«Ӧвӧл бигер удмуртъёс, ӧвӧл башкир удмуртъёс, …вань удмуртъёс»

- Тазьы шуиз Башкириысь удмурт кылын потӥсь республиканской «Ошмес» газетлэн валтӥсь редакторез, Башкириысь удмуртъёслэн огазеяськонзылэн тӧроез Салимьян Гаруфуллин Татарстанысь удмуртъёслэн НКА-зылэн правлениезлэн люкаськоназ.
Улосвылкуспо фольклоръя «Чакара» фестивален валче 8-тӥ пӧсьтолэзе Кукморын, фестивалез сиё-дано усьтэмлэсь азьло, ортчем куать толэзь куспын быдэстэм ужъёслы йылпумъян лэсьтон, ужез умоятонъя кенешъёс, ӵектонъёс сётон, воштонъёс пыртон, азьланезлы ужпумъёс тодмостон понна «Татарстан Республикаысь удмуртъёслэн национально-культурной авономиезлэн» правлениез люкаськиз. Татарстанысь удмуртъёслэн тӧроезлэн Андрей Сергеевич Герасимовлэн кивалтэмез улсын ортчем ужрадэ ваньзы сямен «удмурт» ёросъёс (удмуртъёслэн НКА-зы луэм ёросъёс): Кукмор, Балтась, Агрыз, Менделеевск, Мамадыш, Елабуга но Нижнекамск городъёсысь удмуртъёслэн огазеяськонъёссылэн тӧрооссы пыриськизы, ӝыны ар куспын быдэстэм ужъёссы, азьланяз быдэстыны чаклам малпанъёссы сярысь вераськизы. Шумпотымон, котькуд вылӥын пусъем ёросын удмуртлыкез но лулчеберетмес азинтонъя, анай кылмес но калык сям-йылолъёсты утёнъя уж нуиське. Зэм, кытын ке золгес, кытын ке лябгес. Кылсярысь, та ӧръёсъя Кукмор, Балтась ёросъёсын уж умой радъямын шуыса йылпумъян лэсьтӥзы ужрадэ пыриськемьёс. Озьы ик Андрей Сергееевич пусйиз, Нижнекамск городын ужъёс умой мыно шуыса. Нялтас вераса, пусъем потэ Нижнекамскын удмуртъёслэн огазеяськонзы кылдэм кемалась ӧвӧл гинэ. Паймоно кадь: Нижнекамск которын одӥг удмурт гурт но ӧвӧл, пе. Но, котьма ке но, Нижнекамск городын улӥсь удмуртъёс быгатӥллям асьсэлэсь огазеяськонзэс кылдытыны. Быдэстэм ужъёссы трос ӧвӧл ке но али, соослэн вань вылэм ини асьсэ самодеятельной коллективзы, одӥг концерт но возьматӥллям ини. Секытэнгес ужъёс мыно, кылсярысь, Агрыз но Бавлы районъёсын, могӟетъёс кылдыло вылэм Менделеевск ёросын но. Но талэн мугъёсыз ӵемысь муниципал но кун кивалтӥсьёсын кусып возёнэн, шонергес вераса, кивалтӥсьёслэн та ужпумлы мылкыдтэм луэменызы герӟаське шуыса валаны кулэ, дыр. Огъя вераса, адями фактор бадӟым инты басьтэ. Соин валче муниципальной кивалтӥсьёсын ужанъя кӧня ке ӵектонъёс но чузъяськизы. Со сяна куд-ог ёросъёсын удмурт гуртъёс туж ожыт, чиньыен лыдъямон гинэ (Агрыз, Бавлы) яке ог-огзылэсь кыдёкын интыяськемын. Та югдур но ассэ шодытэ. Но котьма ке но, котькуд ёросын ужъёс нуисько. Кылсырысь, Агрыз ёросысь удмуртъёслэн НКА-зылэн тӧроез Наталья Матвеевалэн тыршемезлы луыса, южтолэзе нырысетӥзэ Агрыз городын улӥсь умуртъёс люкаськыса пумиськыны быгатӥллям. Та бадӟым азинскон шуыса пусйиз Андрей Сергеевич. Азьпалан быдэстоно ужъёс сярысь ке верано, кылсярысь, Менделеевскын Марианна Викторовна Кузнецова удмурт кылын Выль ар ёлкаосты ортчытыны чакламзы пумысен вераз. Мамадышын Аран быдтон йылолэз ортчытыны малпало. Нош республика масштабен ортчытоно ужрадъёс сярысь ке верано, пусйыны кулэ, дыр, «Мудорвай» конкурсэз. Туэ сое ортчытыны чаклало нылпи садэ ветлӥсь но покчи классъёсын (1-4 кл.) дышетскись пиналъёс полын.
Кемалась ӧвӧл республика масштабен ортчем ужрадъёс - «Гырон быдтон» но Татарстанысь удмурт егитъёслэн I-ти «БиГерд» форумзы - сярысь со вераськон потиз. Соослэн умой палъёссы но тырмымтэоссы пусъемын вал. Огъя малпанэ вуыса, егитъёслэсь «БиГерд» форумзэс арлы быдэ «Гырон быдтон» праздникен валче ортчытыны кулэ шуыса йылпумъян лэсьтэмын вал.
Татарстанысь удмуртъёслэн кенешоназы пыриськем Удмуртиысь, Башкириысь, Пермь но Киров улосвылъёсысь куноосты туж тунсыкъяськытӥз таӵе юан: «Малы одно ик «БиГерд»? Мае со валэктэ»? «Би», англи кылысь берыктоно ке - валче, ӵошен шуэмез, пе, валэктэ, нош «герд» - со герӟет.
Вятской Поляна карысь удмуртъёслэн азьветлӥсьсы Надежда Исаева ӵектонэн вазиськиз: Ваткасьӧр удмуртъёслэсь «Зарни бугор» улосвылкуспо фестивальзэс Татарстанын ортчытыны ӵектиз со.
Ужрад йылпумъяськиз туэ куарусён толэзе Сыктывкарын ортчоно «Финн-угор калыкъёслэн съездазы» делегатъёсты быръёнэн. Быръемын вал куинь мурт.