Яманнардан кач, яхшыларга кушыл

(Локман Хәкимнеке булуы ихтимал нәсыйхәтләр белән таныштыруны дәвам итәбез)

– Ир-егетләргә түбәнсетү белән түгел, ә игътибар күзе белән кара. Хатын-кызларга шәһвәт белән түгел, ә шәфкать күзе белән кара.

– Һәркем, дөнья кисәтүләренә карамастан, туры юлга басмаса, ахирәт газабына дучар ителер.

– Берәүгә нәсыйхәт кылырга теләсәң, башта үзеңә нәсыйхәт кыл. Үзеңне нәсыйхәтли алсаң, башкаларга да нәсыйхәт кыл.

– Яманнардан кач, яхшыларга кушыл. Ялгыз булсаң, шайтан белән булырсың. Әгәр яманнар янында йөрсәң, яманга әйләнерсең.

– Үзеңнән түбәнрәк кешеләргә золым итү – акылның түбәнлегеннән.

– Җәза бирергә кадир булып та, кичереп җибәрү – киң күңеллелектән.

– Нигъмәтнең бетүенә золым сәбәпче була.

– Утын утны яндырып торган кебек, акылыңны да әдәп белән кыздырып тор.

– Әдәпсез акыл коралсыз сугышчы мисалындадыр.

– Әдәп – ул бөтен фазыйләтләргә җиткерүче һәм төрле максатларга ирештерүче ысул.

– Нигъмәтнең мәгънәсе – шөкер.

– Шөкер белән нигъмәткә кимү килмәс.

– Лаексыз кешеләрдән үз вакытында котылуга хәрәкәт кыл.

– Кешеләрнең начары гозерне кабул итми, башкаларның гаепләрен яшерми һәм хаталарын кичерми.

– Начар сүздән дә авыррак әйбер юк. Ул юшкын кебек йөрәккә утыра.

– Акыллы кеше кирәкле вакытта, кирәкле урында була белә.

– Батыр көрәштә, юмарт ярдәм иткәндә, сабыр ачуы чыкканда бәяләнә.

– Сарык белән бүре, тәкъва белән әдәпсез арасында дуслык була алмый.

– Карт кешегә ташлы юлдан менү никадәр авыр булса, надан өчен вәгазь тыңлау да шулкадәр авыр.

– Зарурлык булмаганда көлмә, максатсыз йөрмә, үзеңә кагылышлы булмаган әйберләр хакында сорашма.

– Начар әхлактан, тиз кызып китүдән һәм сабырсызлыктан саклан.

Җәлил Фазлыевның «Күңел бакчасы» китабыннан

Фото: pixabay.com/ru