёросын удмурт кылэз дышетэ 421 нылпи:

Ципья шоръёзо школа – 183 пинал;

Покчи Лӧзя шоръёзо школа – 93;

Шор Кушкет шоръёзо школа – 104;

Сырья покчиёзо школа – 13;

Вылын Ушма покчиёзо школа – 12;

Ярак-Чурма покчиёзо школа – 9;

Вуж Кушкет покчиёзо школа – 7.