Вылын Ушма гурт: кызьы но ку со кылдэм, кинъёс отын уло но ма сярысь сюлмасько

Вылын Ушма гурт Балтасьлэсь кыдёке интыяськымтэ ке но, со гуртын ми асьмеды чылкак мукет дуннеын кадь шӧдӥмы.

Татын ваньмыз шыпыт, улон нокытчы уг дырты кадь… Вӧл-вӧл паськыт урамын одӥг адями но ӧвӧл (гуртын ӵапак ӟырдыт ужан дыр ук) — ваньзы бакчаосазы выро, дырын-дырын тракторлэн гужгетэм куараез гинэ кылӥське. Кытӥ-отӥ ми шоры, урам кузя ортчись тодмотэм адямиос шоры, лушкем гинэ, адямиос йыръёссэс капка сьӧрысен мычыса, тунсыкъяськыса учкизы. Но вераськыны тросэз ӧз дӥсьтэ — кытысь вуэммес тодыса, капка сьӧразы пегӟылӥзы. Вераськисьёсыз но соос сярысь газетэ гожтонлы пумит луизы. «Эх, возьдаськись калык улэ, лэся, Вылын Ушма гуртын…» — малпамы ми нырысь.  

Но тазьы малпаськыса, янгышаськемы вылэм. Малы ке шуоно гуртын куно карыса, ужзэс кельтыса милемын вераськыса пукыны дась луись адямиос тырмыт шедизы.

Вылын Ушма гуртэз азьвыл «Ушма Гондыргурт» шуиллям

Магсум Мухамметзяновлэн «Сорнай» книгаезлы осконо ке, Вылын Ушма гурт 18 даурын кылдэм. Улӥсьёсыз тросэз Покчи Лӧзя гуртысь выжем удмуртъёс. Гурт ноку но туж бадӟымен лыдъяськымтэ. 1901-тӥ арлы Вылын Ушма гуртын 35 юртъер лыдъяськем, отын огъя 196 адями улэм. Аръёс ортчыса, гурт бадӟымам. Гуртлэн кылдэмез сярысь тунсыко историез милемлы вераз гуртысь кышномурт, кудзэ ми урамысен пумитамы но кудӥз милемыз шумпотыса куно кариз. Со вал Вылын Ушма гуртын улӥсь Иванова Екатерина Денисовна. Кышномурт кема аръёс ӵоже Улын Ушма гуртысь покчиёзо школаын дышетӥсь луыса ужам. Екатерина Денисовна гуртсэ туж яратэ, солэн вуоноез сярысь туж сюлмаське. Вераськонмы луиз гуртлэн историез сярысь.

— Гуртмылэсь историзэ туннэ нуналэ умой тодӥсьёс ӧвӧл но, дыр, ини. Сое туж умой тодэм Вылын Ушма гуртысь Быдӟым ожысь ветеран Петров Геннадий Павлович, туннэ нуналэ со кулэмын ини. Нош Покчи Лӧзя школалэн азьвыл директорез Анатолий Васильевич Степанов (со но кулэмын ини) солэсь верамъёссэ гожтыса газетэ печатлам вал. Со статьяез лыдэ басьтыса, гуртмылэн кылдэмез сярысь верало. Азьло Вылын Ушма гуртмес «Ушма Гондыргурт» шуиллям вылэм. Малы? Малы ке шуоно азьло та гуртэз котькуд ласянь писпуос котыртӥллям. Соин, лэся, гуртэ ӵемысь гондыръёс но вуылӥллям. Соин ик Гондыргурт шуиллям. Нош «Ушма» кыллэн историез, Петров Геннадий Павловичлэн верамезъя, таӵе. Гуртын нырысь трос адями улымтэ, соин та гурт сярысь нокин тодымтэ но. Покчи Лӧзяын но, Улын Ушмаын улӥсьёс но та гуртлэн кылдэмез сярысь тодымтэзы, пе. Вылаз ик адямиос нокытчы потамтэзы но — асьсэос ма будэтӥллям, соин ик кӧтсэс тыриллям, нюлэс но сюдэм. Огъя вераса, палэнысь номыр утчамтэзы. Огвадес татчы ӟучъёс вуыса, бугроос ӵыпыны кутскиллям. Со бугроосты ӵыпыкузы, шепъёссы шуре усиллям но шур кузя кошкиллям. Одӥгез ужась, сое адӟыса, «Ушла, ушла!» шуыса черекъяны кутскем. Озьы тӥни «Гондыргурт» «Ушма Гондыргуртлы» пӧрмем. Со шепъёс Улын Ушма гуртозь вуиллям но, калык валам, отын гурт вань вылэм шуыса. Сыӵе тӥни история вань гуртлэн кылдэмез сярысь, — мадиз Екатерина Денисовна.

Екатерина Денисовнаен кема вераськимы на гуртлэн туннэ нуналэ улонэз сярысь, солэсь сюлэмзэ вӧсь карись моментъёсыз сярысь. Но зэмзэ верано ке, гуртын улӥсьёслэн ваньзылэн огкадесь сюлмаськонъёссы вылэм...

(Азьланьтонэз вань)