Хезмәт

Жуков Николай Валентиновичлэн биографиез

Жуков Николай Валентинович (14.04.1966 — 11.07.2017) вордскиз асьме ёросамы Сырья гуртын. Атаез — Валентин Васильевич — комбайнёр вал, шудылӥз аккордеонэн, мызганэн. Анаез — Мария Демидовна — вань улонзэ колхозын тыршиз, кырӟаны туж яратӥз, балалайкаен но шудылэ вал.

Анай-атаезлэн ик музыкальной быгатонлыкъёсыз пыӵаллям Коля агайлы.

Николай Валентинович нырысь Сырья покчиёзо школаын, собере Ципья шоръёзо школаын дышетскиз. Соин ик куинь кылъёсты тодӥз — удмурт, ӟуч но бигер. Школазэ йылпумъямез бере 2 ар армиын служить каре, пограничной войскоосын, Амур областьын. 1987-тӥ арын Ципья сельсоветын военной учётъя начальник должностьын ужаны кутске. Но татын кема уг ужа — одӥг арскын Удмуртие улыны выже. Кошкем араз ик аслаз одноклассницаеныз, Сизнерысь Лидия Сергееваен, семья кылдытэ. Ужа Николай Валентинович Вишур культура юртын директор луыса. Но ини кӧня ке арняскын со Пичи Сюга культура юртэ директор луыса ужаны выже, та гуртын ик солы юрт но сёто. Та дырысен Коля агайлэн вань улонэз Можга ёросэн, Удмуртиен герӟаське.

Пичи дырысеныз ик Николай Валентинович яратэм техникаен вырыны, пулэсь узоръёс лэсьтыны но ... музыкаез яратэм. Каникулъёсаз атаезлы ужаны юрттыкуз техникаосты тупатыны дышем. Гуртын ик дышетскем пулэсь пӧртэм узоръёс лэсьтыны но. Пуэз обработать каронъя цех кылдытӥз, малпаз но радъяз циркулярной пила, электрорубанок, токарной но фрезерной станокъёс, пилорама... Колягайлэн аслаз коркаез урам паласен но, пуш паласен но пӧртэм наличникъёсын чебермамын, аслаз лэсьтэм мебеленыз радъямын. Но тужгес но яратӥз со музыкаез. Со вал улонэзлэн пуштросэз. Пичи дырысеныз ик атаез басьтэм пиезлы мызган, собере ини баян но аккордеон. Агаез шоры учкыса мызганэн шудыны кутскем Николайлэн выныз Леонид но.

Можгаысь районной культура юртын Николай Валентинович аккомпаниатор вал. Соин ик сотэк одӥг праздник но ортчымтэ. Аслаз гуртаз, Пичи Сюгаын, Коля агай «Ивушка», «Вуюись», «Припевки» кырӟанъя коллективъёсты кылдытэм. Нылпиосты мызганэн но шудыны дышетэм. 2011 арын районысь культура юртын инвалидъёслэн «Весёлые напевы» ансамбльзы ужаны кутскем. «Капчи мылкыд» ансамблез но кылдытӥсь Николай Жуков луэ. Коллективъёс кылдытэм сяна, мызганэн шудэм но кырӟамез сяна, Коля агайлэн крезьгуран талантэз но усьтӥське. Удмуртиысь А. Е. Белоногов кылбурчилэн кылъёсызлы гинэ кӧня гуръёс гожтэм Николай Валентинович — «Пумиськон», «Кин кельше ке сюлэме», «Оло, пумиськом ик на» кырӟанъёс. Ашальчи Окилэн кылбурезлы но «Шунды кадь ик чебер» кырӟан гожтэм. Огъя вераса, 70-лы матэ кырӟанъёс. Но, жаляса верано, ог 10-сэ гинэ архивысьтыз шедьтӥллям.

Улон гумырыз вакчи ке но луиз, Николай Жуков трос грамотаос басьтыны вутскиз, трос наградаосын пусйиськиз. Ваньзэ лыдъяны кутскид ке, 30 мында люкасько, коллективъёсызлэсь грамотаоссэ лыдъяд ке — 80-лы матын. Юнме гинэ Николай Валентиновичлы УР-ысь культура удысысь сӥё-дано ужась ним сётымтэзы...

 

Нравится
Поделиться:
Реклама
Комментарии (0)
Осталось символов: