Выльдӥськем «Романтик»

Тулыс Дефак Авхатшинэн кивалтоно «Балтасидорсервис» лэсьтӥськонъя организация 4 миллион 825 сюрс манет тыр лэсьтӥськон ужъёс быдэстӥз. Столовоез бадӟыматӥзы, шутэтскись нылпиос улоно одӥг корпусын нылъёс но пиос, вожатойёс понна нимаз комнатаос, мисьтӥськон люкет ужаськиз. Вакчияк вераса, нылпиос понна но, вожатойёс понна каньыллыкъёс кылдытэмын.

- Республикаысь Внутренней ужъёсъя министерствоысен лыктэм комиссия «Романтик» лагерьлэсь дасьлыксэ туж вылӥ дунъяз. Та понна районэн кивалтӥсьёслы, ужамзы понна но юрттэт возьматэм котькинлы ми туж тау кариськом. «Балтасидорсервис» лэсьтӥськонъя организацилы быгатыса ремонт каремез понна, вань школаослы та уже активно пыриськемзы понна но тау кареме потэ, - шуиз районысь дышетонъя управленилэн кивалтӥсез Алия Закиева.

Нырысетӥ сменаын шутэтскем 90 валтӥсь-лидер дышетскисьёслы но воштӥськонъёс туж кельшизы.

- Марий Элысь «Лесная сказка», Татарстанысь мукет лагерьёсын шутэтскеме луиз ке но, та дырозь «Романтике» мынэме ӧй вал. Отысь чеберлыкез вераса быдтымон ӧвӧл. Лагерьын ортчытэм котькуд нунал вунонтэм одӥг тодэ ваён луыса мылкыдэ кылиз. Вожатойёслэсь, эшъёслэсь люкиськеме ӧз поты. Али но лагерьлэсь мӧзмисько. Ини кык пол куное мынӥ, - шуэ Балтасьысь Илюза Габдрахманова.

25-тӥ июньысен лагерь кыкетӥ сменаысь нылпиосты кутӥз. Преимущество бюджет системаын ужасьёслы сётӥськиз. 126 пинал 21 нунал ӵоже ог-огенызы кусып возьыса, шудыса, шутэтскыса, кужым люкалоз.

Нылпиосын ужась вожатойёс асьме районысь, пӧртэм средней но вылӥ дышетскон юртъёсын тодон-валан басьтӥсь студентъёс. Лагерьлэн валтӥсь кузёезлэн - кивалтӥсезлэн Ильяс Галимуллинлэн верамезъя, соос пӧлын пиослэн уно луэмзы ужез шӧдскымон капчиятэм, нылпиослэн но соосын кусыпсы умой.

Сюдон понна продукциез нунал потэм ваё, сиён пӧзьтӥсьёс но вылӥ квалификациен, соин ик сиёнзэс кельтэм нылпиос ӧвӧл, шуо соос.

17-тӥ июльысен «Романтик» куинетӥ сменае пиналъёсты кутоз. Татын 120 нылпи 4-тӥ августозь патриотической направлениен шутэтскоз шуыса чаклаське.