Рәмзия Әхмадуллинадан җиләк-җимеш куакларын язгы эшкәртү буенча берничә киңәш

Җиләк-җимеш куакларын, агачларын язгы эшкәртү бөреләр ачылганчы башкарыла. Куакларны өч төрле эшкәртү сорала:

төрле авырулардан;
корткыч бөҗәкләрдән;
агач кәүсәләрен агарту.

Беренче итеп авырулардан эшкәртик: бордоская смесь, бакыр купоросы яки инде башка төрле әзер препаратлар (исемнәре төрле була) кулланырга мөмкин. Инструкциясендә күрсәтелгәнчә суга кушып, җилсез көнне барлык ботаклары да юешләнерлек итепсиптерәбез.

Икенче эш итеп корткыч бөҗәкләрдән профилактика ясыйбыз: Искра, Фетоверм, Биотлин һәм башка препаратларны кулланабыз.
Ике эшне берьюлы да эшләргә мөмкин. Ике төрле ( бөҗәкләрдән+авырулардан) препаратны бергә кушып сиптерәбез.

Өченче эш итеп агач кәүсәләрен агартып куябыз. Агарту, язгы кояш кәүсәне пешермәсен өчен һәм шулай ук корткычлардан профилактика буларак та эшләнә!