Хезмәт

ВУЖ КУШКЕТЪЁС ШУГ-СЕКЫТЪЁС АЗЬЫН ӞУДЫСА УГ КЫЛЁ

Гуртысь югдуръёсты тодэмед потӥз ке, магазинэ пырыса потон но тырме. Вуж Кушкет гуртэ мынэммы бере, ми но озьы лэсьтӥмы. Магазинэ пыримы ке, бадӟым черод. Нянь вайиллям вылэм. Черодын сылӥсь гуртысь кышномуртъёсын вераськимы. Калыклэн мылкыдэз умой.

- Улонмы умой, общество ужась муртлы уксёзэ, государство мӧйыослы пенсизэ дыраз сётыса мынэ. Егитъёс трос ӧз ке но луэ, гуртэ кылисьёсыз но вань,- шуо кышномуртъёс.
- Гуртамы луэм парсь вордон комплекс но кӧня муртэз ужо каре ук. Ужез яратӥсь муртлы уж вань шуыса веранэ,- шуыса вераськонэ пыриське кема аръёс ӵоже «Яна тормыш» обществолэн парсь вордон комплексаз ужам Антонида Клеймёнова.

Гуртын улӥсьёслэн уноез обществоын ужало вылэм. Кӧня ке воргоронъёс гинэ палэнэ потыса «шабашкае» ветло, шуизы.

Ми мынон нуналэ Геройёслэн нуналэнызы валче клубын ужрад ортчытыны дасясько вал. Клублэсь заведующийзэ Светлана Щербаковаез дасяськон ужъёсын ветлыкуз адӟыса вераськимы.

- Милям гуртын огкылысь, эшъяськыса, тупаса уло. Юыса, кудӟыса ветлӥсьёс но ӧвӧл. Праздникъёсты но ӵошен шулдыр карыса ортчытӥськомы. Празднике одӥг гинэ семья но буш киын уг лыкты.
- Оло, материальной юрттэт возьматӥсь спонсоръёсты ӧвӧл-а?
- Гуртамы ужбергатӥсьёс ӧвӧл, магазинлэн кузёез Зоя Колоколова гинэ Выль ар праздникез ортчытон понна кӧня ке уксё сётэ. Трос дыръя «Яна тормыш» общество юрттэ. Со гинэ медаз быры ини шуыса, мылкыд кариськомы. Одӥг куронмес но быдэстытэк уг кельты. Туэ концерт костюмъёсты вурыны материальной юрттэт сётӥз. Тау кивалтӥсьмылы. Тани туэ нырысетӥзэ «Гуртлэсь нуналзэ» ортчытӥмы. Татын но самой бадӟым пыкетмы обществомы луиз. Озьы ик школалэн коллективез но милям бадӟым пыкетмы, малы ке шуоно одӥг гинэ ужрад но соослэн пыриськемзы сяна уг ортчы,- шуэ Светлана Петровна.

Школа быриз ке, гурт быре шуыны яратӥськомы. Нош Вуж Кушкетын школалэн азьпалыз вань-а, вордскисьёслэн лыдзы кӧня меда шуэм юанъёсын школае мынӥмы.
- Светлана Ивановна дышетсконын луэмысь, вань дышетскисьёсты но огнам гинэ дышетӥсько,- шуэ Светлана Карабаева.
Гуртысь начальной школае ваньзэ куать нылпи ветлэ вылэм.
- Тужгес ӧжыт ук, вордскисьёслэн лыдзы кызьыгес?
- Вордскисьёслэн лыдзы ӧжыт будӥз. Туннэ нуналлы дошкольной аресэн 14 нылпи вань. Милям лыдъяммыя, 2020-тӥ арозь школае дышетскыны пырись нылпиос вань али,- шуэ дышетӥсь.
Нош та дышетскон арез йылпумъямен, школаез борӟало вылэм шуэм ивор анай-атайёсты сюлэмшугъяськонэ кельтэм. Талы сюрес пононо ӧй вал, ини кивалтӥсьёслы гожтэт но ыстӥмы, умой пала гинэ быдэстӥськиз ке яра ини, шуо соос.

Гуртын улӥсь калыклэсь лыдзэ учкид ке, пиналъёслэн вордскемзы но, школа, нылпи сад аресэн нылпиослэн лыдзы но начар ӧвӧл кадь. Туннэ нуналлы 3 нылпи Средний Кушкетысь, 8-эз Янгулысь нылпи садъёсы ветло вылэм.

Гуртын вань социальной зданиос но вужесь ини. Нош отын но гурт калык понна тыршыса ужасьёсты адӟон милемлы синмаськон мылкыд кылдытӥз. Вуж кушкетъёс «азьпалан, оло, милям гуртэ но та зданиосты огазеям трос функциё центр уз лэсьтэ меда», шуыса оско.
- Ваньмыз но умой шат, оло, одӥг гинэ проблемады но ӧвӧл?
- Милемыз сюлэмшугъяськытӥсез - жуг-жаг куян проблема. Тужгес но тулыс территориосты утялтэм бере, жуг-жаг трос люкаське. Кытчы поныны тодытэк тэльмыриськомы. Жуг-жагез Ципьяысен лыктыса люкалозы шуэм ивор луэм вал, отысен но ӧз лыктэ. Гуртысь кӧня ке ошмес но куштӥськем югдурын, соосты но тупатъяно вал,- шуизы.
Мукет поселениосын выллем самообложение уксёлы гуртысь урамъёсы векчи из вӧлдыны кутскиллям. Таза, чебер юртъёсын улӥсьёс но трос татын. Гуртлэн данъяськонэз луэм адӟем карымон семьяос но вань. Нош самой важноез, Вуж Кушкетын вордскем гуртэз понна тыршись, огкылысь калык улэ. Нош сыӵеос улонысь шуг-секытъёс азьын ӟудыса уг кылё, котьку асьсэлэсь сюрессэс шедьто.
«Ялан эн бӧрды, атай»
Кемалась ӧвӧл Россилэн Героезлэн Олег Исаевлэн анай-атаез Казаньын дуно куно луыса бертэмзы сярысь гожтӥськеммы вал. Со пумиськонысь басьтэм мылкыдъёс сярысь тодыны турттыса, Исаевъёслэн ӧсазы йыгаськи, со куспын юртлэн педпалаз луэм воштӥськонъёсты синйылтӥ. Кӧня ке ар талэсь азьло но лыктэме вань вал та юртэ, нош соку таӵе ӧй вал со. Чебер ужамын, туала юртлэн борддораз кыдёкысен адскыса улымон карыса Исаевъёслэн батыр пизылы синпелет пул интыямын.

- Пумиськонэз туж кельшытыса бертӥмы. Сыӵе ужрад туэ али нырысетӥзэ ортчытӥськиз. Азьпалан но милемыз медаз вунэтэ, мед ӧтьысалзы. Соин валче районысь социальной дурбасьтонъя отделлэн кивалтӥсезлы Алсу Гатиятуллиналы пумтэм тау кареммес вуттӥськом, - шуэ шаермылы батыр пи будэтэм атай.

Вера но Николай Исаевъёс вить нылпи будэтӥллям. Самой бадӟымез Юрий Удмуртиын пудо эмъясь, Светлана нылзы Киров улосысь Красная Поляна посёлокын географияя дышетӥсь, ӵош улӥсь Николай пизы улонысь эшеныз Нинаен ньыль нылпи будэто, покчиезлы ваньзэ 3 толэзь гинэ вылэм али. Николай Николаевич Москваын выжъёс лэсьтонъя организациын тырше, ужан графикезъя 15 нунал ужа, 15 нунал шутэтске вылэм. Покчи Алевтина нылзы гуртын улэ, али куинетӥ нылпиеныз декрет шутэтсконын, со дырозь амбарын ужам. Олег семьяяз кыкетӥ нылпи луэ, 8-тӥ классэ йылпумъямез бере Арчаысь педагогикая колледже дышетскыны пыре, отын начальной классъёсты дышетӥсьлэсь дипломзэ басьтэ. Ужан сюрессэ Саба районысь Иштуган гуртын кутскыса, 2 толэзь гинэ дышетӥсь луыса ужаса кыле, собере Атаймузъеммы азьын дано ужпумзэ быдэстыны Чита городэ басьтӥське. Служить карыкуз со лётчик луыны малпа. Малпанзэ зэмлыклы пӧрмытон понна дышетске но военной самолётлэн штурвалэз сьӧры пуксе. 1996-тӥ арын 5-тӥ мае Чечняысь Урус-Мартан город котырын ожъёс дыръя со геройёс сямен быре. Николай Степанович пиезлэсь быремзэ туж секытэн ортчытэ, али но синкылиоссэ уг ваты со. Та шудтэм учыр бере, со кык пол одӥг ик вӧт адӟе, солдат дӥсен коросын кыллись Олег султыса: «Ялан эн бӧрды, атай», шуэ. Со вӧтъёс бере буйгатскыны кулэ шуыса, малпай шуэ со. Олег Николаевичлэн Воронеж городын кузпалэныз Дима пиез уло. Туэ соос Вуж Кушкетын улӥсь песяй-бабайзылэсь но ӵыжы-выжыоссылэсь югдурзэс тодыны бертӥллям.

