Сыларгамы, буяргамы?

Агачларны кискәннән соң, бакча сумаласы (вар) сыларга кушалар. Бу сумала агачтагы җәрәхәтләрне төзәтергә булышамы? Сыйфатлы сумала нинди була?

Бакча сумаласының төп бурычы — агачтагы җәрәхәтләрне төзәтү. Аны ботакларны кискәннән соң, механик һәм кояш пешергән эзләрне сылау өчен кулланалар. Әмма бик сирәк кеше бу сумаланы диаметры 2 см дан калын булмаган ботакларга гына сыларга яраганын белә. Әгәр киселгән ботак шуннан калын икән, майлы буяу белән буярга кирәк.

Тәҗрибәле бакчачылар уздырган тикшеренүләргә таянып, ике ышанычлы сумала тәкъдим итәбез.

• «РанНет» — составында гөмбәле чирләрдән саклый торган бакыр купоросы бар, тиз кибә, яңгырда юылмый.
• «Пчелка» — табигый составлы (балавыз, үсемлек майлары, ылыслылар чәереннән ясала), тигез сылана, яңгырда юылмый, кояшта кибеп ярылмый. Дөрес, озаграк кибә.

Чыганак