Башкарма комитет җитәкчесе Шодада митингта нигә сокланган? (+фоторепортаж)

Илебезгә Советлар Союзы Герое Хафиз Сабировны биргән Шода авылында 8 нче май көнне "Мәңгелек дан Сезгә, авылдашлар!" дип исемләнгән митинг булып узды.Кызганыч, авылда бүген исән калган сугыш ветераннары гына юк. Чарада сугыш чоры балалары, хезмәт һәм тыл ветераннары катнашты. Аларны  район җитәкчелеге исеменнән башкарма комитет җитәкчесе Рамил Шакиров котлады. Бәйрәмне  мәктәп-бакча балалары  әзерләгән монтаж тулыландырды.

- Мәктәп-бакча балаларының аз булуына карамастан, бик матур чара уздырдыгыз һәм шул рәвешле ветераннарыбызны олы бәйрәм белән котлавыгызга бик сокландым. Бүген сез патриотик тәрбиянең чын асылын ачып бирдегез, - диде башкарма комитет җитәкчесе.

Чарада үзләренең матур шигырьләре, җырлары белән авылдашларны, кунакларны сөендергән балаларга килгән һәрбер кеше олы рәхмәтләрен ирештерде. Бөек Җиңүнең 73 еллыгы әнә шундый матур мизгелләр белән тарих битләренә язылды. Бу минутларда һәркемнең күңелендә бер генә теләк иде - ветераннарызга саулык, илләребезгә иминлек насыйп булсын.