Биктәштә халык активлашты, дин көчәйде

–Соңгы елларда бездә авыл халкы бик активлашты, дин дә көчәя. Без моңа бик сөенәбез. 2014 елда авылдашыбыз Геннадий Васильев акчасына, бөтен авыл тырышлыгы белән дүрт айда чиркәү өлгерткән идек. Соңгысына моның дә йогынтысы күп булды. Әле авылда дини йолаларны белән, үти торган әбиләребез бар иде, хәзер инде яшьләребез дә тартыла. Чиркәүгә йөрүчеләр арасында да андыйлар шактый. Бәйрәм көннәрендә урын да калмый хәтта. Питрау, Качману, Пасханы хәзер зурлап, бөтен авыл белән бер булып үткәрәбез. Әллә кайлардагы туганнар, дуслар килә. Быелгы Пасхага да ныклап әзерләндек. Авыл бердәм булганда, авыл да яши – без дә башлангыч мәктәбебезне дә саклап калдык, клубыбыз, кибет, фермабыз бар, алтын куллы, булдыклы яшьләребез тырышлыгы белән авыл үсә, зурая, ныгый, дини йолаларыбыз да онытылмый, яңара, дәвам итә, – ди Биктәш авылы старостасы Валерий Михайлов.