Никах укырга ярыймы?

Танышларым өйләнешергә җыена. Берсе Татарстанда яши. Икенчесе гарәп илләреннән күченеп кайткан. Алар төрле мәзһәбтә. Дин буенча аларга никах укырга ярыймы?
 

Сорауга Казандагы «Саләх» мәчете имам-хатыйбы Тимергали хәзрәт ЮЛДАШЕВ җавап бирә.

— Бездә рәсми рәвештә кабул ителгән дүрт мәзһәб бар: Хәнәфи, Шәфигый, Хәнбәли һәм Мәлики. Алар дүртесе дә әһли сөннәт вәль җәмәгать мәзһәбләре булып санала, ягъни Пәйгамбәребез (с. г. в.) һәм аның сәхәбәләре инанган мәзһәбләр. Кайбер гыйбадәтләрдә, гамәлләрдә аермалыклар булса да, дүртесе дә дөрес санала.

Мөселманнарның 80%тан артыгы Хәнәфи мәзһәбендә. Гарәп илләрендә Шәфигый һәм Хәнбәли мәзһәбләре киң таралган. Төрле мәзһәбтәге мөселманнарга никах укытырга ярый. Катнаш никахлардан сакланырга кирәк.