Бу чыннан да шулаймы?

Сорауларга Балтач үзәк мәчете имам-хатыйбы Рамил хәзрәт Бикбаев җавап бирә.

— Мөселманнар өчен бар җир дә мәчет, диләр. Бу чыннан да шулаймы?

— Пәйгамбәребез (с. г. в.) әйтте: Миңа җир сәҗдә урыны һәм пакъ итеп кылынды. Минем өммәтемдәге кешегә кайда намаз вакыты җитмәсен, шул урында намаз укыр, дип аңлатты.

Һәр җир мәчет, дигән сүз, ягъни сәҗдә кылып, намаз укый ала торган урын дигәнне аңлата. Ә мәчет хөкеме, анысы инде мөселманнар бергә җыелып, җәмәгать намазы, җомга намазы укый торган җир була.