Ваньмы но субботнике!

Но кыӵе гинэ чурытэсь ужрадъёс медаз кутӥське, район калык ачиз кулэ ӧз ке кары, ӧз ке тунсыкъяськы, ӧз ке тыршы, пайдаез ӧжыт луоз. Чылкытлыклэсь асьме нуналмысь улонамы бадӟым инты басьтэмзэ валаку гинэ умой бервылэ вутскыны быгатомы. Организация-предприятиослэн, вузкарон, калыклы юрттэт сётон точкаослэн, пӧртэм зданиослэн котыръёссы чылкыт луыны кулэ. Шур дуръёс, сюрес дуръёс, нимысьтыз площадкаос районлэн центраз интыяськем организациос понна люкыса сётӥськизы. Арлы быдэ соослэн кужыменызы бадӟым уж быдэстӥське. Нош трос квартираё юртъёс вӧзысь жуг-жагез утялтон но территориын радлык кылдытон со тодмостэм площадьёслэн кузёоссылы оскиське. Та сярысь вунэтыны кулэ ӧвӧл. Кылем арысен утялтымтэ бакча жуг-жагъёс, вуж теплица-парникъёслэн кылем-мылемъёссы котыр улосэз сӧро, чебертэм каро. Соин но таӵе интыосты ӝог дыре радэ пыртон куриське. Нимаз юртъёс вӧзын но тырмымтэос трос. Тросэз капка азьзэс асьсэлэн участокенызы уг лыдъяло. Нош улон-вылонысь кылем пӧртэм жуг-жаг чик но урамъёсмес, гуртъёсмес уг чеберты.

Таосты лыдэ басьтыса, районлэн исполкомез 28 апрель нуналэз районысь вань калык понна чылкытлык, утялскон нуналэн ялӥз. Та нуналэ районын улӥсь котькуд мурт юртъер котырзэ утялтыны, радэ пыртыны кулэ. Организация-предприятиослэн кивалтӥсьёсынызы ортчытэм кенешонын кинлэн кыӵе участокын ужамез тодмостӥськиз.