Сорау – сездән, җавап – бездән

Рамил хәзрәт Бикбаев аңлатмасы:
– Рамазан ае ул – изге, мөбарәк ай. Авыз ачтыру бу айда иң саваплы, изге гамәлләрнең берсе булып тора. Аңардан ким дигәндә авыз ачтыру савабы алырга була. Аны мәчеттә дә, өйдә дә үткәрергә мөмкин. Өйдә үткәрә калсаң, син пәйгамбәребез (с.г.в)нең васыятен үтәгән буласың: ул кунакларга кунакчыллык, хөрмәт күрсәтүне өндәде һәм бик хуплады. Пәйгамбәребез: кем Аллаһка һәм ахирәт көненә иман китерә, шул кунакларына хөрмәт күрсәтсен диде. Син өйдә авыз ачтырасың икән, беренчедән, авыз ачтыру савабын алсаң, икенчедән йортыңа, үзеңә, гаиләңә, йортыңа ураза тотучының хәер-догасын аласың. Бу инде зур, кирәкле хәзинә. Шуңа күрә өйдә авыз ачтыру, кияүгә кыз биргәндә, өйдә никах укытып озату күркәм гамәл санала.