Ымусьтон – одӥгез бадӟым праздник (фото)

Вашкала дырысен ик ини сяме пыӵамъя котькуд шаерын та праздникез пӧртэм сямен пусъё. Россиын Ымусьтонэз 10-тӥ даурысен пусйыны кутско. Туала дыре оскись адямиос уйин черке Ымусьтон службае ветлыны мылкыд каро. Служба мыныку, ваньмыз понна тау кароно, вӧсяськоно, кулэмъёсты но буре ваёно. Та нуналэ быдэс семья сиён-юонэн тырмытэм ӝӧк сьӧры люкаське, адямиос ог-огзэс ӟечкылало югыт праздникен, кузьымъёс сёто, умой мылкыд сӥзё.

Инмар Анайлэн Казанской обросэзлы сӥзем черкез лэсьтэмзы дырысен Покчи Лӧзя гуртын Ымусьтон праздник ортчытъяло. Тани туэ но 7 январе Покчи Лӧзя культура юртын мылкыд карисьёс понна ортчиз Ымусьтон праздниклы сӥзем благотворительной ужрад. Татчы пыриськизы 50 пала пиналъёс асьсэлэн анай-атайёсынызы, песяй-бабайёсынызы. Соос ог-огзэс праздникен ӟечкылазы, кузьымъёс басьтӥзы. Озьы ик пиналъёс, асьсэлэсь устолыксэс шараяса, кылбуръёс веразы, кырӟанъёс кырӟазы.

Та нуналэ школаын дышетскисьёс Иисус Христослэн вордскемез сярысь спектакль возьматӥзы. Собере тунсыко шудонъёс ортчытӥськизы. Отец Рафаэл аслэсьтыз ӟечкылан кылъёссэ вераз, ӧтиз вань адямиосты Инмар косэмъя улыны, чидась луыны, озьы ик ӵектӥз пиналъёслы воскресной школае ветлыны. Праздниклэн пумаз котькуд пинал Тол бабайлэсь но Лымы ныллэсь кузьым басьтӥз. Вераны кулэ, кузьымъёс черке ветлӥсьёслэн кужыменызы дасямын вал шуыса. Огъя вераса, котькуд лыктэм мурт капчи но шулдыр мылкыд басьтӥз та ужрадлэсь.

Оскем потэ, азьпалан но таӵе сям уз вуны шуыса.

Ралина Гараева