Хезмәт

Выль фермае – экскурсие (фото)

Азьло дыре «Смаиль» («Шаумян») колхозын председатель луыса ужам Султан Ибрагимович Фатыхов Смаиль но Сизнер гуртъёсысь пенсионеръёслы бадӟым экскурсия радъяз.

Ми трос кузя люкаськимы. Адӟеммылы паймеммы бере но паймимы. Та фермаын ваньзэ ужъёсты машина-автомат ужа. Уд-а паймы?! Скалъёс но дышиллям ини: массаж каремзы потэ ке, машина улэ лыктыса султо но, машина ужаны кутске, тырмиз ке массаж - скалъёс кошко, нош машина ужамысь дугдэ. Юон тусязы вузы кулэсме ке, машина соку ик тусез вуэн тырмытыса понэ. Скаллэн йӧлэз кыскиськыса быриз ке, аппарат ачиз усе.

Ферма пушкын туж чылкыт но югыт. Паймеммес ваньзэ гожтыса уд быдты, синмын адӟыны кулэ. Ми шумпотыса бертӥмы отын ужась скал кыскисьёс понна. Макем соослэн ужзы капчиятэмын. Таӵе ферма лэсьтэмзылы пумтэм тау вераны луэ «Смаиль» хозяйствомылэн кивалтӥсезлы - Ильгам Мансурович Шакировлы. Ильгам Мансурович - тыршись, кыдёке азьпала учкыса ужась, выль азинсконъёслэсь кышкасьтэм, аслаз ужъёсыз понна сюлмаськись кивалтӥсь.

Тазалык но шудбур сюресчи мед луозы солэн улоназ. Семьяяз но ваньмыз умой мед луоз.

Фермалэн заведующиез Алсу Магсумовна Гарифзянова. Алсу Магсумовна азьло

«Смаиль» колхозлэн азьветлӥсь скал кыскисез вал. Соин но со скал кыскон ужез умой тодэ. «Ужасьёсы тросэз Сизнер гуртысь. Туж визьмоесь, сюлмысь ужало, ваньзэ куспамы кенешыса, кельшыса ужаськом. Сыӵе нылпиос вордэмдылы тау», - шуиз Алсу лыктэм анайёслы. Заведующая милемлы фермаез возьматӥз, валэктыса вераз, сётэм юанъёслы рос-прос валэктон сётӥз. Котыр ваньзэ учкыса потэммы бере, милемыз пӧсь табанен чай но вите вал ини ӝӧк вылын.

Милям, Сизнер гуртысь экскурсие ветлэм пенсионеръёслэн, бадӟым тау кареммы потэ Ильгам Мансуровичлы, Султан Ибрагимовичлы, Алсу Магсумовналы, Раиса Николаевналы, Гузалиялы но скал кыскисьёслы.

Сизнер гуртысь пенсионеръёслэн нимынызы Антонида Васильева

Реклама
Теги: 250
Нравится
Поделиться:
Реклама
Комментарии (0)
Осталось символов: