«Вордскем гуртам, Киськемын, мыным туж кельше»

«Пичи гуртын улӥськомы, ужан интымы ӧвӧл» шуыса но уг ӝожтӥсько. Туж чебер но каньыл сэрегын интыяськем гуртын улӥсьёс азьло дырысен пудо вордонэн выро, ужаны тросэз мукет гуртъёсы ветло. Киськем гуртысь одӥгез сыӵе адӟем карымон семья шуыса Колесниковъёсты висъяны луэ.

Колесниковъёс бадӟым семья луыса, сизьым ӵошен уло. Юртлэн валтӥсь кузёез Вячеслав Иосифович туннэ нуналэ аслэсьтыз анайзэ, Зоя апаез уте — соос ӵош уло. Вячеслав агайлэн кузпалэз Роза апай ини кема аръёс ӵоже, егит дырысеныз кутскыса, «Активист» возёсын скал кыскись луыса тырше. Бадӟым опытэн скал кыскись егит ужасьёс понна юрттӥсь но визь-кенеш сётӥсь луэ. Андрей пизы но солэн кышноез Татьяна — Киськеме улыны кыльыса, бускель гуртъёсын ужась специалистъёс. Вераськонмы но Андреен ужез сярысь луиз.

Андрей Колесников — «Активист» возёсысь егит но оскон сётӥсь специалистъёслэн одӥгез. Ципья шоръёзо школаез йылпумъяса, Андрей Нурмаын одӥг ар ӵоже дышетске но (2009-2010-ти аръёс), тракторист-машинистлэсь ӧнерзэ басьтэ. Сварщиклы но дышетске.

— Гуртысь мон нокытчы ӧй кошкы шуыны луэ. 2010-2011-тӥ аръёсы армиын служить карыса бертэме бере, «Активист» СХПК-е ужаны интыяськи. 1995-тӥ арын потэм «МТЗ-82» тракторен ужаны кутски. Туннэ нуналэ но со трактореным ужасько, со сяна, туэ тани нош одӥг выль техника но оскизы, — вера егит воргорон.

Выль китайской тракторез Андрейлы юнме гинэ оскымтэзы — егит воргоронэз ужаз аслэсьтыз техниказэ умой югдурын возись, сое тодӥсь-валась, тупатыны быгатӥсь механизаторез кадь тодо. МТЗ трактореныз со удобрение пазян ужъёсын выре, ӝоген выль тракторез сьӧры но пуксёз.

— Городэ улыны кошкеме уг поты, — ватытэк вера Андрей, — мыным вордскем гуртам, Киськемын, туж кельше. Татын туж чебер. Городысь вуэм куноос луизы ке, соос но гуртмылы синмаськыса кошко. Интыез шыпыт, чылкыт. Адямиос но гуртын каньылэсь, ог-огдэ тодыса улӥськод бере, юрттыны но котьку дась. Нылпиосты но кышкатэк ураме шудыны поттыса лэзьыны луэ. Али тани кӧня ке ар талэсь азьло выль площадка лэсьтӥзы. Школае но нылпиосты автобус нуэ-вае. Озьы бере малы гуртын улонтэмез?

Зэмзэ но, гуртын туала дыре улыны условиос умоесь. Ужез ке яратӥд, та ласянь но шӧдскымон шуг-секытъёс кылдо шуыны уг луы. «Активист» колхозын, кытын Адрей но солэн анаез ужало, та ласянь югдур умой. Шонерзэ верано ке, «Активистын» туж трос егит ужасьёс. Тае Андрей но вераськонамы пусйиз. Соин ужаны но капчигес, шулдыргес, пе.

— Улисьял гуртысь трос егитъёс ужаны ветло. Соосын ӵош тупаса, ог-огмылы юрттыса ужаны тыршиськомы. Председательмы но вить ар талэсь азьло гинэ воштӥськиз, соин но огъя кыл шедьтӥськомы. Техника дыраз бертыса улэ, уксёзэ дыраз сёто — огъя вераса, ужа но ужа гинэ. Толалтэ гинэ шуг-секытъёс кылдо, но та валамон но — со котькуд колхозын озьы. Но тэк пукыны дырмы уг луы — арлэн котькуд дыраз котькудмылы уж шеде. Мон тани, кылсярысь, толалтэ сварщик луыса тыршисько яке гаражын ужасько. 

Андрей Вячеславовичлэн кузпалэз, Татьяна Васильевна, Карек-Серма гуртысь луэ. Татьяна Дурга гуртысь почта ёзэтэн кивалтэ. Та интыужаз егит кышномурт одӥг арлы матэ гинэ тырше ке но (со дырозь декретын луэм, кӧня ке дыр ӵоже Дурга гуртысь ик нылпи садын но ужам), со но ассэ усто ӧнерчиен возьматыны быгатэм ини. Колесниковъёслэн кык пиоссы — Егор но Максим – будо.

— Гуртамы ик выль корка пуктыны малпанъёсмы вань. Интыос татын шулдыресь бере, мукет интые юрт лэсьтон сярысь малпанъёс ӧз луэ, — азьланьтэ веранзэ Андрей Колесников. — Ӵошен туннэ нуналэ шулдыр, тупаса улӥськомы. Атаймы бабайлэсь кылем мушъёссэ вордэ. Куинь йыр скалмы но вань али, соосты но тросгес анаен атай утё. Огъя вераса, анай но атай — милям валтӥсь юрттисьёсмы.

Выль юрт лэсьтыса нимаз улыны кутскизы ке но, Андреен Татьянаос уг вато: Вячеслав агайлы но Роза апайлы соос котьку юн пыкет луозы. Гуртын ведь мукет сямен уг луы…