Хезмәт

Балтач районы

18+
2024 - Гаилә елы
Азьлане

Ышымтэ на выжымы!

Кылем арняе газетамы Нина Андреевалэн «Одӥг нунал удмурт шаертӥ» шуэм статьяез потэм вал. Нина Николаевналэн ӵем «Азьлане» газетын гожъямъёсыз печатласько, соин ик, малпасько, солэсь гожъямъёссэ витьыса, яратыса лыдӟисьёс вань, дыр. Но таяз учыре мынам соглаш луымтэме вераме но вуттэме потэ.

Нырысь Нина Андреевалэн берпуметӥ статьяысьтыз одӥг люкетсэ цитировать каро, лыдӟисьёсмы ма сярысь верамме син азязы пуктыны мед быгатозы шуыса.

«Жаляса верано луэ, чин удмурт семьяын будэм нылпиос отын (Ижкарын, «Кубыз» фестивальын — ред.) ӧй вал. Таиз ини анай-атайёслэн янгышсы, Ижкарын улыса но анай кыллы дышетэмын ӧвӧл. Соин ик туала егитъёсмы ПЫРАКЛЫ ВЫЖЫЗЭС ЫШТӥЗЫ! Паймыса учки китай ымныро егитъёс кутсконысен пумозяз учкизы шуыса, нош Америкаысь егит пиос милемын ӵош шулдыръяськизы, переводчикен экто ява! НОШ АСЬМЕЛЭСЬ УДМУРТ ПИЯШЪЁСМЕС НО НЫЛАШЪЁСМЕС ГОЗЫЕН НО КЫСКЫСА ПЫРТЫНЫ УД БЫГАТЫ...»

Та чуръёс монэ паймытӥзы гинэ ӧвӧл, ӝоже уськытӥзы, мылкыдме сӧризы. Уг тодӥськы — оло, ачим но егит луэмысь сокем сюлмам йӧтӥзы-а. Мугез ма бордын ӧз ке но луы, журналист луэменым, удмурт егит ныл луэменым, удмурт егитъёслы дурбасьтон вылысь, статья гожтоно кари. (Пусъеме потэ, огшоры аслам малпанъёсы вылэ гинэ пыкъяськыса ӧвӧл). Нина Николаевна туж меӵак гожтэ, удмурт егитъёс пыраклы выжызэс ыштӥзы шуыса. Фестивальын удмурт егитъёсты но пиосты гозыен но кыскыса шулдыръяськонэ пыртыны ӧз луы, пе. Юаме потэ авторлэсь: тӥ ваньзэсты-а фестивале вуэм удмурт егитъёсты чаклады, кыӵе кылын соос верасько, кыӵе ужъёсы пырисько? Мон талы уг оскиськы. Егит удмуртъёс анай кылзэс кулэ уг каро шуыса гожтыны капчи, но со понна оскытымон фактъёс но луыны кулэ ук. Котькуд верам но гожтэм кыллы валэктон луыны кулэ шуыса дышетӥзы милемыз журналистикая факультетын, малы ке шуоно журналистъёс (озьы ик котькуд газетэ гожъясьёс но) котькуд гожтэм буквазы понна адями азьын туж бадӟым кыл куто, адямилэсь улонваланзэ кылдыто.

Нырысетӥез, ма бордысен кутскеме потэ, егитъёс пыраклы выжызэс ыштӥзы шуэм кылъёс шонер шуыса уг малпаськы. Соглаш луисько, туала дыре тросэз егитъёс уг верасько анай кылэнызы, кин ке возьдаське, кин ке огшоры кулэ уг кары (секрет ӧвӧл, таӵе тенденция котьку луэм, тужгес но городын). Но вань егитъёс сярысь тазьы шуыны уг луы, та туж бадӟым янгыш. Сыӵе верам кылэн адямилэсь кӧтзэ ӝож карыны луэ, но самой валтӥсез но кышкытэз — лыдӟисьёслы шонертэм ивор вуттыны луэ. Ачим но та фестивальын вал, мон дорын кык егит нылъёс чылкак удмурт кылын вераськизы, фестивале лыктэмзылы шумпотыса кизэс кужмо чабизы, туспуктэмъёс лэсьтӥзы, эсьмаса селфи но каризы. Со сяна вань вал фестивальын егит учкисьёс, кудъёсыз флешмобе но пыриськизы. Сцена вылын кырӟасьёс но кубызэн шудӥсьёс пӧлын но бен ӧй вал шат егитъёс? Чылкак удмурт кылын вераськись егитъёс.

Кыкетӥез, автор вера, китай ымныро пиос но америкаысь егитъёс милемын ӵош шулдыръяськизы шуыса, нош асьмелэнъёсты, пе, гозыен кыскыса уд пырты. Асьме егитъёсмес Америкае я Китае нуыса уте ай — соос отын одӥг шулдыръяськонэз но уз кельтэ, котькудаз мыло-кыдо пыриськозы, малы ке шуоно отын соос понна ваньмыз паймымон но аспӧртэмлыко луоз. Вот асьме дорын но кунгож сьӧрын улӥсьёслы сыӵегес ик вал, дыр — ваньмыз выль но тунсыко.

Куинетӥез, егитъёслы дурбасьтон вылысь, нимаз вераме потэ «БиГерд» форум сярысь, шонергес вераны кулэ, солэн йылпумъянъёсыз сярысь. Кин ке, оло, малпа форум луиз но ортчиз, егитъёс люкиськизы но озьыен ваньмыз быриз шуыса. Ӧвӧл! Егитъёс юн кусып возё, соослэн «Вконтакте» вотэсбамын нимаз группазы но беседазы вань. Беседаын мон ачим но вань, мынам сузэре но, трос тодмоосы но. Гожъяськиськом ваньмыз сярысь — кин маин выре, кин кытчы дышетскыны пырем, кин кытчы куное ветлэм...конечно, удмурт кылын. А ведь та беседаын Удмуртиысь но, Ижкарысь но егитъёс вань, Нина Николаевна. Соос тӥлесьтыд «туала егитъёсмы пыраклы выжызэс ыштӥзы!» чуръёстэс лыдӟысалзы ке, ӝожтӥськысалзы, дыр.

Ньылетӥез, нимаз вераме потэ аслам яратоно уже сярысь. Уг ватӥськы — редакциын ужаны кутскытозям ӟуч кылын трос вераськисько вал, ачим чылкак удмурт нылаш ке но. Таиз понна возьыт. Но ужаны кутскеме бере валай: удмурт кылын гожъяно, удмурт кылэз ӝутоно. Тужгес но егитъёс пӧлын. Соин но, аслам мылкыды луыса, удмурт кылын гожъяськыны быгатыса-быгатытэк кутски, выльысь удмурт кылъёсты дышетски, трос выльзэ аслым басьтӥ... Басьтӥ но басьтӥсько, нуналысь нуналэ опыт люкасько. Статьяосме но огшоры гинэ уг гожъяськы, тыршисько адямиослэсь мылкыдзэс тодыны, озьы ик егитъёслэсь но. Шумпотыса вераме луэ, егитъёс лыдӟо газетэз. Сыӵеос трос ӧвӧл ке но, вань. Кылем арын декабрь толэзе газетамы «Возьдасько-а туала егитъёс удмурт кылын вераськыны» шуэм статья потэм вал, кудаз районысь удмурт егитъёс пӧлын юалляськон ортчытӥ. Та статьяез куинь адями (та али мон тодэмъя гинэ) интернетын Вконтакте но Инстаграм вотэсбамазы туспуктыса тыриллям вал. «Данъяськисько», «Анай кылме яратӥсько, вордскем кылын мон но вераськисько» шуэм кинюртэмъёсын. Та мар сярысь вера? Егитъёс, ваньзы ӧвӧл ке но, удмурт кылэз тодо, гажало, удмурт статьяосты но лыдӟо. 

Витетӥез. Туала дыре тросэз удмурт егитъёс кузпаллы удмуртъёсты ик быръё. Ваньзы ӧвӧл, конечно, но таӵе тенденция шӧдске. Удмурт пияшъёс, удмурт нылъёсты шедьтон понна, мукет удмурт гуртъёсы ветло (шумпотымон, районамы удмурт гуртъёс ӧжыт ӧвӧл). Татын сюлмазы кельшымон ныл ӧз ке шедьтэ ни, Кукмор ёросысь удмурт нылъёс доры но ветло вылэм. (Нош ик пусъеме потэ, огшоры малпаса гожтэм кылъёс ӧвӧл та, асьме районысь егит пиослэн верам кылъёссы (валамон мугъёсъя нимъёссэс уг гожтӥськы — Н.Ж.). Та сярысь Кукмор ёросысь Ныръя шоръёзо школаысь дышетӥсь Владимир Туймурзович Жуков но мыным туэ гужемлэн кутсконаз серекъяса верам вал: «Милям пиос шошма нылъёсты чебер каро ай, со палась трос егитъёсмы асьсэлы кышно вайизы ни».

Трос гожъяны луэ та темая. Но статья Нина Николаевнаез янгыше уськытон понна гожтэмын ӧвӧл. Солэн улонын опытэз но бадӟымгес. Валасько, мон егит, троссэ уг тодӥськы, уг валаськы. Но ма сярысь оскытыса вераны быгатӥсько — созэ мон гожтӥ. Мынам лыдӟисьёслы вуттэме гинэ потӥз аслэсьтым малпанме, статьяен соглаш луымтэме. Малпасько, котькуд лыдӟисьлэн та сярысь ас малпанэз кылдоз шуыса.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: егитъёс удмуртъёс