Вукогуртысь «Тол шулдыръяськонъёс» (+фото)

Вукогуртын туннэ нуналэ егитъёс ӧжыт шуыны уг луы, соин оло соос сыӵе активноесь? Котьма ке но, быгатӥллям гуртсы понна праздник радъяны. Тани мар шуэ та сярысь Николай Фёдоров: «Адями весь ужа. Но ужаса гинэ улонэз ортчытыны уг луы ук. Соин но Вукогуртысь егитъёс малпазы сыӵе праздник радъяны. Пӧрмиз шуыса малпасько, малы ке шуоно адями трос люкаськиз. Сомында лыктозы шуыса ӧм но малпалэ. Куное бертэм адямиос но вань вал соос пӧлын». Праздниксы зэмзэ но, туж умой ортчем. Туспуктэмъёсызъя ик тодмо: одӥгаз адямиос ӝӧк котырын люкаськыса пӧсь ӝук сиё но самоварысь чай юо, кыкетӥяз гурезьысен ватрушкаосын но ледянкаосын нискылало, куинетӥяз мызганчи котырын шулдыръясько… Пӧртэм шудонъёсын, шулдыресь кырӟанъёсын но эктонъёсын ортчем вукогуртъёслэн праздниксы. Туж умой, сыӵе шулдыръяськыны, нылпиосын мӧйыос но огазе праздник ортчытыны быгатэм бере.