Хезмәт

Юн мылкыдоос гинэ улонын сюрес усьтыса мыныны быгато

Со ноку но уг ӝожтӥськы, ноку но уг ушъяськы. Котьку жингыртӥд ке но: «Улон-вылон умой, каллен гинэ огпормы ужаськомы», - шуэ. Ужез гурласа мыныку но тазьы луиз, шуг-секытысь потыны быгатонтэм дыръёсаз но тазьы шуылӥз. Малы ке шуоно сямез сыӵе.

Фаритэз мон кемалась тодӥсько. Комсомоллэн секретарез луэм дырысен. Аслаз 15 ар кивалтэм Тимирязев нимо хозяйствояз соку со огшоры гинэ инженер вал. Соку ик ини аслаз нимысьтыз малпанъёсыныз, ӝотак пыр потӥсь кыло луэменыз тодэ кылем. Мукетъёслы пумит луыса, огназ кыле ке но, ас малпанэзлы оскымон луэ вал. Аръёс ортчыса, пӧртэм вылӥ тубатъёсы тубыса но сямыз ӧз воштӥськы. «Агроснаб»-лэн директорезлэн воштӥсез, Тукай нимо хозяйстволэн председателез луыса ужакуз но берен Тимирязеве - та сюресаз ини председатель луыса - берытскыса но сыӵе ик ваменэс луыса кылиз. Сэрттонтэм-пертчонтэм секыт учыръёсы но шедьылӥз, пӧртэм конфликтъёс пыр но потылӥз. Нош мынам малпамея, ӵапак та сямез солы шуг-секытъёсты вормыны юрттӥз но кадь.
«Эх, таӵе сямыз ӧй ке луысал! Кин луысал меда со?!»- шуо сое умойгес тодӥсьёс. Сюлмысенызы верало. Со кадь трос тодӥсь-валась, тунсыкъяськись кивалтӥсьёс, жаляса верано, али дыре чиньыен гинэ лыдъямон. Котькуд выльзэ со мукетъёслэсь азьлогес кылэ, уж вылын кутыса уте. Утэм, келян дыръёсыз но луыло, нош та но сое дугдытыны уг быгаты.
2000-тӥ аръёслэн кутсконаз Фарит Гирфанов пудо вордонын шундыпуксёнпалась технологиез уже кутонэн выриз. Али республикаын та сярысь куинь-ньыль аръёс ортчыса гинэ Алькеевск районын тужгес но бадӟым выльдӥськон карыса ӵаш поттӥзы. Та дырозь ини Фарит «Де-Ловалез» уже кутыса, аслэсьтыз шонер луэмзэ юнматыны но вутскем вал. Трос йӧл кыскыны дышетон понна кӧня ке пол лыктыса кошкем немец тодосчиос понна но, трос расходъёс поттыса, молокопроводъёс кыскемез понна но уно кыл йӧтӥз солы соку. Тыршемез юнме ӧз луы: одӥг ар куспын хозяйство йӧл кысконъя районын дас укмысэтӥ интыысен куинетӥ интые «тэтчиз». «Де-Ловаль» улоназы бадӟым кулэяськонлы пӧрмиз. Музъем ужан удысын элита сортъёсты кутонын, кидыс будэтонэн выронын но районын нырысетӥ «ваёбыж» луиз шуыса тодӥсько. Лэсьтэм ужъёсыз бервылтэк ӧз кыле - 2004-тӥ арын «Татарстанысь гурт хозяйствоысь дано ужась» ним басьтӥз.
Россилэн генофондаз пыртэм, со ик дыре нокинлы но кулэ луымтэ выжы ыжъёсты утьыса кельтон понна ас кыл вылаз сылыса, дасо аръёс ӵоже нюръяськемзэ вералод-а нош? Тунсыко, со кадьёслэн но осконзы чигиське вылэм. «Парсьёсты но, ыжъёсты но быдтӥмы. Гидъёсты воштыса лэсьтӥськонъёс мыно. Килиысь одӥг гидэ кунянъёс пыртӥмы, мукетаз 200 йыр скал пыртыны чакласькомы. Чыры-пыры ужъёс гинэ кылизы ни» шуыса, вера со али.
Куд-ог кивалтӥсьлэн кабинетаз одӥг газет-журнал но синме уг йӧты, нош Фаритлэн кабинетаз соос люкен-люкен. Таосыз лыдӟемын, таосыз али лыдӟымтэ, таосыз кулэосыз... шуыса, пӧртэм люкъёслы люкемын. Гумыраз тазьы луиз. Адӟымтэ, кылымтэ журналъёс басьтыса лыдӟылӥз. Вылӥ тодон-валанэн гурт хозяйствоя инженер-механиклэн гинэ ӧнерез ӧз тырмы, экономикая но кыкетӥ вылӥ тодон-валан басьтӥз. …вӧл, таин гинэ но ӧз дугды - аспирантурае дышетскыны пыриз, кандидатлэсь диссертацизэ утиз. Буйгатскисьтэмлэн мылкыдыз ялан воштӥськонъёс, выльдӥськонъёс курыса улэ, угось.
Тодмо ни, солэн кивалтэмез улсын ужасьёслы но, соин кивалтӥсьёслы но капчи ӧвӧл. Кема аръёс ӵоже артэ хозяйствоен кивалтэм, Фаритэн кенешыса ужам, туннэ районлэн главаез луэм Рамиль Нутфуллин мукет малпанэн: «Гурт понна сюлэмыз висьыса улэм, мед луоз шуыса ужась, тыршись кивалтӥсь со. Куинь ар гинэ председатель луыса ужаз ке но, Тукай нимо хозяйстволы соку «кыкетӥ шокан» сётӥз. Отысен шӧдскымон проблемаё Тимирязев нимо хозяйствое лыктӥз. Тани дас вить ар ӵоже ини умой гинэ кивалтэ.
Районамы музъем ужанэ, пудо вордонэ Фарит Ильгизовичлэсь практикае пыртэм выльёссэ, воштӥськонъёсты адӟытэк, дунъятэк кыльымон ӧвӧл. «Де-Ловальёс» шуиськоды-а, элита сортъёсты будэтыса вузаны кутсконъёс-а, комбикорм поттонъя мини-завод лэсьтон-а, селекцияя ужын выль учёт формаос-а... Вакчияк вераку, милемыз, соин ӵош одӥг дыре кивалтыны кутскемъёсты, ӧжыт ӧз «лӧпкытъя» со. Председатель луыса ужаку, соин ӵош выльдӥськонъёс сьӧрын трос ветлӥмы, трос дышетскимы. Огъя вераса, зэмос кивалтӥсь со».

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: