Сәдака турында мәшһүр галимебез Ризаэтдин Фәхреддинов:

«Иң элек үз чыгымнарыңны вә хаҗәтләреңне тәмам кыл, аннан калса, хатыныңның хаҗәтенә сарыф ит, аннан да артса, балаларың вә башка якыннарыңның кирәкләрен күзәт. Байлыгың булганда, малыңны ошбу рәвештә сәдака кыл!» Хәдис (Сахих Мөслим)

Мал вә байлыкны тоту хакында Рәсүлүллаһ тарафыннан өйрәтелгән ошбу кагыйдә бик муафикъ бер ысулдыр. Үзе фәкыйрь, балалары ач була торып, кулына төшкән малны башкаларга сарыф итү, яки балаларының маңгай тирләре белән табылган ризыклыкны фәкать бер «афәрин» ишетер вә яки «юмарт» исеме алыр өчен читләргә бирү ахмаклыктыр. Шулай ук, кешеләргә бурычы була торып, киенеп-ясанып йөрү, хатын вә балаларын бизәндерү, йорт-җир вә җиһаз төзү, табын-табын халык җыеп сыйлау (голәмә вә дуслар мәжлесләре ясау) хәстәрсезлек вә ошбу хәдис шәриф өйрәткән ысулның киресе белән гамәл кылучылык булыр. «Иң элек үзеңә сарыф ит!» дигән сүзне «иң элек үзеңне бурычтан һәм җаваплылыктан азат кыл, котылдыр» дип аңларга тиешле.

Үз кирәгенә, хатын вә балалар хаҗәтләренә сарыф итүне Рәсүлүллаһ хәзрәтләре «сәдака» дип атавында өммәт өчен олуг сөенеч бар. Ошбу хәдистә өйрәтелгән тәртип белән малларын сарыф итүчеләр «сәдака» бирүчеләрдән хисап ителәчәк, вә шулар кебек саваплар алуга ирешкәннәр булачаклардыр.

Ризаэтдин Фәхреддин,

«Җәвамигуль – кәлим шәрехе»