Николай агайлы но, Вера апайлы но вуоно аре 78 арес тырме. Соос али тазалыксылы уг ӝожтӥсько, Инмарлэн сётэмезлы тау карыса уло. Одӥг гинэ мылкыд каронзы соослэн: «Нокинлы но нылпизэс асьсэлэсь азьло ватыны медаз кылды», шуо.

- Пие аслэсьтыз улонзэ Атаймузъеммы понна, егит поколенилы Атаймузъеммес кызьы утьыны кулэзэ дышетон понна ӧз жаля. Сое адӟыны но валаны мед тодысалзы,- шуэ Николай Степанович.
Гыльёс - кузё кышнолэн тусбуез
Вуж Кушкет гуртлэн урамъёстӥз ортчыкумы татысь самой гажамон, тыршись семьяослэн одӥгаз Ольга Васильевна но Юрий Андреевич Щербаковъёс доры пыримы.

Ольга Васильевна гумырыз ӵоже дышетӥсь луыса ужам. Начальной школаын но тодон-валан сётэм, озьы ик вордскем кылэз - удмурт кылэз - но дышетэм. Нош юртлэн кузёез Юрий Андреевич трос аръёс ӵоже колхозын механизатор луыса ужам, собере вукочилэсь ужзэ быдэсъям, дано шутэтсконэ но со ужысеныз потэм.

Соос улонысьтызы бадӟым праздниксэс витё - ӵош улыны кутскемзылы ӝоген ӝыны даур луэ вылэм. Щербаковъёслэн семьяязы Ольга Васильевна кен луыса Пор. Кутеш гуртысен лыктэм. ӵошен куинь нылпи будэтӥллям. Владимир пизы армиысь бертэмез дырысен колхозын шофёр луыса ужа. Улонысь эшеныз Светланаен кык нылпи будэтыса, анай-атайзылы юн пыкет луыса, валтӥсь юртазы уло. Светлана нимо нылзы Ижевскын, нош покчиез Наталья анаезлэн сюрестӥз кошкем, Ӟаны шор ёзо школаын ӟуч кыллы дышетэ. Улонысь эшеныз Олеген Вуж Кушкет гуртын уло, 3 пи будэто.

- Тыр улонын улӥськомы, коркамы шуныт, гажамон анай-атай но песяй-бабай луыса гумыр кариськомы, - шуэ Ольга Васильевна. Кӧня куримы ке но, туспуктэме усьыны мылкыд ӧз кары, нош гыльёссэ уськытыны пумит ӧз луы. Корка пушсэ возьматыса, данъяськыса вань кадь сэрегеныз тодматӥз. Юртсы бордаз кыскымон карыса лэсьтэмын. Корка пушказы котырак гыльёс, соос кузёлэсь тусбуйзэ возьмато кадь.

