Задор вамышты азьпал улон сюрестӥд!

Семён Степанович школаез йылпумъяса Германиын Франкфурт на Майне городын служить кариз. Армиысь бертэм бераз кӧня ке улосъёсты, городъёсты котыръяз: Коми Республикаын улӥз-ужаз, Вятские Поляны городын "Молот" заводын ужаз… Бератаз туж "крутой", шаян, городской егит адямилы пӧрмиз (учке туспуктэмез). Сабырлы но каньыл сямо Починкаысь нылашен - Нинаен пумиськемез бере вордскем гуртаз выжы лэзиз. Кузпалъяськемез бере Семён востэм, зӥбыт сямо, йыг-йыг воргоронлы пӧрмиз. Али но пумтэм паймисько: кызьы со улон-вылон шоры учконзэ чутрак воштыны быгатӥз. Табере со рос-прос, юн юртъер возись пиосмурт. Пенсие потытозяз тани "Труд" колхозын тырше. Нырысь "КамАЗ" машинаен ужаз, соку солы "КАЗ" ним но лякизы. Собере трос аръёс ӵоже Нинаеныз ӵошен фермаын тыршизы.

Кузпалъёс синмаськымонэсь вить нылпиоссэс быдэ вуттӥзы, соос портэм удысъёсын ужась специалистъёс луизы. Саша - автомашинаосты тупатъянъя ужбергатӥсь луиз. Володя но ас улон удыссэ шедьтӥз. Кыксылэн ик семьяоссы, нылпиоссы вань ини. Вася та нуналъёсы армиысь вуиз, солэн бертэмез атаезлы кузьым выллем луиз. Оля но Ирина нылъёссы Казаньын ужало. Корка котырзэс та нылъёс котьку шулдыр, чылкыт но ӝикыт утялтыса возё. Кинъёслы ке туж удалтоз, дыр, таӵе кенъёсын. Та эшлыко но мыло-кыдо семьяын пырись муртъёсты, ӵыжы-выжыоссэс котьку шуныт пумитало. Кунооссэс сюлмысь, ӝутскем мылкыдэн но ӝӧквылтыр сиён-юонэн кунояло. Данъяськисько но шумпотӥсько таӵе ӵыжы-выжыоссы вань шуыса.

Гажано иськавын Семён! Ӟечкыласько тонэ котырес лыдпусэныд! Сӥзисько тазалык, капчи мылкыд но дыась кужым. Задор вамышты азьпал улон сюрестӥд! Нясь-нясь шуныт коркаяд Нинаеныд шудо-буро мед улоды. Нылпиосыд ог-огзэс гажаса мед улозы, семьяедлэсь данзэ мед ӝутозы. Пичи но мусо нунокъёсыд мед шумпоттозы.