Дуслар, сездән – сорау, бездән – җавап!

Әлеге сорауга якташыбыз, Казанның Әмәт мәчете имам-хатибы Равил хәзрәт Бикбаев җавап бирә:

– Аллаһ Раббыбыз Коръәни-Кәримдә: “Аллаһ хозурындагы Китапта айлар саны унике, җирне һәм күкләрне яраткан көннән бирле...” – диде (“Тәүбә”, 36). Сәфәр аена килгәндә, ул Аллаһның башка айлары шикелле. Әлеге ай белән бәйле ырым-шырымнарның тамырлары җаһилият чорына барып тоташа. Гарәпләр элек хәтта айларның урыннарын үзгәртә, күчереп тора торган булганнар; сәфәр, шәүвәл айларында никахлашудан курыкканнар. Пәйгамбәребез (с.г.с.) моны тыйды (Гайшә анабыз белән Пәйгамбәребез (с.г.с.) нәкъ менә шәүвәл аенда никахлашкан), сәфәр ае турындагы төрле ырымнарга ышанырга ярамый, дип әйтеп калдырды. Без айдан, көннән түгел, гамәлебездән куркырга тиеш.