Балтачта “Ислам нуры” мәчете ачылды

Мәчетләрнеӊ төзелүе ул ислам динен тотучылар саны артуын гына түгел, ә районыбызныӊ үсештә булуын, аныӊ икътисадыныӊ тотрыклы, кешеләренеӊ аӊ-тормыш дәрәҗәсен күрсәтүче дәлил булып тора. Халык соравын искә алып, үзәк хастаханә ягында яшәүчеләргә дин тотуда уӊайлыклар булдыру максатыннан, бистәдә өченче "Ислам нуры" мәчете сафка басты. Нигезеннән башлап, бинасын салу, түбәсен ябу, аен-манарасы күтәрү кебек зур, күләмле эшләрнеӊ башкарылганы 13 млн. сумнан артык тәшкил иткән. Һәм бу чыгымнар, нигездә шәхси кешеләрнеӊ зур-зур күләмдә керткән хәер акчасы ярдәмендә капланды. Районыбызныӊ аерым оешмалары һәм бистә халкы да бу саваплы эштән читтә калмады. Аскы өлеше белән өч катлы булып күтрелгән бу күркәм бина халыкның, иганәчеләрнең һәм хакимиятнең бердәм теләктәшлек табып, үзара ярдәмләшеп эшләвенең уңай бер мисалы булып толра. Мондый төзелешләрне алып баруда зур тәҗрибә туплаган Наил Сафиуллин җитәкчелегендәге "Стройсервис" оешмасының эше бары уңай яктан гына бәяләнә.

Килгән кунаклар башта үзәк мәчеттә булып, мәдрәсә төзелеше белән таныштылар. Аннары бар халык гимназия тукталышындагы "Бәхет" кибете янына җыелып мәчеткә тәкъбир әйтеп юл алды. Бар халыкның бердәм булып бу тантанага җыелуы тормышыбызда ислам диненең йогынтысы үсүенә, үз кыйбласына кайтуына бер дәлилдер.

Тантанада чыгыш ясаган район башлыгы Рамил Нотфуллин район халкының нәтиҗәле, тырыш, тыныч шартларда эшләвендә традицион диннәрнең килешеп, бердәм эш алып баруларында, дип белдерде. Бу мәчетнең үзәк хастаханә янында булуы аңа үзенчәлекле җаваплылык та өсти. Чөнки кешегә күп вакыт тәненә шифа алу белән беррәттән, рухи терәк тә бик кирәк. Район башлыгы шушы форсаттан файдаланып, әлеге Аллаһ йортын төзүгә һәм файдалануга тапшыруга өлеш кертеп, зур саваплы гамәлләр кылган, ярдәм иткән һәркемгә - гади халыкка, хуҗалык, оешма җитәкчеләренә, шәхси эшмәкәрләргә, районнан читтә яшәсәләр дә, зур саллы матди ярдәм күрсәткән олы йөрәкле шәхесләргә рәхмәтен белдерде. "Ислам нуры"нда азан тавышлары тынмасын, халыкны иманга дәшеп торсын иде", - диде ул.

- Мәчеткә 2007 елда нигез ташлары салынган иде, - дип билгеләп үтте үзенең чыгышында районыбызның мөхтәсибе, Республикабызның Баш казые Җәлил хәзрәт Фазлыев. - Төзелеш торгынлык чорларында башланса да, үзебезнең районнан чыккан мәрхәмәтле кешеләре табылып, аны шушы ачылу хәленә җиткерү өчен зур тырышлык куйдылар, башкалар да читтә калмады. Инде хәзер бистәнең бу өлешендә яшәгән иманлы халыкның өстендә мәчетне эшләтү һәм аны буш тотмау бурычы тора", - дип ассызыклады Җәлил хәзрәт.

Тантанада катнашып чыгыш ясаучылар мәчет эшчәнлегенә уңышлар теләп, Аллаһ йортының халыкны тәрбияләүдә, иманга кайтаруда максатчан гамәлләр кылырлар дигән ышаныч белдерделәр. Соңыннан мәчет ачылышының шаһитлары булган барлык халык белән бергә өйлә намазы укылды.Бинаның төзелешенә хезмәте кергән, аның эшчәнлеген башлап җибәрүдә ярдәме тигән һәркемгә дә рәхмәт җиткерелде, исәнлекләре өчен дога кылынды.

Фотоларны тулы күләмдә фотогалереяда карагыз.