Хезмәт

«Ваньмесыз ке люкад, быдэс школа луомы» Дышетӥсьёслэн династизы: Михеевъёс — Валеевъёс — Гайнутдиновъёс

Со школаын 40 ар пала ужаз. Со ассэ быдэсак нылпиослы сӥзиз — аслазъёсызлы но, мурт нылпиослы но. Тани 39-тӥ арзэ со дано шутэтсконын луэ. Туннэ нуналэ солэн дышетскисьёсыз асьсэос но пенсиын ини, тросэз воксё та дуннеысь кошкемын...

Серафима Михайловна 1924 арын Хлебников ёросысь Ведерники гуртын (туннэ нуналэ Марий Эл республикаысь Мари-Турек районын) вордске. «Мариец» стеклозаводын сӥзьым аръем школаез йылпумъяса, со Арчаысь педучилищее дышетскыны пыре. Сое быдтэмез бере, егит Серафима бигер Арбор гуртын ӟуч кылъя но литературая дышетӥсь луэ (1942-1946-тӥ аръёс). Василий Степанович но, Серафима Михайловналэн картэз, Марий Элысь вал, со но дышетӥсь луыса ужаз. Нырысь Василий Степанович Тюнтер школаын военрук луыса ужаз, собере отын ик технологиен дышетӥз, собере ӟуч кылэз дышетыны кутскиз. Кӧня ке дыр ортчыса кыкназэсты ик Ципьяысь школае выжтӥзы (Тюнтер школа начальной луыса гинэ кылиз). Серафима Степановна покчи классъёсын дышетӥз, нош Василий Степанович — технологиен. Татын кузпалъёс трос аръёс ӵоже, дано шутэтсконэ потытозязы тыршизы. Василий Степанович ужаз но со дыре ик Казаньысь педагогика институтын история факультетын дышетскиз, соин школаын ужан аръёс ӵоже со нылпиосты историлы но дышетыны вутскиз. Кык дышетӥсьёслэсь ужан стажзэс лыдъяса огазеяд ке, 80 ар пала люкаське. Озьы ортчытӥзы соос ас улонзэс, ог-огзэс валаса но гажаса, асьсэды нылпиослы сӥзьыса.

Асьсэ нылпиоссы Михеевъёслэн ньыль вал. Александр (1947 ар), Алевтина (1948 ар), Геннадий (1952 ар), Валентин (1953 ар). Паймымон но ӧвӧл, куинез соос пӧлысь (Геннадийзы сяна) анай-атайзылэн пытьыостӥзы вамыштӥзы но дышетӥсь луизы шуыса. Алевтина Васильевна Казаньысь педагогикая институтын естественно-географической факультетэз йылпумъя. Куинь ар Базарные Матакиын ужа, собере пенси дырозяз Ципья школаын химиен но биологиен дышетэ. Александр Измаильской пединститутэз (Украина) йылпумъя (музыка факультетсэ). Со сяна, Одессаысь кунсьӧр кылъёсъя университетын дышетске. Анаезлэн, Серафима Михайловналэн, верамезъя, со ялан пӧртэм курсъёсын дышетскиз, пӧртэм удысъёсын тодон-валан басьтыны тыршиз. Туннэ нуналэ Александрлэн кык нылъёсыз Украинаын уло. Нош ачиз со та дуннеысь кошкиз ини — ватэмын Украинаын.

Валентин, Михеевъёслэн покчиез пизы, Казанысь педагогикая колледжез йылпумъя. Кӧня ке ас удысэзъя ужаса, лэсьтӥськонын тырше. Вань улонзэ Челныын улэ. Кулэмез дырысен куать ар ортчем ини. «Огез бӧрьсы мукетыз кошкизы соос», — шуэ Серафима Михайловна, — нырысь Шура (Александр — ред.), сьӧраз ик, ньыль толэзь ортчыса, Валентин». Валентинлэн кык нылпиосыз, кыкез но Набережной Челныысь пединституз йылпумъязы. Светлана нылзы Азнакайын ужа, Саша пизы — Челныын. «Сашалэн аслаз но куинь нылпиез ини. Нылпиоссы туж ярато куное лыктылыны», — вера Алевтина Васильевна.

Одӥгез пизы гинэ анай-атаезлэсь сюрессэс быръйымтэ — Геннадий. Со КамПИ-эз йылпумъяз, инженер-механик луиз но 40 арлэсь уно та удысын ужаз. Серафима Михайловналэн верамезъя, солэн вань улонэз юн герӟаськемын луэм техникаен. Геннадий Васильевичлэн кык нылпиез — кык нылыз. Соос но КамПИ-эз йылпумъязы, экономика факультетэз.

Та сярысь пыр-поч лыдӟыны быгатоды газетмылэн 21-тӥ номерысьтыз.

 

Нравится
Поделиться:
Реклама
Комментарии (0)
Осталось символов: