Хезмәт

Юртлы шуныт сётӥсьёс

Анайлэсь нуналзэ официально бадӟым праздник карыны кутскем аръёсы торжественной люкаськонлэн трибунаысеныз соку районлэн главаез луэм Марат Хайевич Зариповлэн верамез сюлме пыӵаса кылиз.

- Мазэ веранэз, асьмеос нырысь ик трос нылпи будэтэм анайёсты мукетъёслы примере пуктӥськомы, ушъяськомы. Со дыре ик кык яке одӥг гинэ пиналэз будэтыса адями карем анайёс но, одно ик, гажамон, - шуэм вал.
Зэмзэ ик, сюлэм емышез луэм яратонзэ нонтыса, пичи дыръяз гинэ ӧвӧл, гумырыз ӵоже сильтӧллэсь утьыса, соосты улонлы ярась, ӟеч мылкыдо, котьмалы быгатӥсь карыса будэтон понна паймымон бадӟым ответственность но дунъяса быдтонтэм тыршон кулэ. Анайлэсь таӵе оскымон, шырыт луэмзэ, лазегомисьтэм сюлэм шунытсэ дунъяны тодэм котькудмылы асьмелы улон кузьмам анаез кадырланы но сӥё-дано карыны кулэ. Сое верасько: семьяын нылпи будэтыса кадырлы луон социалистической ӵошатсконысь азьмынӥсьёсты кылдытэм социализм вакытэ али кадь туж данъямон маке яке ӧй вал ук. Соин ик семьяын кык-куинь нылпи будэтон сяме пырыса кылиз.
Мон та пичи гинэ статьяям мукетъёслэсь олома висъяськыса улымтэ огшоры одӥг семья сярысь гожтоно луи.
Одӥг нуналэ озьы, сюбег тыкырыктӥ ветстанция пала васькисько, укнояз чебер гыльёс будэм юртысь пумитам Мунавара Мингазева потӥз, бускельёсыз доры йӧллы мынэ вылэм. Каньылэн гинэ улон-вылонзэ юалляськемелы пумитам:
- Тямыстон аресам вуи ук ини, Фарида, олома ужаны уг луы, синъёсы но ляб адӟо, озьы ке но корка котырын каллен ветлӥсько али, - шуэ. Со дыре ик Кадрия кенэз сярысь но вераны уг вунэты: - Туж ӟеч, каньыл мылкыдо луиз кенэ. Соин ик улонлы уг ӝожтӥськиськы, нылпиосы, внукъёсы котькудӥз монэ туж гажало, матын каро. Кык ныл, одӥг пи будэтэм Мунавара апай кема аръёс ӵоже райпо системаын валтӥсь бухгалтер луыса ужаз, требовательной, юрттӥсь луэменыз висъяськыса улӥз. Нылъёсыз Зухра но Гузель медсестралэсь ӧнерзэ бырйыса янгышамтэзы, Зухра али но район больницаын самой опытэн кадрен лыдъяське. Тахир пиез но улонын ас интызэ шедьтӥз, Кадрияен тупаса уло, одӥг пи будэтыса, корка лэсьтыса яна поттӥзы. Юртсылэсь семья очагзэ шудбуро карыса возем Комзаводысь кен луыса лыктэм Кадрия районысь почта отделениын газет-журналъёслы гожтӥськон понна кылкутэ, со ужзэ пыр-поч, сюлмысен быдэсъясь, лякыт сямо адями. Котькин куриськонэн вазиськиз ке но, ӟеч мылкыдзэ возьматыса, кулэезъя валэктыны тодэ, ӝегатскытэк юрттэ. Ас кылызлы кузё, шонер, ужез яратӥсь луэменыз но висъяське. Мукетъёслы ӟеч лэсьтыса шумпотыны тодӥсь адями шуыса но тодӥсько мон сое.
Та статьяен валче, али ас поннам лыдъяса потӥ, ми палась урамъёсын но анайзыенызы ог-огзы понна сюлмаськыса, тупаса улӥсь адӟем карымон семьяос, быгатӥсь, ӟеч мылкыдо кенъёс трос вылэм. Анайлэн нуналэныз валче сыӵеослы но соослэн сазь визен семьялэсь шудбуро улонзэ утьыны тодэм анайзыослы гажан но кык поллы трос кулэ, дыр. Яратыны быгатӥсь нылкышноосмылэн котькудӥз юртлы шуныт, чеберлык сётӥсь луэ ук.
Фото: http://nashamama.com/pidlitkoviivik/page/2.html

Без социаль челтәрләрдә: ИнстаграмИнстаграм ВКонтакте, ВКонтакте, ТикТок, Ютуб, Одноклассники, Телеграм, Фейсбук, Твиттер, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: