Хезмәт

ЖИНГРЕС УДМУРТ ФОЛЬКЛОР

12-тӥ мартэ Балтась культура центрын ортчиз «Лул гур» шуыса нимаськись удмурт лулчеберетлы сӥзем фестивальлэн йылпумъян концертэз.

Та ӝытэ культура юртын, кызьы ӟуч калык шуэ, улмолы усьыны но инты ӧй вал.
Концертэз туж усто но быгатыса нуизы Леонид Сапожников но Ирина Чупанова.

Зэмзэ но, данъяськымон узыр ик асьмелэн лул ваньбурмы! Та ужрад нош одӥг пол сое валаны юрттӥз.
Удмуртлыкез данъяса, та чебер ужрадэз усьтӥз Вуж Кушкетысь «Вуюись» ансамбль. Соос учкисьёсты Семык возь вылэ вуттӥзы. Быртыкен-быртыкен бичам марӟан пырыос кадь огез бӧрсьы мукетыз итӥськыса чузъяськизы жингрес удмурт кырӟан гуръёс, ӟырдыт эктонъёс. Песяй-бабайёсмылэн лул-сюлэм «шыкысысьтызы» поттэм «Зоутэн кырӟанъёс» но учкисьёслэсь мылкыдзэс бугыртӥзы, дыр. Сюан-а со, корка пырон-а яке армие келян-а - одно ик соосты кырӟаськом уга асьмеос. «Шошма удмуртъёслэн гимнзы», шуыса пусъё, пе, соосты тодосчиос. Леонид Сапожниковлэн кивалтэмез улсын Сырья гурт клубысь коллектив ӵапак сыӵе кырӟанъёсты быдэстӥз.

Пӧртэм крезьгур шудонъёсын эшъяськемзэс но возьматӥзы асьме артистъёсмы. Ӟаны культура юртысь, Карек-Серма клубысь но Ципья культура юртысь усточиос возьматӥзы та удысын асьсэлэсь быгатэмзэс. Нялтас вераса, Ципья черкогуртысь фольклор коллективез но кивалтӥсьсэс Евгения Михайловаез нимысьтыз пусйыны кулэ, дыр. Ципья аслэсьтыз зэмос удмурт гурт луэмзэ юнматӥз. Туж зол пӧрмизы выступлениоссы, усто, быгатыса возизы асьсэды сценаын. Мукет коллективъёсты курлан ӧвӧл та. Ваньзы пыр-поч дасяськиллям.

Огыр-бугыр вакытэ таӵе ужрадъёс асьмелы ог-огенымы пумиськыны, кусып возьыны луонлык кылдыто, огазеяло асьмеды огъя удмурт семьяе. Тӥни озьы «Лул гур» фестивале но асьмеды матын карыса бускельёсмы лыктӥллям вал - Кукмор ёросысь удмурт калык ансамбль «Инвожо» чебер кырӟан-эктонэнызы шумпоттӥзы.

Та бадӟым ужрадэз сӥё-дано йылпумъяса, исполкомлэн кивалтӥсезлэн воштӥсез Ильгам Фидаилевич Гайнетдинов кыл вераз, ваньзэсты ӟечкылаз, самодеятельной коллективъёслэсь кивалтӥсьёссэс синпель дипломъёсын но коньдонкузьымен пусйиз. Нимысьтыз вераны кулэ, Покчи Лӧзя культура юртысь коллективлэсь кивалтӥсьсэ Галина Петроваез Удмурт Элькунлэн кивалтӥсезлэн Таукарон гожтэтэныз но шумпоттӥзы.

Тӥни озьы «Лул гур» фестиваль зэмос праздниклы пӧрмиз. Кӧня муртлэсь огшоры огсыр улонзэ огдырлы ке но кырӟась-шудӥсь кариз, вунӥсь йылолъёсты выльдӥз, мылкыдъёссэс бурдъяз!
Кылем туспуктэмъёсты фотогалереяысь учке.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: