«Әгәр дә шулай булса...»

Башкортстанның атказанган артистлары Илдар Хәкимов белән Гүзәл Уразова үзләренең киносын төшерә.

«Әгәр дә...» исемле мини-сериалда эпизодлар ике минуттан артык дәвам итә, аларда танылган җырчы Гүзәл Уразованың чынлыкта гади авыл хуҗабикәсе булуы турында сөйләнелә.

— Тормышыбызда еш кына шундый мизгелләр була: «Әгәр дә шулай булса, нәрсә булыр иде икән? » - дип уйлыйсың... Әгәр бу «Әгәр дә...» үтәлсә, без нишләр идек? — дип яза Уразова мини-сериалга аннотациядә. — Сериалның сюжеты мондыйрак: беркөнне Гүзәл Уразова уянып китә һәм берни аңламый. Ул бөтенләй башка мохиттә, авылда яши. Ул халык артисты түгел, ә ире Илдар һәм балалары авылда берни булмаган кебек яшиләр. Ул күршеләренә үзенең җырчы булуын әйткәч, тегеләр аңардан көлә. Гүзәлдә урта яшь кризисы, диләр.

Проектта Уразованың тормыш иптәше Илдар Хәкимов һәм аларның балалары Эллари, Камилла, Самир һәм Ариана катнаша. Режиссеры — Марсель Мәхмүтов, Театр эшлеклеләре берлеге әгъзасы. Уразова сүзләренчә, серияләр аның социаль челтәрләрдәге рәсми битләрендә сентябрь аенда Казанда узачак концертларына кадәр көн саен чыгачак.

Уразова иҗатын яратучылар мини-сериалны җылы кабул итте, артистканың балаларын кадрда күрүләренә шат булуларын аерым билгеләп үтте.

«Нәрсәгә генә тотынса да, барысына да көче җитә. Сезнең җырларыгызны яратып, хөрмәт белән тыңлыйм. Түземсезлек белән киләсе серияләрне көтәбез», — дип язган җанатар.

— Рольне бик яхшы уйныйсыз, хәтта камера төшерә дигән тойгы да юк, барысы да тиешенчә бара, — дип билгеләгән икенчесе.

Автор: Резеда Галикәева

чыганак