Та нуналъёсы Ольга Васильевна вордскем нуналзэ - бадӟым юбилейзэ пусйиз. Бер луиз ке но, ми но юбилярез сюлмысен ӟечкыласькомы, юн тазалык, каньыл улон но шудбур сӥзиськомы.
Ужан интыос вань, озьыен, гурт улоз
Вуж Кушкет гуртын юртъёслэн лыдзы кулэсмыса мынӥзы ке но, эркын интыяськеменызы, гурт бадӟым адске. Юртъёс бадӟымесь, калык каньыл... Тыршыса улэмзы синме йӧтэ. Ужан интызы - парсь фермазы вань. Фермалэн заведующиез Фарит Гарипов (туспуктэмын) Янгул гуртысь, кема аръёс ӵоже «Яна тормыш» обществоын ужам, етӥз, принципиальной но серьёзной мурт. Солэн ужез котьку но умой мынӥз, ваньмыз но лыдъямын, умой югдурын. Ужаны капчи, «толковой», югдурез валась кивалтӥсь. Дано шутэтсконэ потӥз ке но, Вуж Кушкет гуртысь фермаен кивалтонэз солы ик оскиллям. Татын котькуд ласянь чылкытлык. Утёд ке, обществоысь специалистъёс - экономист но, бухгалтер но чылкытлыкез эскерыса гинэ уло вылэм, солы утьыса ватсаса тыро, чылкыт ӧвӧл вылэм, уксёзэс вандо луыса потэ ини. Фарит агай ачиз но чебересь гыльёс пӧлын ужа, соосты утялскисьёс будэто. Горд-горд бегониос бордысь синъёсты ик басьтымон ӧвӧл. Мылкыдэз ӝутыса, «пиштыса» будо, син медаз усьы!

Комплексын ваньзэ 26 мурт ужа, ужан часъёс ӵукна 6.00 часысен 10.00 часозь, 10.00 часысен 13.00 часозь но 16.00 часозь. Собере ини комплекс охранникъёслэн ответственностьсы улсы кыле.
«Татын тунсыко но, каньыл но, - шуэ Фарит Гарипов. - Гуртэ егитъёс кылё. Тани Маргарита Павлова Янгулысь «Ива-Мебельын» ужаса, парсьёсты сюдыны кутскиз. Сергей Платонов, Иван Клеймёнов армиысь бертӥзы но, колхозлэн техникаяз пуксизы. Уждун вылӥ луыса, дыраз тыриськиз ке, кылё ини, кышнояськымтэ пиос ук али соос». Ферма «Яна тормыш» обществое пыре, нош обществоын шоро-куспо уждун 18 сюрс манет вылэм.

Вуж Кушкет гуртысь парсь вордон комплексын ужасьёс толэзьлы быдэ 250 йыр парсь куайытыса вузало, озьыен, обществолэн кассаяз 2-3 миллион манет уксё пыре. Та сярысь соос данъяськыса верало, малы ке шуоно тыршыса ужало, фермае ужаны мылкыд карыса мыно, дано шутэтсконэ потэмъёс пӧлын но ужасьёс вань али. Объект пушкысь ужез аслам синмыным ӧй адӟы, секыт-а, капчи-а - созэ вераны уг быгатӥськы, нош показательёслэн умой луэмзылы оскисько. Урам кузя мыныкум, пудоослы шуыса дасям, рулонъёсын куро-турынъёсты адӟыса, обществолэн ужъёсыз умой мыно, дыр, шуэм малпанэ вуиськем вал, малы ке шуоно та тросэн пудо вордӥсь муртъёслэн гинэ луэ но сое та мындаен общество гинэ сётэ. Туннэ нуналлы улэп парсьёсты 1 килограммзэ 103-105 манетэн вузало, дунъёс но вошъяськыса уло, огдыре шӧдскымон усиллям вылэм. Кунгожсьӧрысь сӥль пыртымтэзылы шумпото но. Сокем тыршыса ужам бере ужлэсь берекетсэ но адӟем потэ ук. Парсьёсты ялан Марий Эл, Чувашия Республикаосысен, Кострома, Саратов городъёсысен лыктыса, басьтыса кошко.

