Выль ар – выль клубын

Кин гинэ ӧй вал отын – пуныосыз но, Мальвинаос но, Баба Яга но, каламбурысь геройёс но, озьы ик атасъёс но. «Огпол выль ар уйе» пуктэм сценказы но туж ушъямон вал. Нимысьтыз висъяны кулэ Людмила Фоминалэсь, Тамара Васильевалэсь, Денис Никифоровлэсь сценкаын шудэмзэс. Кылсярысь, Денис туж усто, быгатыса шудӥз – векчи шырпи куараен вераськыны быгатӥз. Туж тыршыса но быгатыса шудӥзы артистъёсмы. Аслаз жингрес куараеныз но шулдыр кырӟанъёсыныз милемыз озьы ик шумпоттӥз Алёна Анисимова. Праздникмы туж шулдыр ортчиз, малы ке шуоно Тол бабаен Лымы нылмы но вань вал. Соосты но ушъяса вераме потэ, рользэс туж усто шудӥзы, Тол бабай пинал ке но вал, туж быгатӥз. Мызганэн шудӥсь Валерий Петров гурт калыкез аслаз устолыкеныз шумпоттӥз. Соин сомында адями люкаськиз шуыса паймонэз но ӧвӧл, пуксьыны интыез ик ӧй вал. Быгатэ ук гурт калык шулдыръяськыны но праздник мылкыд кылдытыны! Та ужрадэз радъямез но ортчытэмез понна бадӟым тау Мария Матвеевалы – Ярак-Чурма клублэн заведующиезлы. Солэн тыршеменыз праздникмы сыӵе шулдыр ортчиз. Ма, Мариялы гинэ ӧвӧл, ваньзылы бадӟым тау, кин та ужрадэ пыриськиз. Азьланяз но выль клубмы гурт калыкез мед люкалоз, выль талантъёсты мед усьтоз!

Галина Васильева, Покчи Лӧзя гурт