«Туннэ нуналлы 3795 йыр парсь вань», - шуэ фермалэн заведующиез. Парсьёс, парсьпиос пӧлын кулон учыръёс туж ӧжыт, татын пудо эмъясьлэн Искандер Батыршинлэн ужез ушъямон. Вера Щербакова, Людмила Раимова, Владилена Корнилова, Марина Данилова, Галина Клеймёнова, Татьяна Тарасова, Надежда Филиппова, Гета Павлова, Алексей Павлов, Галина Туктарова, Зоя Платонова, Иван Филиппов, Алексей Байгельдин, Николай Тарасов, Григорий Уськеев, Геннадий Филиппов, Мария Соловьёва но мукетъёс кивалтӥсенызы Фарит Гариповен ӵош парсь вордон комплексэз быдэс кужымен ужатӥсь кужмо, авторитето команда. Фермаын гинэ тыршыса уг ужало, доразы но скалъёс, ошъёс вордо, соосты вузало, юртъерзэс выльдо, нылпиоссэс дышето.
Удмурт эшъёсмылэн ужез яратэмзылы синмаськымон, сыӵе бадӟым но тыршыса ужамон производственной объектэз луэм гурт кызьы уз улы ини...

Зульфия ШАКИРОВА
ЛЫДПУСЪЁС
Вуж Кушкетын 56 хозяйство вань, 184 мурт улэ.
Самой арлыдоез Анна Степановна Павлова (1922).
Берло вордскем нылпи - Аделина Исаева.
Гуртын 55 скал вордо, 4 скал вордӥсь - 1, 3 скал вордӥсь - 1 хозяйство вань.
Остальные фотографии смотрте здесь: 1 2

Реклама
Теги: 250
Нравится
Поделиться:
Реклама
Комментарии (0)
  • 20 января 2018 в 16:17
    Бертуган Әхмәдиевлар призына көрәш ярышлары ачылу тантанасыннан
  • Балтачтагы "Дулкын" бассейны
  • Республиканың "Наз" хәйрия фонды Балтачның бертөркем баласына "Яңа ел тамашасы" бүләк итте
  • Балтачта җитәкчеләр ярышты
  • Район башлыгы Рамил Нотфуллин призына үткән көрәш ярышлары (1көн)
  • Норма урта мәктәбенең 100 еллык юбилей кичәсе
  • Балтач районында ЗАГС хезмәткәрләре хөрмәтләнде
  • Балтачта "Төнге чаңгы юллары" яңа сезонын ачты
  • 9 декабрьдә башкалада узган авыл хуҗалыгы ярминкәсеннән фоторепортаж
  • Районда терлекчелек өлкәсендә 11 айлык эш нәтиҗәләренә йомгак районнныӊ «Уӊыш» хуҗалыгында ясалды
  • Балтачның “Ватан сакчылары” һәйкәлендә тагын бер флаг күтәрелде
  • Балтач балалары коррупциягә кршы көрәшә
  • Нылкышно-анай куинь полэс дано
  • "Хезмәт"сез яшәп булмый ди карилелеләр
  • Балтачта Мәүлидкә Пәйгамбәрнең чәч бөртеген алып кайтканнар (+фоторепортаж)
  • Каратэ-кекусинкай соңгы елларда районыбызда зур популярлык казана (+фоторепортаж)
  • "Мудорвай" республиканской конкурс ортчиз
  • "Татарстан" хуҗалыгында районда сөт җитештерү турында җитди сөйләшү булды (+фоторепортаж)
  • “Салават күпере” балалары әниләрен бәйрәм белән котлаган
  • Балтачта Әниләр көне уңаеннан, “Ак чәчәкләр сезгә, ак җаннар” дип исемләнгән бәйрәм оештырылды
  • Балтачлылар ярминкәсе республикада югары бәяләнә (+фоторепортаж)
  • Римма Ратникова Балтачта "Бердәм Россия" сәяси партиясенең конференциясендә катнашты
  • Тимирязев исемендәге җәмгыять призына татарча көрәш ярышларыннан фоторепортаж
  • "Сельхозтехника" призына узган волейбол ярышлыры
  • "Чираттагы ярминкәгез дә, яхшы оештырылган" дип бәя бирделәр казанлылар
  • Крокодилның теше сызласа, нишләргә? яки тәрбиячеләр бала сәламәтлеге турында сөйләшә (+фоторепортаж)
  • Балтачта "Ат ил күрке" бәйрәм тамашасы узды.
  • 9 май - парад